JOBO 12 - BIVHILI KHETHWA Mafhungo Madifha

Jobo: “Mudzimu u ita zwine a funa.”

^1-2 Vhukumakuma hu tshi pfi vhathu, hu ambiwa inwi! Na fa, vhuṱali ho fa!

³ Hone na nṋe ndi na ṱhalukanyo ine na vha nayo; a ni mphiri. Ndi nnyi a sa ḓivhi zwe na amba?

⁴ Zwino ndi vho sewa na nga khonani dzanga; vha ntsea nangwe ndi sa solisei, ndi si na mulandu, ndí muthu wa u rabela, Mudzimu a tshi ḓi mphindula.

⁵ Inwi a ni na tshi ni dinaho, ni tamba nga nṋe a no tambula; ni raha muthu a no khou redzemuwa;

⁶ hone mavemu vha a ḓiphiṋa; vha no kolela Mudzimu a vha ofhi tshithu, hufha Mudzimu vho mu kona.

⁷ Edzonu vhudzisa dziphukha, dzi ḓo ni funza; na zwiṋoni zwi ḓo ni vhudza;

⁸ ambani na ḽifhasi, ḽi ḓo ni laya; litshani khovhe dza lwanzheni dzi ni anetshele.

⁹ Tshivhumbwa tshi sa ḓivhi uri zwo vhumbwa nga tshanḓa tsha Muṋe washu, ndi tshifhio?

¹⁰ Ene u londola vhutshilo ha zwisikwa zwoṱhe; vhutshilo ha vhathu vhoṱhe vhu zwanḓani zwawe.

¹¹ Lulimi lu thetshela zwiḽiwa; tsha nḓevhe ndi u ṱanḓulukanya maipfi.

¹² Vhuṱali vhu na ṱhoho tshena; ndalamo i ḓisa ṱhalukanyo;

¹³ hone vhuṱali vhukuma na maanḓa ndi zwa Muṋe washu; nyeletshedzo na ṱhalukanyo ndi zwawe.

¹⁴ Ene a phusukanya, ndi nnyi ane a nga dovha a fhaṱa? A vhofha muthu, a nga vhofhololwa nga nnyi?

¹⁵ A fara mvula, hu vha na gomelelo; a vulela maḓi, a kumba shango.

¹⁶ Maanḓa ndi awe, ha kundwi nga tshithu; hu mufhurwa, hu mufhuri, vhoṱhe vha langwa ngae.

¹⁷ Vhaeletshedzi vha khosi u vha bvula navhula a vha isa vhuthubwani, vhahaṱuli a vha tsilufhadza.

¹⁸ Mahosi u vha bvula lupila, a vha ambadza tsindi ya phuli.

¹⁹ Vhotshifhe u vha bvula navhula a vha isa vhuthubwani, a tupula vho ṱokaho midzi kale.

²⁰ Vhomakone vha nyambo u vha ita zwimuma, vhakalaha a vha dzhiela ṱhalukanyo.

²¹ Vhahulwane u vha nisela ṱhoni, a kula nungo dza vha maanḓa.

²² U dzumbulula zwi re ngomu-ngomu swiswini, swiswi ḽihulu a ḽi bvisela tshedzani.

²³ U fhaṱa dzitshakha dza vha na bvumo, a fhedza nga u dzi furalela dza lovha.

²⁴ Vharangaphanḓa vhadzo u a vha tsilufhadza, vha tendeleka sogani vhó ḓaḓa, vha xela,

²⁵ vha phuphudzika swiswini, vha pepeleka unga zwidakwa.