JOBO 16 - BIVHILI KHETHWA Mafhungo Madifha

Jobo: “Mudzimu o nkhakhela; ṱhanzi yanga ndi Ene!”

^1-2 Ndo no ḓi pfa manzhi o raloho. Inwi ni tshi ri ni a nkhuthadza, ndi hone ni tshi nkula nungo.

³ Nṋa ni tshi ravhaḓa ni ḓo sokou ela ni sa gumi? Ni dinwa ngani ni tshi vhuya na fhindula?

⁴ Arali no vha ni tshi nga nṋe, nṋe ndi tshi nga inwi, ndo vha ndi tshi ḓo ḓi amba zwoṱhe zwine na amba. Ndo vha ndi tshi nga ḓi ni shoshela nga maipfi, nda ni dzungudzela ṱhoho nga lunyadzo.

⁵ Ndo vha ndi tshi ḓo amba a u ni khwaṱhisa, hone i si vhe khuthadzo ya mulomo fhedzi.

⁶ Ndi tshi amba a zwi mpfarisi tshithu, na u fhumula a zwi dzikisi vhuṱungu hanga.

⁷ Mudzimu, wo nṱahadza, wo lozwa muṱa wanga;

⁸ wo nzhongondedza nda sala ndi mukumba na marambo, ndi zwine vhathu vha ri ndi na mulandu.

⁹ Wo nthathekanya wo sinyuwa; u tshi mmbona u shenganya maṋo nga mbiti; u tou nnzwondolola wa nnyita swina.

¹⁰ Vhathu vha a nnzhonzhowedza, vha ntshata mpama nga lunyadzo, vha a nthathedza.

¹¹ Mudzimu o nkumedza mavemu; o mposela vhavhi, vha mpfara vhe ndwa.

¹² Ndo vha ndi tshi tshila nga mulalo, a mpfara nga mikulo, a nndevha nde mbala; u nnyita tshipfuliwa,

¹³ a mposa nga misevhe thungo dzoṱhe, a ita tshiṱuhu a mpfula tswio, a shululela ndulu yanga fhasi;

¹⁴ u nkhuvhadza a dovha; u nngwela unga muhali.

¹⁵ Ndi khou lila: ndo rungelela saga nṱha ha lukanda lwanga; ndi khou tsumbudzea mavuni.

¹⁶ Ndo lila nda tswukisa maṱo; maṱo anga o swifhala.

¹⁷ Ndo pfalwo ndi si na mulandu wa vhuvemu, na thabelo yanga i si na muhoyo.

¹⁸ Iwe ḽifhasi, u songo fukedza malofha anga; mukosi wanga kha u ḓi pfala.

¹⁹ Ṱhanzi yanga i makoleni, i ima na nṋe i henengei ṱaḓulu.

²⁰ Khonani dzanga dzi a nngoḓa; Mudzimu Ene u vhona miṱodzi yanga i tshi tevhuwa.

²¹ Ndi ṱoḓa wa u mphuphuthela kha Mudzimu, a nga muthu a tshi phuphuthela khonani yawe. A songo lenga.

²² Hu tshee ho sala miṅwaha i si gathi, ndi ḓo ṱuwa ndi tshi fara lwendo, nda ya hu sa humiwi.