JOBO 18 - BIVHILI KHETHWA Mafhungo Madifha

Khonani ya vhuvhili: “Muvhi u fhedza nga u wela khomboni.”

¹ Bilidadi:

² Jobo, a ni koni u vhuya na fhumula-vho naa? Ni ri tshete, ri ambe-vho, ni thetshelese.

³ Ndi mini ni tshi ri ita dziphukha? Ni ri itelani matsilu?

⁴ Ni khou tou ḓivhaisa nga mbiti dzaṋu. Ni ḓo ri u sinyuwa vhathu vha pfuluwa shangoni naa? Kani-ha ni vhona unga zwikwara zwi ḓo sudzuluwa?

⁵ Nṋe ndi ri tshedza tsha muvhi tshone tshi ḓo dzima; tshivhasoni tshawe a hu tsha ḓo duga khavhu;

⁶ nḓuni yawe a hu nga vhi na tshedza; luvhone lwawe lu ḓo dzima.

⁷ A tshi tshimbila ho vha hu tshi pfala mutsindo, hone zwino u vho pepeleka; o ḓifasha nga vhukwila hawe;

⁸ o longa mulenzhe tshikwekweni; khunḓa yo fasha muvei;

⁹ tshilibana tsho mu fasha tshirethe; tsho ganedza a fashwa;

¹⁰ o retshelwa tshikwekwe ngomu mavuni; nḓilani yawe ho rewa mulavhu.

¹¹ O tangwa nga ḓuvha na mulilo; a zwi mu humeli;

¹² o kulea nungo nga nḓala; khombo yo lindela u mu mila;

¹³ dwadze ḽi ḽa lukanda lwawe; tanzhe ḽa lufu ḽi ḽa miraḓo yawe.

¹⁴ U kwatulwa, a bviswa nḓuni he a vha o dzumbama, a khwikhwidzelwa ha khosi ya zwi ofhisaho,

¹⁵ hayani hawe ha hashwa tsevhela, hu si mele tshithu,

¹⁶ midzi yawe ngeno fhasi yó oma, ngei nṱha matavhi ó puta,

¹⁷ bvumo ḽawe fhano shangoni ḽa fhela, dzina ḽawe ḽa si tsha humbulwa.

¹⁸ U thathiwa shangoni, a pandelwa tshedzani a shavhela swiswini.

¹⁹ Ha na na ṅwana; he a vha a tshi dzula ho ngo sia na muthu.

²⁰ U bva vhubvaḓuvha u swika vhukovhela, vha no pfa zwe a livhanywa nazwo vha tetemela nga nyofho.

²¹ Vhavhi vha livhiwa nga zwo raloho; vha sa londi Mudzimu vho fanelwa nga zwenezwo.