JEREMIA 9 - BIVHILI KHETHWA Mafhungo Madifha

¹ Ngavhe ṱhoho yanga i tshisima tsha maḓi, maṱo anga e tshisima tsha miṱodzi. Ndo vha ndi tshi ḓo lila vhusiku na masiari, ndi tshi lilela vhathu vha hashu vhe vha vhulawa nndwani.

² Ngavhe ndi tshi nga wana thumba ya vhaendi ngei sogani, ndo vha ndi tshi ḓo ṱutshela vhathu vha hashu nda yo dzula hone nda vha kule navho. Vhoṱhe ndi dziphombwe, ndi gogo ḽa zwifheṱi.

³ Ndimi dzavho vha dzula vho dzi gudisa u zwifha, dzi pfula unga vhura, shangoni a hu vhusi ngoho, hu vhusa u sa fulufhedzea. Muṋe washu u ri, “Vhathu vhanga vha ita vhuvhi vha dovha, Nṋe vha a nndandula.

⁴ Thanyelani khonani dzaṋu, na vhana vha mme aṋu ni songo vha fulufhedza. Ṅwana wa mme au muṅwe na muṅwe ndi Jakopo, mufhuri muṋe wa dzina, khonani iṅwe na iṅwe ndi munyefuli.

⁵ Khonani i fhura khonani; a hu na a no amba ngoho. Vho gudisa ndimi dzavho u zwifha; vha shandukelana lwa u tou ḓidina.

⁶ Vha pwanyeledzana vha dovha; vha phapha vhufhura nṱha ha vhuṅwe; Nṋe a vha nndondi,” u ralo Muṋe washu.

⁷ Nga zwenezwo, Muṋe washu Mulangazwoṱhe u ri, “Zwino-ha vhathu vhanga ndi ḓo vha bvisa malambelo nda vha linga. Vhathu vhanga vho tshinya, ndi tshini tshine nda nga kha ḓi ita?

⁸ Ndimi dzavho ndi misevhe i vhulahaho, vha amba zwa vhufhura fhedzi. Vha tshi amba na vhaṅwe vha na haṋwani ha u ḓifha, ngeno mbiluni vha tshi khou vha retshela zwikwekwe.

⁹ Ndi songo vha laṱisela zwenezwo naa? Lushaka lwo raloho ndi songo lu lifhedza naa? Ho amba Nṋe Yahavee.”

¹⁰ Ndo ri, “Ndi ḓo lilela dzithavha nda tou honḓa, nda vusa tshililo nga u vhona mafulo a phangani. Ho sala hu soga, a hu tsha fhira muthu, a hu tsha lila kholomo; zwiṋoni zwo fhufha zwa shavha, phukha dza ḓaka dzo pfuluwa.”

¹¹ Muṋe washu u ri, “Jerusalema ndi ḓo hu ita thulwi ya matumba, hu ḓo vha vhudzulo ha dziphunguhwe; miḓi ya Juda ndi i ita soga hu sa dzuli muthu.”

¹² Nda vhudzisa nda ri, “Ndi nnyi wa vhuṱali ane a nga ṱalukanya hezwi? Ndi nnyi we a laiwa nga Muṋe washu uri a ri vhudze? A ri vhudze uri ndi mini shango ḽo phusukanywa ḽa oma ḽa sala ḽi soga hu sa fhiri muthu.”

¹³ Muṋe washu a fhindula a ri, “Ndi nge vha furalela mulayo wanga we nda vha vhetshela; a vho ngo nthetshelesa, a vho ngo tevhedza mulayo wanga,

¹⁴ tshavho ho vha u tevhedza mbilu dzavho dza tshipimbi, vha rerelela Baali vha tshi tevhedza zwe vha funzwa nga vhokhotsi avho.

¹⁵ Zwenezwo Nṋe Yahavee Mulangazwoṱhe Mudzimu wa Israele ndi ri: Vhonani, vhathu havha ndi ḓo ita uri vha ḽe zwiḽiwa zwi kalakataho, vha nwe maḓi a re na mulimo.

¹⁶ Ndi ḓo vha balanganya na dzitshakha dzine he vhone he vhokhotsi avho vha si dzi ḓivhe, ndi ḓo vha pandamedza nga pfumo vha vhuya vha lovha vhoṱhe.”

Vhathu vha Jerusalema vha tshi lila u tikwa

¹⁷ Muṋe washu Mulangazwoṱhe u ri, “Elekanyani zwino! Vhidzani vhasadzi vha u lilela vhafu vha ḓe; hu ḓe vhomakone vhazwo.”

¹⁸ Litshani vha ṱavhanye u ḓa vha ri lilele, maṱo ashu a vhuye a tevhuwe miṱodzi, ya tou gubunyea.

¹⁹ Tsioni hu pfala tshililo, hu pfi, “Vhonani uri ro lozwiwa hani! Vhonani uri ro shona hani! Ro pfuluwa shangoni ḽa hashu, nnḓu dzashu dzo no vha matumba.”

²⁰ Nṋe nda ri, “Zwino inwi vhasadzi ipfani ipfi ḽa Muṋe washu, a tshi amba ni kolongonye nḓevhe. Funzani vhana vhaṋu tshililo; ni funzane mukosi wa lufu.

²¹ Lufu lwo ri dzhenela nga mafasiṱere, lwo dzhena pfamoni dzashu; lwo vhulaha vhana zwiṱaraṱani, na vhaṱhannga mikotoni.

²² Zwitumbu zwi ḓo sokou poswa hoṱhe-hoṱhe unga mathukhwi, zwi ḓo nga mavhele ane mukaṋi a ri u a kaṋa a a posa thungo, a si vhe na ane a a kuvhanganya. Ndi zwe Muṋe washu a nndaedza uri ndi ambe.”

²³ Muṋe washu u ri, “Muṱali a songo zuwa vhuṱali hawe, muhali a songo khoḓa vhuhali hawe, mupfumi a songo ṱongisa lupfumo lwawe.

²⁴ Ane a zuwa nga a zuwe hezwi: zwauri u a nnḓivha a nṱalukanya, ndi Nṋe Yahavee ane shangoni nda ita vhuthu, nda haṱula nga khaṱhulo mbuya, nda ita zwi re zwone zwi sa solisei; mazuwo eneo ndi one ane nda a takalela. Ho amba Nṋe Yahavee.”

²⁵ Muṋe washu u ri, “Hu khou ḓa maḓuvha ane nda ḓo laṱisa vhoṱhe vhe vha fumba muvhili fhedzi –

²⁶ vhathu vha Egipita na Juda na Edomo na Amoni na Muaba na vhoṱhe vha no vheula ṱhaha vha dzulaho phangani mashangoni a kule. Tshakha hedzo dzoṱhe a dzo ngo fumba zwa ngoho, Vhaisraele vhone a vho ngo fumba mbiluni.”