JOBO 22 - BIVHILI KHETHWA Mafhungo Madifha

Khonani ya u thoma: “Mudzimu u khou ni rwela vhuvhi haṋu, a hu na zwiṅwe.”

¹ Elifasi:

² Muthu a nga itela Mudzimu mini? Na vhuṱali hawe, zwi farisa ene muṋe fhedzi.

³ Arali ni muvhuya, Ramaanḓaoṱhe zwi mu takadza ngani? Arali ni sa solisei, ú wanani?

⁴ Hezwi Mudzimu a tshi ni kaidza a ni isa tsengoni, u zwi ita nga u vhona ni tshi mu hulisa naa?

⁵ A si uri no tshinyesa naa? Ndi nga mulandu wa vhuvhi haṋu vhu sa fheli!

⁶ Ni sokou fara thundu ya wa haṋu ni tshi ri a nga si lifhe mulandu, na vhuya na tou ṱangula vhathu vha sala fhedzi.

⁷ We a vha e na ḓora no mu dzima maḓi, a na nḓala na si mu fhe zwiḽiwa.

⁸ No dzhia shango nge na vha na maanḓa, vhaswikeli vhaṋu vha dzula khaḽo.

⁹ No thatha tshilikadzi dza ṱuwa fhedzi, na khokhovhedza tsiwana.

¹⁰ Ndi zwe na tangwa nga zwikwekwe, na mbo ḓi tshenuswa nga zwi ofhisaho,

¹¹ swiswi ḽa tou bodo na si tsha vhona, na tibwa nga muḓalo wa maḓi.

¹² Mudzimu ha dzuli ṱaḓulu-ṱaḓulu kani? Edzonu sedza ṋaledzi uri dzi kule hani!

¹³ Naho zwo ralo, inwi ni ri, “Mudzimu u ḓivhani? A nga haṱula hani ó tsirwa nga makole?”

¹⁴ Ni vhona unga makole a mu kundisa u vhona, hezwi a tshi tandula mikano ya lutombo.

¹⁵ Ni ḓo ḓi tshimbila nḓilani ya kale yo tshimbilwaho nga vhavhi?

¹⁶ Ḓivhani uri vho kumbwa nga muḓalo wa maḓi tshifhinga tshavho tshi sa athu swika.

¹⁷ Ndi vhathu vhane vha amba na Mudzimu, vha ri, “Ri litshe! Ramaanḓaoṱhe a nga ri itani?” –

¹⁸ hone e Ene o ḓadzaho nnḓu dzavho nga zwithu zwavhuḓi. Mihumbulo ya vhavhi nṋe a thi pfani nayo.

¹⁹ Vhavhuya vha tshi vhona muvhi a tshi ṱungufhadzwa, vha a takala, vha si na mulandu vha a sea, vha ri,

²⁰ “Koṱo, maswina ashu o lozwiwa! Lupfumo lwavho lwo fhiswa nga mulilo lwe lore!”

“Humelani ha Mudzimu!”

²¹ Pfumedzanani na Mudzimu, ndi hone zwi tshi ḓo ni nakela;

²² ṱanganedzani pfunzo yawe, ni vhulunge ipfi ḽawe mbiluni yaṋu;

²³ humelani ha Ramaanḓaoṱhe, ndi hone a tshi ḓo ni tika; ni laṱe vhuvhi vhu no itwa nḓuni yaṋu,

²⁴ na musuku waṋu ni laṱe kule, lupfumo lwaṋu ni lu kudze muṱavhani wa mulambo!

²⁵ Ramaanḓaoṱhe nga a vhe Ene musuku waṋu, a vhe Ene siliva yaṋu yo khokhwaho,

²⁶ ndi hone Ramaanḓaoṱhe a tshi ḓo vha Ene dakalo ḽaṋu, na konana na Mudzimu.

²⁷ Ni tshi rabela u ḓo ni aravha, na ḓo konou khunyeledza zwe na mu anela.

²⁸ Zwoṱhe zwine na ita zwi ḓo ni nakela; nḓila dzaṋu dzi ḓo vhonetshelwa nga tshedza.

²⁹ Arali muthu a ri u wiswa, inwi na ri, “Nga a vusiwe!” – ndi hone Mudzimu a tshi ḓo tshidza vha u ḓiṱukufhadza;

³⁰ u ḓo vhofholola na a re na mulandu, a tshi itela vhuvhuya haṋu.