JOBO 28 - BIVHILI KHETHWA Mafhungo Madifha

U khoḓa vhuṱali

¹ Siliva i bwiwa mugodini; na musuku u na hune wa ṱanzwiwa;

² vhathu vha bwa ngweḓi mavuni; vha ṋokisa musina u tshi bva kha matombo.

³ Vhathu vha tshi bwa matombo vha sunguvhela malani a shango, na swiswi a vha ḽi ofhi, vha tshimbila swiswini ho tou bodo.

⁴ Vha bwa milonga ya migodi, fhasi-fhasi, kule na hune ha dzula vhathu, hune muthu a sa ḓivhe uri ho vhuya ha kandwa; henengei kule na vhathu vha nembelela nga thambo.

⁵ Zwiḽiwa zwi mela mavuni, hone ngomu mavuni eneo ho fukukanywa, zwa nga ho fhiswa nga mulilo.

⁶ Matomboni hu bva safire, buseni ḽaho hu bva thombwana dza musuku.

⁷ A hu na lurwanzhivha lu no vhona nḓila heyo yo dzumbamaho; na ḽiṱo ḽa goni ḽi nga si i vhone.

⁸ Tshivhanda a tshi vhuyi tsha hu kanda; na ndau a i vhuyi ya ṋengeledza henefho.

⁹ Vhathu vha kora matombo a konḓesaho, vha fukula dzithavha mudzini wadzo,

¹⁰ vha phuletshedza lutombo, vha tumbula matombo a mutengo muhulu.

¹¹ Vha thivha zwisima zwa milambo ngomu mavuni, zwo dzumbamaho vha zwi bvisela tshedzani.

¹² Vhuṱali hone vhu nga wanala ngafhi? Ri nga guda ngafhi u ṱalukanya?

¹³ A hu na muthu a no ṱalukanya mutengo waho; a vhu wanali kha vhathu vha ṋama.

¹⁴ Dzivha ḽi ri, “A vhuho fhano!” Lwanzhe lu ri, “Nṋe thi naho!”

¹⁵ Na musuku a u koni u vhu renga; mutengo waho a u vhambedzwi na siliva;

¹⁶ musuku u songo vangwaho u nga si vhu renge; onikisi na safire a zwi vhambedzwi naho;

¹⁷ vhu fhira mutengo wa musuku, na mudzio wa musuku kana ngilasi i vhonadzaho;

¹⁸ khorala na khristala a zwi vhuyi zwa vhambedzwa naho; mutengo waho u fhira pherele;

¹⁹ gurannḓa yo nanguludzwaho a i vhambedzwi naho; na musukusuku a u vhu rengi.

²⁰ Zwino-ha tshisima tsha vhuṱali tshi ngafhi? Ndi ngafhi hune ra nga guda u ṱalukanya?

²¹ A vhu vhonwi nga tshivhumbwa tshi tshilaho na tshithihi, nangwe tshi tshiṋoni tshi fhufhaho.

²² Lufu na dindi zwi ri, “Ro tou pfa zevhezevhe ḽaho fhedzi.”

²³ Ndi Mudzimu e eṱhe a no ḓivha nḓila yo livhaho khaho; ndi Ene a no ḓivha hune vhuṱali ha wanala;

²⁴ Ene u vhona he ḽifhasi ḽa guma; u vhona na zwoṱhe zwi re fhasi ha lutombo.

²⁵ Zwiḽa a tshi kalela muya maanḓa awo, a vhetshela lwanzhe mukano;

²⁶ zwiḽa a tshi nanga hune mvula ya ḓo na, makole a no bvuma a a sumba nḓila,

²⁷ ndi musi we a vhona vhuṱali a vhu anganya, a vhona mutengo waho a vhu khwaṱhisa,

²⁸ a konou vhudza muthu a ri, “U ofha Muṋe wa zwoṱhe ndi hone vhuṱali; u furalela vhuvhi ndi yone ṱhalukanyo.”