JOBO 15 - BIVHILI KHETHWA Mafhungo Madifha

Khonani ya u thoma: “Ni songo ḓiita tshilayavhakulu.”

¹ Elifasi wa Themana:

² Jobo, a no ngo amba tshithu; a hu na na muṱali na muthihi a no amba zwi sa pfali unga inwi,

³ a ḓilamulela nga maipfi a sa ambi tshithu, a sokou anza nyambo i si na mushumo.

⁴ Ni ita uri vhathu vha si tsha ofha Mudzimu, vha mu nyadze.

⁵ Vhuvhi haṋu vhu pfala nga zwine na amba; ni khou dzumbama nga vhukwila.

⁶ A si nṋe a no khou ni laṱa, inwi muṋe ni khou laṱwa nga maipfi aṋu, ṱhanzi i no ni laṱa ndi mulomo waṋu.

⁷ Kani o rangaho u bebwa ndi inwi? Mudzimu a tshi vhumba dzithavha no vha ni hone?

⁸ Kani no zwi pfa a tshi dzudzanya zwoṱhe? Vhuṱali vhu na inwi ni noṱhe kani?

⁹ Zwoṱhe zwine na zwi ḓivha, riṋe a ri zwi ḓivhi-vho? Ndi ifhio nḓivho yaṋu ine ri si vhe nayo?

¹⁰ Ro guda vhuṱali kha vhakalaha vho tshenaho mmvi, vha re na makole a no fhira a khotsi aṋu.

¹¹ Mudzimu a tshi ni khuthadza ni zwi nyadzelani? Hufha ro mu ambela nga maipfi a vhulenda.

¹² Mbilu yaṋu i ni isa kule; ni ri lavhelesa no sinyalala.

¹³ Ni sinyutshela Mudzimu, na shulula maipfi o raliho!

¹⁴ Ndi nnyi wa mbilu yo ṱambaho? O bebwaho nga musadzi ndi nnyi a re muvhuya?

¹⁵ Hufha Mudzimu na vharuṅwa vhawe a sa vha fulufhedzi, na vha ṱaḓulu a tshi vha sedza u vhona mbilu dzavho dzi songo ṱamba;

¹⁶ muthu ene, Mudzimu a nga mu vhona o ṱamba hani? Hufha a tshi nengisa, o tshinyala, a tshi tshinya a sa zwi pfi, zwa nga ndi u nwa maḓi.

Elifasi: “Mudzimu ha litshi u rwa muvhi.”

¹⁷ Zwino thetshelesani ndi ni funze; ndi ḓo ni vhudza zwe nda vhona nga anga maṱo.

¹⁸ Vhaṱali vho mpfunza ngoho ye vha pfa nga vhokhotsi avho, a vho ngo vhuya vha dzumba zwiphiri.

¹⁹ Shango ḽo vha ḽi tshee ḽavho vhe vhoṱhe, vhá songo vangana na vhannḓa.

²⁰ Muvhi u kandeledza vhaṅwe, hone u dzula nga nyofho vhutshilo hawe hoṱhe, nga u ḓivha uri a nga si pfuke ḓuvha ḽawe.

²¹ Nḓevheni dzawe hu dzula hu tshi pfala mikosi i ofhisaho; a tshi tou ri, ndi a ḓiphiṋa, mavemu a a mu wela.

²² Ha fulufheli uri u ḓo vhuya a ponyoka swiswi; tshawe hu ḓo vha u ḽiwa nga pfumo;

²³ maanga o lindela tshitumbu tshawe; u a ḓivha uri o lindelwa nga swiswi;

²⁴ u ofhiswa nga khombo na maṱungu, zwa mu wela unga khosi khulu i tshi yo dia.

²⁵ Munna ane a sumba Mudzimu nga vili, a imedzana na Ramaanḓaoṱhe, o livhiwa nga zwenezwo.

^26-27 O angula, a bva na tshiḽelo, ndi zwine a vho omisa mutsinga, a takusa tshiṱangu tshawe, a gidimela u yo lwa na Mudzimu.

²⁸ Ndi ene munna we a yo dzula matumbani, a dzhia nnḓu dzo ṱutshelwaho nga vhaṋe vhadzo, marubi e a phusukanywa a pfi a songo tsha vuswa, ene a a vusa a sa londi uri o teketelwa nga Mudzimu.

²⁹ A nga si tsha pfuma a ya thambo; thundu yawe a i tsha ḓo vha hone; thakha yawe a i tsha ḓo ḓala shango.

³⁰ Swiswi ha nga ḽi ponyoki; u ḓo nga muri une matavhi awo a swa nga mulilo; u ḓo hwalwa nga mufemo u bvaho mulomoni wa Mudzimu.

³¹ Ane a ḓifhura nga u fulufhela mahandana, u ḓo pfufhiwa nga one mahandana.

³² U ḓo nga davhi ḽine ḽi si tsha ḓo ṱuma lurere, a puta tshifhinga tshawe tshi sa athu swika.

³³ U ḓo nga munḓirivhe u no moḓisa magaga, a nga muolivi une wa fhufhura maluvha.

³⁴ A nyadzaho Mudzimu u ḓo shaya vhana; mahaya o fhaṱwaho nga tshanḓanguvhoni a ḓo tou lore.

³⁵ Ndi vhone vha no vhifha muvhilini nga vhunwa, vha beba vhuvhi, vha wana vho ḓifhura.