JOBO 11 - BIVHILI KHETHWA Mafhungo Madifha

Maipfi a khonani ya vhuraru: “Mudzimu ha khakhi, ndi inwi no tshinyaho.”

¹ Tsofara:

² A hu na ane a nga fhindula mafhafhaḓo aya? Kani u ravhaḓa ndi hone hune ha ṱanzwa muthu mulandu?

³ Jobo, ni vhona unga u lopola haṋu hu nga ri runga milomo? Ni vhona unga ni tshi nzhonzhowedza a ri koni u ni kaidza?

⁴ Ni ri zwine na amba ndi ngoho? Na ri no ṱamba maṱoni a Mudzimu?

⁵ Ngavhe Mudzimu Ene muṋe a tshi ni fhindula, a amba a ni kaidza.

⁶ O vha a tshi ḓo ni dzumbululela zwiphiri zwa vhuṱali, na konou ṱalukanya uri zwi kanukisa hani. Ḓivhani uri Mudzimu u khou ni rwa nga ṱhamu ṱhukhu.

⁷ Zwiphiri zwa Mudzimu ni nga zwi swikela naa? Hune Ramaanḓaoṱhe a guma ni nga hu hovhelela naa?

⁸ Zwo hula u fhira makole – inwi ni nga itani? Zwo tsisa u fhira vhudzulavhafu – inwi ni ḓivha mini?

⁹ Zwo hula u fhira ḽifhasi; zwo ṱanḓavhuwa u fhira lwanzhe.

¹⁰ Arali Mudzimu a ni fara a ni isa tsengoni, ndi nnyi ane a nga mu dzivhisa?

¹¹ Ene u ḓivha u sa ḓivhalea ha vhathu; u vhona vhuvhi havho hoṱhe, á songo vhuya a sedzesa.

¹² Madodo a ḓo thoma u ṱalifha mbiḓi dzi tshi vho dzwala vhathu.

¹³ Vhuedzedzani mbilu yaṋu vhudzuloni; luvhani Mudzimu;

¹⁴ laṱani vhuvhi vhu re zwanḓani zwaṋu; hayani haṋu ni songo tendela vhutshinyi;

¹⁵ ndi hone ni tshi ḓo ḓipfa ni si na valuvalu, na ḓo ima no khwaṱha ni sa ofhi tshithu;

¹⁶ ndi hone maṱungu aṋu oṱhe a tshi ḓo fhufha, ni tshi a elelwa na vhona a tshi nga mikumbela ye ya ela ya fhira;

¹⁷ ndi hone vhutshilo haṋu vhu tshi ḓo nga tshedza, ha fhira ḓuvha ḽi vhukati ha ṱhoho, swiswi ḽa nga mapfuvhi a tshi tswuka.

¹⁸ Ni ḓo pfa ni na fulufhelo ni sa ofhi tshithu; ni tshi sedza zwa muḓi waṋu ni ḓo wana zwoṱhe zwo naka, na yo lala no rudza mbilu,

¹⁹ na eḓela ni sa ofhi swina; vhathu vhanzhi vha ḓo ni luvhelela.

²⁰ Vhavhi vhone vha ḓo pfa vho kulea nungo; a vha nga wani nzanyo ya u ponyoka vha shavha, tshavho hu ḓo vha u tou lindela lufu.