JOBO 2 - BIVHILI KHETHWA Mafhungo Madifha

Saṱhane a tshi dovha u linga Jobo

¹ Musi hu tshi swika ḓuvha ḽine magota a Mudzimu a fanela u ya khoroni ya Muṋe washu, na Saṱhane a vha e henefho vhukati havho, a tshi fanela u ḓa.

² Muṋe washu a mu vhudzisa a ri, “Wo vha u tshi khou itani?” Saṱhane a fhindula a ri, “Ndo vha ndi tshi khou tendeleka ndi tshi mona-mona na ḽifhasi.”

³ Muṋe washu a mu vhudzisa a ri, “Wo vhuya wa vhona mulanda wanga Jobo? A hu na na muthihi shangoni ane a nga ene, ha solisei, u a fulufhedzea, u ofha Mudzimu, ha funi u tshinya. Wo ita uri ndi mu lozwe a si na mulandu, hone naho zwo ralo u kha ḓi fulufhedzea unga kale.”

⁴ Saṱhane a fhindula a ri, “Mavhele nga mavhele; muthu a nga lifha nga zwoṱhe zwine a vha nazwo uri a tshile.

⁵ Edzou vhaisa muvhili wawe; ngoho u ḓo u sema a sa dzumbi!”

⁶ Ndi hone Muṋe washu a tshi amba na Saṱhane a ri, “Ndi zwone, u zwanḓani zwau, hone u songo mu vhulaha!”

⁷ Zwenezwo Saṱhane a ṱuwa hune Muṋe washu a vha hone, a ita uri Jobo a bviwe nga zwilonda muvhili woṱhe.

⁸ Jobo a ya a dzula ḓaleḓaleni a ḓikweta zwilonda nga tshikengevheḓa tsha khali.

⁹ Mufumakadzi wawe a amba nae a ri, “Mathina vha kha ḓi fulufhedzea? Khezwi vha sa semi Mudzimu vha ḓifela!”

¹⁰ Jobo a fhindula a ri, “Ni khou amba unga tsilu! Mudzimu a ri ṋea zwivhuya ri a takala, zwino a tshi ri ṋea zwo vhifhaho ri zwi landule naa?” Nangwe Jobo o welwa nga khombo nngafho, ho ngo vhuya a amba zwo bvaho nḓilani.

Khonani dza Jobo dzi tshi mu dalela

¹¹ Jobo o vha e na khonani tharu. Ndi Elifasi wa Themana, na Bilidadi wa Shuwa, na Tsofara wa Naama. Vho ri u pfa khombo dzo welaho Jobo vha langana u yo mu khuthadza na u imela.

¹² Musi vha tshi kha ḓi vha kule vha vhona Jobo, hone vha si mu ḓivhe; vha tshi vhona uri ndi ene vha thoma u rothisa miṱodzi vha honḓa, vha kherukanya zwiambaro zwavho vhó ṱungufhala, vha hasha buse muyani na ṱhohoni dzavho.

¹³ Ndi hone vha tshi dzula henefho mavuni nae, vha fhedza maḓuvha maṱanu na mavhili na vhusiku hao vha sa vhuyi vha amba tshithu nae, nge vha vhona a tshi khou tambula zwihulu.