JOBO 17 - BIVHILI KHETHWA Mafhungo Madifha

Jobo: “Ndo ṱovhowa.”

¹ Ndi vho fa, muya wo pwashekana, ho sala tshalo fhedzi.

² Ngoho ndo tingwa nga vhagoḓi; a vha nkhumeli.

³ Ndi ḓo ambelwa nga nnyi ha Iwe? Nga a vhe Iwe muṋe.

⁴ Wo vha dzhiela ṱhalukanyo; u songo tenda vha tshi nkunda.

⁵ Zwi nga munna a no kovhela khonani dzawe vhuṱali, ngeno vhana vhawe vho kovhedza maṱo nga nḓala.

⁶ Mudzimu o nnyita tshianeo; ndi pfelwa mare khofheni.

⁷ Ndo ṱoḓou pofula nga u ḽa mbilu; miraḓo yanga yo fhelela, ndo sala ndi murunzi.

⁸ Avha vha no ḓiita vha si na vhufhura, vha tshi zwi vhona vha a tshenuwa; vha si na mulandu vha tshi vhona nṋe muvhi, vha a dinalea.

⁹ Naho zwo ralo, a no thetshelesa Mudzimu ha pambuwi nḓilani yawe; wa zwanḓa zwi si na tshika u ḓi wana nungo a tshi ya.

¹⁰ Hone naho inwi na ḓa noṱhe na ima phanḓa hanga, a thi nga wani muṱali na muthihi kha inwi.

¹¹ Maḓuvha anga o fhela; hu maano anga, hu zwine mbilu ya tama, zwoṱhe zwo pfuvha.

¹² Khonani dzanga dzi tshi vhona vhusiku dzi ri ndi masiari; vha tshi vhona swiswi vha ri ḽi vho tsha.

¹³ Ndi kha ḓi lavhelelani? Hayani hanga ndi tshalo, hune nda ḓo adza thovho yanga swiswini.

¹⁴ Tshalo ndi ḓo ri ndi tshone khotsi anga, mme anga na khaladzi anga ndi mbungu.

¹⁵ Zwino fulufhelo ḽanga ḽi ngafhi-ha? Ndi nnyi ane a ḽi vhona?

¹⁶ Kani ḽi ḓo ntevhela ndi tshi tsela vhudzulavhafu? Ri ḓo dzhena roṱhe buseni?