JOBO 27 - BIVHILI KHETHWA Mafhungo Madifha

Jobo: “Luvalo lwanga lwo ṱamba.”

^1-2 Ndi ana nga Mudzimu Ramaanḓaoṱhe a tshilaho, Ene ane a nndaṱa ndi si na mulandu, a ntambudza,

³ ndi ri: arali Mudzimu a tshee o mpha mufemo, mufemo wawe u tshi kha ḓi vha ningoni dzanga,

⁴ milomo yanga i nga si vhuye ya bula mavhi, lulimi lwanga lu nga si vhuye lwa amba a vhufhura!

⁵ Ngoho ndi nga si vhuye nda ri inwi ni ngohoni, ndi ḓo ḓi ri a thi na mulandu ndi vhuye ndi fe;

⁶ ndi ḓo ḓi omelela kha ḽa uri ndi ngohoni; luvalo lwanga lwo ṱamba.

Jobo: “Mudzimu u ḓo rwa vha mu nyadzaho.”

⁷ Ngavhe maswina anga oṱhe ane a nkhanedza a tshi itwa zwine zwa itwa vhavhi, a rwiwa unga vhatshinyi.

⁸ Vha nyadzaho Mudzimu vha ḓo fulufhela zwifhio musi vha tshi tumulwa, musi Mudzimu a tshi vha dzhiela vhutshilo havho?

⁹ Musi wa khombo Mudzimu u ḓo thetshelesa mukosi wavho naa?

¹⁰ Ramaanḓaoṱhe o vha o fanela u dzula e dakalo ḽavho, vha ḓi dzula vha tshi mu rabela misi yoṱhe.

¹¹ Litshani ndi ni funze uri maanḓa a Mudzimu ndi mangafhani; ndi nga si ni dzumbele zwe Ramaanḓaoṱhe a dzudzanya.

¹² Hufha zwoṱhe no tou zwi vhona inwi vhaṋe, zwino ndi mini ni tshi amba zwi sa pfali?

¹³ Zwine Mudzimu a livhanya vhavhi nazwo ngezwi; ndi ḽone ifa ḽine mavemu a ṋewa nga Ramaanḓaoṱhe:

¹⁴ vha nga ḓi vha na vhana vhanzhi vha vhatuka – vhoṱhe vha ḽiwa nga pfumo, vhaḓuhulu vhavho vha si ḽe vha fura;

¹⁵ vha salaho vha ḓo fa nga dwadze vha si swiṱwe, na tshilikadzi dzavho dza si vha lile.

¹⁶ Muvhi a nga ḓi khokha siliva ya nga buse, zwiambaro zwa nga thulwi dza vumba,

¹⁷ hone zwa sala zwi tshi ambarwa nga vha thetshelesaho Mudzimu, vha si na mulandu vha kovhekana iyo siliva.

¹⁸ Nnḓu i no fhaṱwa nga muvhi i ḓo nga tshiṱaha tsha lubuvhi, kana ḓingo ḽa u linda masimu.

¹⁹ A tshi yo lala u vha o pfuma, a tshi vuwa a wana lupfumo lwo fhufha, a si tsha dovha a lu wana.

²⁰ Zwi ofhisaho zwi ḓo mu kumba unga muḓalo wa maḓi; u ḓo hwalwa nga maḓumbu vhusiku;

²¹ muya u fhisaho u ḓo mu hwala wa ṱuwa nae, wa mu swiela nḓuni yawe;

²² u ḓo mu vhudzula u sa mu khathutsheli, ene a shavha nga luvhilo luhulu,

²³ ḓumbu ḽa fhululedza a tshi shavha, ḽa tita ḽa mu thatha nḓuni yawe.