JOBO 13 - BIVHILI KHETHWA Mafhungo Madifha

Jobo: “Ngavhe ndi tshi livhana na Mudzimu tsengoni!”

¹ Zwoṱhe zwine na amba ndo no ḓi zwi vhona, ndo no ḓi zwi pfa, ndo no ḓi zwi ṱalukanya.

² Zwine na zwi ḓivha, na nṋe ndi a zwi ḓivha, a ni mphiri.

³ Nṋe a thi khou amba na inwi, ndi khou amba na Ramaanḓaoṱhe, ndi ṱoḓa u hanedzana na Mudzimu.

⁴ Inwi ni pila u shaya nḓivho haṋu nga mazwifhi; noṱhe ni dziṅanga dzi sa fhodzi muthu.

⁵ Ngavhe ni tshi ḓifhumulela zwaṋu, vhathu vho vha vha tshi nga ḓo ḓi ri no ṱalifha.

⁶ Thetshelesani ndi tshi hwedza mulandu wanga, ni pfe vhuṱanzi hanga.

⁷ Ni zwifhelani? Nṋa ni nga ambela Mudzimu nga mazwifhi?

⁸ Ni nga ri ni tshi ambela Mudzimu na ita tshiṱalula? Ndi nnyi we a ri ni mu sengele khoroni?

⁹ Arali a ṱola mbilu dzaṋu a nga wana tshivhuya? Ni vhona unga ni nga mu fhura unga ni tshi fhura vhathu?

¹⁰ Nangwe tshiṱalula tshaṋu tsho dzumbama, ha nga litshi u ni kaidza.

¹¹ Vhuhulu hawe a vhu ni ofhisi? Ni tshi mu elekanya a ni tetemeli?

¹² Mirero yaṋu ndi milora, i fhufha na muya; nyambo yaṋu i ṋoka unga vumba.

¹³ Ni tshete ndi ambe; zwi nngwelaho kha zwi nngwele.

¹⁴ Ndi ḓo luma mbilu nda amba, naho ndi tshi khou dembelela nga lwatsi.

¹⁵ Nangwe Mudzimu a tshi ḓo mmbulaha – ndi tshee ndo lavhelela Ene uri ndi livhane nae tsengoni.

¹⁶ Nda ralo ndi nga tshidzwa; muvhi ha livhani na Mudzimu.

¹⁷ Zwino thetshelesani ndi ṱalutshedze; kolongonyani nḓevhe dzaṋu ni pfe.

¹⁸ Ndo lindela u ḓisengela, hufha ndi tshi ḓivha uri ndi ngohoni.

¹⁹ Ha ḓa ane a ḓo livhana na nṋe tsengoni, a mphindula, ndi ḓo fhumula nda ḓifela.

²⁰ Mudzimu, litsha ndi humbele zwithu zwivhili, ndi hone ndi sa ḓo u dzumbama:

²¹ Nkhumele! U songo mmbulaha nga nyofho!

²² Nkhwelele, ndi ḓo fhindula, kana nṋe ndi ambe, Iwe u fhindule.

²³ Vhuvhi hanga ndi vhufhio? Ndo tshinyani? Ndi pomokelwani? Ntsumbedze vhutshinyi hanga!

²⁴ Khefha u tshi nnzumbama wa nnyita swina ḽau?

²⁵ U nga endela u shushedza ṱari ḽi fhufhaho nga muya? U nga pandamedza mathukhwi?

²⁶ U mmbetshela ṱhamu i vhavhaho, wa nthwela zwe nda ita ndi tshee muṱuku.

²⁷ Wo mpata milenzhe nga tshipato; u sedza zwoṱhe zwine nda ita, wa londa vhuṱala hanga.

²⁸ Ndi zwe nda ṱahala unga vongori, nda nga nguvho yo ḽiwaho nga tsole.