JOBO 20 - BIVHILI KHETHWA Mafhungo Madifha

Khonani ya vhuraru: “Muvhi ha ḓiphiṋi u ya thambo.”

¹ Tsofara:

² A thi tsha kona u konḓelela; ndi ḓo fhindula; ndo dinalea, ndi vho fhela mbilu.

³ Ni tshi amba nga u ralo ni khou ntsema; ndi na ṱhalukanyo, ndi ḓo ni fhindula.

⁴ A ni zwi ḓivhi uri u bva mathomoni, tshee muthu a vhewa fhano fhasi,

⁵ a hu na muvhi we a ḓiphiṋa u ya thambo naa? Dakalo ḽa a no nyadza Mudzimu a ḽi lengi u fhela.

⁶ A nga vha na bvumo ḽa guma lutomboni, ṱhoho yawe ya kwama makole;

⁷ u ḓo lovha unga mupfudze wawe, vhane vha mu ḓivha vha si ḓivhe he a ya.

⁸ U ḓo fhufha unga muloro a si tsha wanala; u ḓo ngalangala unga bono ḽa vhusiku,

⁹ ḽiṱo ḽe ḽa vhona bono iḽo ḽa si tsha ḽi vhona; u ḓo vuwa a si tsheeho.

¹⁰ Vhana vhawe vha ḓo vhuedzedza zwe a tswela vhashai; zwanḓa zwawe zwo fanela u humisa lupfumo lwawe.

¹¹ Muvhili wawe wo vha u muswa, u na nungo, hone u ḓo ṱuwa u tshi vha buse.

¹² Vhuvhi vhu a mu ḓifhela lune a vhu khuba mulomoni,

¹³ a muṋedza nga zwiṱuku, a si tende vhu tshi ṱavhanya u fhelela.

¹⁴ Hone thumbuni yawe zwiḽiwa zwi a shanduka, zwa kalakata unga vhuṱungu ha ṋowa.

¹⁵ Lupfumo lwe a mila, u a lu ṱanza; Mudzimu u mu ṱanzisa lwone.

¹⁶ U ḓo nga o mama vhuṱungu ha ṋowa, a nga ó lumiwa nga vuluvulu, a fa.

¹⁷ Ha tsha ḓo ḓiphiṋa nga milambo i elaho mapfura, na milambwana yo ḓalaho mutoli na luvhomba.

¹⁸ Zwe a zwi bvela biko, u ḓo zwi humisa zwi songo ḽiwa; ha nga ḓiphiṋi nga mbuelo dza bindu ḽawe.

¹⁹ Hufha o kandeledza vhashai a vha ṅaledza, a dzhia nnḓu dzo fhaṱwaho nga vhaṅwe.

Khombo ya muvhi

²⁰ U a phaga, ha furi; lupfumo lwe a khokha lu nga si mu tshidze.

²¹ A tshi ḽa ha sii; mashudu awe ha nga yi thambo.

²² U ḓo ri a tshi kha ḓi ḽa a tshi fura, a welwa nga khombo, a ḓelwa nga maṱungu mahulu.

²³ Litshani a ḽe a fure – Mudzimu u ḓo sinyuwa a mu laṱisa, a tou mu nisela mavili.

²⁴ U ḓo ri a tshi shavha pfumo ḽa tsimbi, a pfulwa nga musevhe wo poswaho nga vhura ha musinaseṱha.

²⁵ U ḓo ri a tshi u ṱomola muṱanani wawe, ṱhodzi i penyaho a i ṱomola kha tshavhuṱungu, a welwa nga zwi ofhisaho.

²⁶ Zwoṱhe zwe a vhulunga zwi ḓo phusukanywa; u ḓo fhiswa nga mulilo u songo vhudzedzwaho nga muthu, thundu yo salaho nḓuni ya swa ye lore.

²⁷ Ḽiṱaḓulu ḽi ḓo dzumbulula vhuvhi hawe, na ḽifhasi ḽi ḓo ṱanzilela ḽa mu laṱa;

²⁸ thundu i re nḓuni yawe i ḓo kumbiwa nga muḓalo wa maḓi, musi wa mbiti dza Mudzimu.

²⁹ Mudzimu u livhanya vhavhi na zwo raloho; ndi ḽone ifa ḽe a vha dzudzanyela.