JOBO 24 - BIVHILI KHETHWA Mafhungo Madifha

Jobo: “Vha maanḓa vha tshi kandeledza vhaṅwe, Mudzimu ha zwi londi.”

¹ Ndi mini Ramaanḓaoṱhe a sa vhei tshifhinga tsha u haṱula? Ndi mini vhane vha mu ḓivha vha sa vhoni maḓuvha eneo?

² Vhathu vha sudzulusa matombo a mikano vha ḓiengedzela masimu, vha fuwa sambi ḽa nngu dze vha tswa,

³ vha kumba donngi ya tsiwana, vha fara phulu ya tshilikadzi a vhuya a lifha mulandu;

⁴ vha thatha vhaheḓana nḓilani, vha kombetshedza vhasingili u yo dzumbama.

⁵ Vha ita uri vhashai vha yo ṱoḓa zwiḽiwa sogani unga mbiḓi, vha ri vhana vhavho vha yo doba zwidu phangani;

⁶ vhaheḓana vha kaṋa zwiḽiwa zwa zwifuwo masimuni, vha ḽa, vha ṱala ṱhalane ya nḓirivhe masimuni a vhavhi;

⁷ vhusiku vha lala vha songo fuka tshithu, a vha na tsha u pila phepho,

⁸ vha ṋukadzwa nga vhusuṱo vhu naho dzithavhani, vha nambatela matombo nga u shaya vhudzumbamo.

⁹ Tshetshe dzi si na vhokhotsi dzi zhuvhulwa dzi tshi mama dza itwa dziphuli, vhana vha vhashai vha a dzhiwa ha lifhiwa mulandu ngavho;

¹⁰ vhashai vha tshimbila fhedzi nga tsiku; vha kaṋela vhapfumi mavhele, ngeno vhone vha tshi dzivhiswa u a ḽa;

¹¹ vha hamula nyolivi vha ita mapfura, vha fhonḓela nḓirivhe bonḓeloni vha ṱuḓa waini, vhone vhaṋe vha tshi khou fa nga ḓora.

¹² Ngei miḓini vha faho vha a gomela, khuvhabvu dzi ṱavha mukosi, hone Mudzimu ha vhuyi a vhea vhavhi mulandu.

¹³ Hu na vhane vha vhenga tshedza; a vha tshi ṱalukanyi, na hune tsha vhonetshela a vha yi.

¹⁴ Phondi i vuwa hu tshee vhusiku, ya yo vhulaha mushai na musingili, vhusiku u vha fobvu.

¹⁵ Phombwe yone i lindela lufhimavhaeni; i a khurumela uri i si vhonwe nga muthu.

¹⁶ Mafobvu a pwasha dzinnḓu vhusiku; masiari vha a dzumbama, a vha pfani na tshedza;

¹⁷ ḽi tshi tsha vhoṱhe vha vhona hu hone ḽo sikuwa, ho tou bodo; zwi ofhisaho zwa vhusiku, vhone a vha zwi ofhi.

Jobo: “Vhavhi kha vha teketelwe!”

¹⁸ Kha vha nge makukwi a hwalwaho nga muḓalo wa maḓi, Mudzimu a teketele thundu dzavho, masimuni avho a minḓirivhe hu si tsha shuma muthu!

¹⁹ Vhavhi nga vha milwe nga tshalo, vha nge mahaḓa a tshi ṋoka nga biso, vha nge maḓi a tshi nwelela mavuni o omaho,

²⁰ na vhomme avho vha si tsha vha elelwa, mbungu dzi ḓiphiṋe nga u vha ḽa! Nga vha hangwiwe, vha paḓukane unga muri, u vhe wone mulifho wa vhuvhi havho!

²¹ Vha ḽeledza muumba a si na vhana, tshilikadzi vha si i itele vhuthu.

²² Mudzimu u khwikhwidza vha maanḓa nga maanḓa awe; a takuwa, vha dzula vhe na nyofho ya lufu.

²³ Mudzimu a nga ḓi vha litsha, vha pfa vho tsireledzea, hone a ḓi dzula o vha vhea iṱo.

²⁴ Nga zwi vha nakele tshifhinganyana, vha mbo ḓi ṱuwa, vha pute unga lukumbe lwa muṋawa lwo ṱhukhulwa, vha nge khula ya makhaha yo tshewa!

²⁵ Zwo ralo! Ndi nnyi ane a nga nkhanedza a ri a si ngoho?