JOBO 21 - BIVHILI KHETHWA Mafhungo Madifha

Jobo: “Mudzimu u a litsha vhavhi zwa ḓi vha nakela.”

^1-2 Thetshelesani zwine nda amba, zwi vhe zwone zwine na nkhuthadza ngazwo.

³ Nkonḓeleleni ndi ambe, ndi hone ni tshi ḓo kona u nkolela.

⁴ Ndi khou gungulela vhathu vhapenyu naa? Ndi ḓo litshelani u fhela mbilu?

⁵ Ni tshi ntsedza a ni akhamali? A zwi ni someli?

⁶ Ndi tshi elekanya zwo nngwelaho ndi pfa ndi tshi ofha, muvhili wanga wa tetemela.

⁷ Ndi mini Mudzimu a tshi tendela vhavhi vha tshi tshila? Ndi mini vha tshi lalama maanḓa avho a ḓi engedzedzea?

⁸ Vha na vhana na vhaḓuhulu, vho ṱoka midzi, vha aluwa vha tshi khou ḓi vha vhona.

⁹ Miṱani yavho hu na mulalo, a vha ofhi tshithu; ṱhamu ya Mudzimu a i vha weli.

¹⁰ Mboho dzavho dzi a hwela, tsadzi dza si kundwe u vha na maḓamu; na u fholodza a dzi fholodzi.

¹¹ Vha sokou litsha zwiṱoma zwavho, zwa bva unga sambi ḽa ngwana; vhana vhavho vha tshina, vha thamukana.

¹² Vha imba hu tshi khou lila tshwayo na mbila; vha pembela hu tshi khou lila tshiṱiringo.

¹³ Vha tshila vha guma vho takala, vha dzhena tshaloni nga mulalo.

¹⁴ Vha vhudza Mudzimu vha ri, “Ri litshe! A ri ṱoḓi u ḓivha nḓila dzau!

¹⁵ Ramaanḓaoṱhe ndi nnyi ane ra pfi ri mu luvhe? Ri tshi mu rabela ri wanani?”

¹⁶ Vha zuwa uri lupfumo lwavho vho lu wana nga vhukoni havho. Nṋe ndi landula muya wo raloho,

¹⁷ hone mmbudzeni-ha uri luvhone lwa muvhi lwo no vhuya lwa dziṅwa naa; o no vhuya a welwa nga khombo kani? Mudzimu ó sinyuwa u a vhuya a mu livhanya na mafhanza?

¹⁸ U a vhuya a mu vhudzula unga mathukhwi a hwalwaho nga muya, a nga mungu u hwalwaho nga maḓumbu?

¹⁹ Ni ri muthu u ri u tshinya, Mudzimu a rwa vhana vhawe! Aiwa, nga a rwe ene muṋe a zwi ḓivhe!

²⁰ Muvhi nga a wane ṱhamu ye a livhanywa nayo! Nga a nwe mbiti dza Ramaanḓaoṱhe.

²¹ Arali muthu o fa, miṅwedzi yawe yo tumuwa, u kha ḓi londa zwa muṱa wawe naa?

²² Muthu a nga funza Mudzimu vhuṱali naa? Hufha Ene a tshi haṱula vha re vhuimoni vhuhulwane.

²³ Muṅwe u a lalama, a vha na nungo a vhuya a fa, a fa o takala o rudza mbilu,

²⁴ zwirumbi zwawe zwó angula, marambo awe ó fura mwongo.

²⁵ Muṅwe ha vhuyi a takala; u tshila a fa mbilu i tshi vhavha;

²⁶ vhoṱhe vhuvhili havho vha fhedza nga u vhandekana buseni, mbungu dza tou phapha nṱha havho.

²⁷ Nṋe ndi ḓivha mihumbulo yaṋu, na maano ane na ṱoḓa u mmbaisa ngao ndi a a ḓivha.

²⁸ Ni ri, “Nnḓu ya munna muhulu i ngafhi zwino? I ngafhi pfamo ye muvhi a vha o dzula khayo?”

²⁹ No vha ni sa vhudzisi vhafhiri vha gondo naa? Zwe vha ni vhudza a no ngo zwi pfa kani,

³⁰ hu tshi pfi muvhi u a sala musi wa khombo, musi wa mbiti dza Mudzimu u a ponyokiswa?

³¹ Ane a nga hanedzana na muvhi khoroni ndi nnyi? Ndi nnyi ane a nga mu lifhedza zwe a ita?

³² U yo swiṱwa nga mutsindo, tshalo tshawe tsha lindwa,

³³ vhathu vhanzhi vha rwa muduba vha mu fhelekedza; na mavu a tou mu tsika zwavhuḓi.

³⁴ Huno inwi ndi mini ni tshi nkhuthadza nga maipfi a sa ambi tshithu? Phindulo dzaṋu ndi muhoyo fhedzi!