JOBO 14 - BIVHILI KHETHWA Mafhungo Madifha

Jobo: “Vhutshilo ha muthu a vhu yi thambo.”

¹ Muthu o bebwaho nga musadzi u tshila maḓuvha a si gathi, ha wani mulalo;

² u ri u aluwa a mbo ḓi puta unga dzuvha; u fhira nga luvhilo unga murunzi u tshi vhuya.

³ Mudzimu, tshithu tsho raloho u tshi londelani? U ḓidinelani nga u nnyisa tsengoni wa nkhaṱhula?

⁴ Hufha u tshi ḓivha uri muthu ndi muri u vhavhaho, a nga aṋwa hani mitshelo i ḓifhaho?

⁵ Maḓuvha a vhutshilo ha muthu a dzula o vhalwa, na miṅwedzi ine a ḓo tshila; Iwe wo mu vhetshela mikano, a nga si i pfuke.

⁶ Lavhelesa thungo, u mu litshe, ḽi kovhele zwaḽo e mutholiwa.

⁷ Muri wó reṅwa u a ḓi vha na fulufhelo; u a vuwa wa mela maḓadzwane.

⁸ Nangwe midzi yawo yo no vha ya kale, tshiguthe tshawo tshó no fela mavuni,

⁹ wá wana maḓi u a simuwa, wa ṱuma lurere unga tshimela tshiswa.

¹⁰ Muthu ene a fa zwo fhela; u ri u fa a yafhi?

¹¹ Milambo i nga vhuya ya xa, lwanzhe lwa vhuya lwa oma,

¹² muthu a sa athu vuwa tshee a fa. Lutombo lu tshi kha ḓi vha hone a nga si vuwe; a nga si vhuye a tsukunyea o eḓela.

¹³ Ngavhe u tshi nnzumba vhudzulavhafu, nda dzumbama mbiti dzau dza vhuya dza dzika, wa konou vhea ḓuvha ḽine wa ḓo nnyelelwa ngaḽo.

¹⁴ Huno muthu a fa u a dovha a tshila naa? Maḓuvha oṱhe ndi tshee ndo hwala hoyu muhwalo ndi ḓo lindela ndi vhuye ndi rulwe.

¹⁵ Ndi hone u tshi ḓo mmbidza nda aravha, wa takadzwa nga nṋe tshisikwa tshau.

¹⁶ Zwenezwo u ḓo ri u tshi londa vhuṱala hanga, wa si tsha londa he nda bvisa mulenzhe nḓilani.

¹⁷ Vhutshinyi hanga u ḓo vhu shatela khalini, wa tiba vhuvhi hanga.

¹⁸ Thavha dzi a ḓi korea dza wa, nngwa dza sudzuluswa vhudzuloni hadzo,

¹⁹ maḓi a ṱahadza matombo, mvula dza mikumbela dza kumba mavu; na zwe vhathu vha fulufhela, Iwe u zwi lozwa nga u ralo, vha fulufhuwa.

²⁰ U kuyekanya muthu a si tsha vha hone, wa rivhisa tshifhaṱuwo tshawe a fa.

²¹ Vhana vhawe vha sala vha tshi huliswa, ene a si zwi ḓivhe; nangwe vha tshi shoniswa, a si zwi pfe.

²² Tshine a tshi pfa ndi vhuṱungu ha muvhili wawe na u vhavha ha mbilu yawe.