JOBO 23 - BIVHILI KHETHWA Mafhungo Madifha

Jobo: “Ngavhe ndi tshi nga wana Mudzimu nda hanedzana nae!”

^1-2 Ndi kha ḓi gungula nga u pfa mbilu u vhavha; tshanḓa tsha Mudzimu tsho ntsikeledza nangwe ndi tshi khou gomela.

³ Ngavhe ndi tshi ḓivha hune nda nga mu wana hone, nda tou swika hune a dzula!

⁴ Ndo vha ndi tshi ḓo hwedza mulandu wanga, nda ḓisengela ndo tanda na tsinga;

⁵ ndo vha ndi tshi ḓo ḓivha phindulo yawe, nda ṱalukanya zwine a amba.

⁶ O vha a tshi ḓo nkhanedza nga maanḓa awe mahulu? Aiwa, o vha a sa nga mpomoki;

⁷ ndo vha ndi tshi ḓo hanedzana nae, a thi na mulandu; muhaṱuli wanga o vha a tshi ḓo mmbofholola, nda si tsha vhuya nda pomokwa.

⁸ Ndo ṱoḓa Mudzimu vhubvaḓuvha nda si mu wane, nda ṱoḓa vhukovhela, na hone nda si mu wane;

⁹ a tshi shuma devhula, a thi mu vhoni; a tshi ya tshipembe, na hone a thi mu vhoni.

¹⁰ Hone Ene u a ḓivha hoṱhe hune nda tshimbila; á nṱola u ḓo vhona ndo kuna unga musuku.

¹¹ Milenzhe yanga yo kanda vhuṱalani hawe; ndo tshimbila nḓilani yawe ndi sa pambuwi.

¹² Ndi ḓi dzula ndi tshi ita zwine a ri zwi itwe; zwine a amba ndi zwi vhulunga mbiluni yanga.

¹³ Hone Ene a amba o amba; ndi nnyi ane a nga mu dzivhisa? U ita zwine a funa.

¹⁴ U ḓo khunyeledza zwe a nnzudzanyela zwone, naho hu na zwiṅwe zwinzhi zwe a mmbetshela.

¹⁵ Ndi zwine nda tetemela nga nyofho maṱoni awe; ndi tshi elekanya zwoṱhe hezwi ndi a mu ofha.

¹⁶ Mudzimu o nkula nungo; Ramaanḓaoṱhe o nnyofhisa.

¹⁷ Naho zwo ralo, swiswi ḽino ḽo ntibaho khofheni ḽi nga si nthivhe mulomo.