JOBO 10 - BIVHILI KHETHWA Mafhungo Madifha

Jobo: “Mudzimu o dzula o nkhwesa mulandu.”

¹ Ndo neta nga vhutshilo. Litsha ndi gungule, ndi khou ḽa mbilu!

² Ndi ri, Mudzimu, u songo mmbea mulandu; edzou mmbudza: Ndo tshinyani?

³ Ndi zwavhuḓi u tshi nkandeledza, u tshi nyadza tshe wa tshi vhumba? Vhavhi vhone vha tshi luka vhunwa, u a zwi takalela naa?

⁴ U sedza zwithu unga muthu naa? U vhona unga muthu wa ṋama naa?

⁵ Vhutshilo hau ndi vhupfufhi unga ha muthu naa? Miṅwaha yau i nga ya muthu kani,

⁶ zwine wa vhuya wa londolosa vhuvhi hanga, wa zwima vhukhakhi hanga hoṱhe?

⁷ Hufha u tshi ḓivha uri a thi na mulandu, na uri a hu na ane a nga nndamukisa zwanḓani zwau.

⁸ Ndo vhumbwa nga zwanḓa zwau, hone zwino zwenezwo zwanḓa zwi vho nndozwa tshoṱhe.

⁹ U songo hangwa uri wo mmbumba nga vumba; kani u vho ṱoḓa u nkuya nda vhuelela buseni?

¹⁰ Ndi Iwe we wa ṋea khotsi anga nungo uri vha ntsike, wa nnyalusa muvhilini wa mme anga.

¹¹ Wo vhumba muvhili wanga nga marambo na tsinga, marambo wa a ambadza ṋama na lukanda.

¹² Wo nṋea vhutshilo, wa mpfuna nga lufuno lu sa dzinginyei, wa nndondola nda ḓi tshila.

¹³ Hone zwino ndi vho ḓivha uri matsina wo vha u na tshimbevha:

¹⁴ Wo vha u tshi khou sedza uri ndi nga si khakhe naa, wa ḓo konou mpfara nga mbilu.

¹⁵ Nda tou tshinya, u a ntambudza, hu uri nda ita zwivhuya, a thi wani tshithu. Ndo nyadziwa tshoṱhe, ndo mbwandamela maṱunguni.

¹⁶ Zwa nnakela, u nndodela unga ndau, wa vhuya wa ita na maḓembe u tshi ṱoḓa u mmbaisa.

¹⁷ U dzula u tshi nṱoḓela ṱhanzi dza u mpomoka; u ntsinyutshela hau hu ḓi hulela hu tshi ya; vhahali vhau a vha nkhumeli, vha sielisana u nkovhola.

¹⁸ Mudzimu, wo itelani uri ndi bebwe? Ngavhe ndi fe ndi sa athu vhonwa nga muthu,

¹⁹ u bva thumbuni nda dzhena tshaloni! Zwi ḓi fana na u sa bebwa.

²⁰ Maḓuvha anga a ho ngo sala a si gathi kani? Nṱutshele, litsha ndi ḓiphiṋenyana,

²¹ ndi sa athu ya hune nda si tsha ḓo vhuya, shangoni ḽa swiswi ḽo touho bodo,

²² ḽa swiswi na mirunzi, hu si na tshedza tsha ḓuvha, hune tshedza tshaho tsha vha swiswi.