JOBO 19 - BIVHILI KHETHWA Mafhungo Madifha

Jobo: “Mudzimu o nkhakhela ...”

^1-2 Ni ḓo litsha lini u nṱhavha mbilu? Uvhani ni tou mpaḓukanya nga maipfi aṋu;

³ ni ḓi endela u ntsema, na nndevhela, na u shona a ni shoni.

⁴ Nangwe ndo khakha zwanga, inwi zwi ni dina ngani?

⁵ Arali ni tshi ḓiita vhahaṱuli vhanga, dambulo ḽanga í yone ṱhanzi yaṋu,

⁶ ḓivhani-ha uri ndo khakhelwa nga Mudzimu; ndi Ene o ntandaho nga mambule awe.

⁷ Ndi tshi ṱavha mukosi ndó huvhadzwa, a hu na phindulo; nda luvhelela, nda si haṱulwe.

⁸ Mudzimu o dzivha nḓila, a thi koni u fhira; nḓila yanga o i tiba nga swiswi;

⁹ o mmvula vhugala, a mmvisa mvumbo;

¹⁰ u nkovhola thungo dzoṱhe, ndo fhela; o tupula fulufhelo ḽanga unga muri;

¹¹ u nndyela vhuhali, u nnyita swina ḽawe;

¹² mbiti dzawe dzo bva pfumo, dzo ḓa u dia nṋe, dzo govhela nnḓu yanga.

¹³ O nnduṱanya na vha hashu; khonani dzanga dzi vho nnyita mutsinda;

^14-15 mashaka anga na ṱhama dzanga vho nṱamba; vhe vha dala nḓuni yanga vho nkhangwa; vhashumi vhanga vha vhasidzana vha ntsedza unga mutsinda;

¹⁶ ndi tshi vhidza phuli yanga, a i aravhi, ndi fanela u tou i luvhelela;

¹⁷ musadzi wanga ha koni u konḓelela mufemo wanga; vhana vha mme anga vha ri ndi a nukha;

¹⁸ na vhana vhaṱuku vha a nnyadza, nda takuwa vha a kwetedzana;

¹⁹ khonani dzanga dza mbiluni dzi a nnengwa; vhe nda vha ndi tshi vha funa vho ntshandukela;

²⁰ ndo fhela, ndo sala ndi lukanda na marambo; ho tou sala dethele fhedzi.

²¹ Khonani dzanga, a ni mpfeli vhuṱungu naa? Ndi ri mpfeleni vhuṱungu nandi; tshanḓa tsha Mudzimu tsho nthwa!

²² Ndi mini Mudzimu a tshi ri u ntovhola na inwi na ntovhola? A ni athu pfelela u ntambudza naa?

“... hone Mulifheli wanga u hone.”

²³ Ngavhe maipfi anga haya a tshi ṅwalwa! Ngavhe a tshi tou ṅwalwa buguni!

²⁴ Ngavhe a tshi ṅwalwa kha mutobvu nga luunzhi, zwa tou korwa kha tombo, zwa dzula zwi hone lini na lini!

²⁵ Nṋe ndi a zwi ḓivha uri Mulifheli wanga u a tshila; u ḓo fhedza nga u ḓa a kunda ḽifhasi.

²⁶ Nangwe lukanda lwanga lu tshi ḓo vha lwo no ṱahala, ndi ḓo vhona Mudzimu ndí kha muvhili wonouno, Mudzimu ndi ḓo mu vhona.

²⁷ Ndi ḓo mu vhona nga anga maṱo, e si a muṅwe; mbilu yanga i nyengela zwenezwo!

²⁸ Arali na ri, “Ri nga mu tovhola hani, vhunga a tshi tambudzelwa vhuvhi hawe?” –

²⁹ zwino-ha ofhani pfumo ḽo ni sumbaho; mbiti dza Mudzimu dzi swiela vhavhi nga pfumo, ndi hone ni tshi ḓo ḓivha uri hu na khaṱhulo.