JOBO 29 - BIVHILI KHETHWA Mafhungo Madifha

Jobo: “Ngavhe ho vha hu tshee kale!”

¹ Jobo a thoma hafhu u amba. Jobo:

² Ndo ṱuvha hani iḽa miṅwedzi yo fhiraho, na aḽa maḓuvha e Mudzimu a vha a tshi nndondola,

³ zwiḽa a tshi nnakisela zwoṱhe, tshedza tshawe tshi tshi mmbonetshela swiswini!

⁴ Ndi misi iḽa zwi tshi kha ḓi nnyanḓa, vhukonani ha Mudzimu vhu tshi tsireledza muṱa wanga;

⁵ ndi misi Ramaanḓaoṱhe a tshi kha ḓi vha na nṋe, ndó tangwa nga vhana vhanga.

⁶ Muṱa wanga wo vha u tshi shulwa nga ṱhowa, matomboni hu tshi gubunyea milambwana ya mapfura.

⁷ Ho vha hu tshi ri ho kuvhangana vhahulwane khoroni ya muḓi, na nṋe ndó thukha vhukati havho,

⁸ vhaṱhanngana vha tshi ri u mmbona vha sendela kule, vhakalaha vha nkhulisa nga u takuwa vha ima nga milenzhe,

⁹ magota vha fhumula vha si tsha amba,

¹⁰ vhaḓivhalea zwa vha somela, vhe tshete.

¹¹ Vhoṱhe vhe vha pfa bvumo ḽanga vho vha vha tshi nkhoḓa; vhe vha mmbona vha khoḓa mishumo yanga.

¹² Vhashai vha tshi lila, ndo vha ndi tshi vha lamukisa, ndi tshi farisa na tsiwana, dzi si na mutikedzi.

¹³ Vhe vha vha vho ingamela tshalo, vho vha vha tshi nkhoḓa nge nda vha tshidza, nda ita uri mbilu ya tshilikadzi i fhululedze.

¹⁴ Ndo vha ndi tshi ambara vhuthu unga nguvho, lupila lwanga na nguwane yanga hu u tonda vhathu;

¹⁵ ndo vha ndi maṱo a bofu, ndi milenzhe ya zwihole;

¹⁶ kha vhashai ndo vha ndi tshi nga khotsi, vhatsinda ndi tshi vha sengela;

¹⁷ ndo vha ndi tshi fhedza maanḓa a vhadziatshiṱuhu; vhe vha vha vha tshi ṱoḓou pondiwa nda vha ponyokisa.

¹⁸ Ndo vha ndi tshi ri ndi ḓo lalama, maḓuvha anga a anda unga muṱavha wa lwanzhe, nda fa ndo tangiwa nga vhana vhanga,

¹⁹ ndi tshi nga muri une midzi yawo ya dzula yo khuba maḓi, matavhi awo a dzula o ṋukala nga ṅwando,

²⁰ vhoṱhe vha tshi dzula vha tshi nkhulisa, nungo dzanga dzi sa fheli, dzi tshi nga vhura vhu no ḓi posa misevhe.

²¹ Musi ndi tshi eletshedza vhathu ho vha hu tshi fhumulwa, ha thetsheleswa zwine nda amba,

²² nda ri u fhedza u amba vha si tsha fhindula, maipfi anga a nwelela mbiluni dzavho, a nga marotha a mvula,

²³ muṅwe na muṅwe a a lindela unga vhalimi vha tshi lavhelela mvula ya tseula;

²⁴ ndo vha ndi tshi ri u sea, vho hanganeaho vha dovha u wana nungo; naho vhoṱhe vho kulea nungo; nṋe nda ḓi sala ndo khwaṱha.

²⁵ Ndo vha ndi tshi vha ranga phanḓa, nda vha khethela nḓila, nda vha endedza unga khosi, yo ranga mmbi dzayo phanḓa, vha tshi lila nda vha fhumudza.