JEREMIA 48 - BIVHILI KHETHWA Mafhungo Madifha

Mafhungo a no amba Muaba

¹ Hu tshi ambiwa Muaba hu pfi: Muṋe washu Mulangazwoṱhe Mudzimu wa Israele u ri, “Muḓi wa Nebo u ḓo zwi vhona, u ḓo sala u matumba. Kiriathaimi u ḓo thubiwa wa shona; vhushavhelo vhu ḓo phusukanywa ha shona.

² Muaba a ḽi tsha ḓo khoḓwa; vhathu vha langana u ḽi phusukanya vhe Hesheboni vha ri, ‘Iḓani ri yo fhedza lushaka holuḽa.’ Na kha iwe Mademene a hu tsha ḓo pfala ipfi; pfumo ḽi ḓo u sala murahu.

³ Ipfani mikosi ya Horonaimi, ndi mikosi ya phusuphusu na ndozwo khulu.

⁴ Muaba ḽo phusukanywa; tshililo tshi pfala u swika Tsuara.

⁵ Vho fara nḓila ya Luhithi, vha enda vha tshi tswimila lu ṱungufhadzaho; nḓilani i no tsela Horonaimi hu pfala zwililo zwa vhuṱungu hu tshi lilelwa iyo ndozwo.

⁶ Shavhani! Gidimani ni sa ḓo fa; ni nge mbiḓi ya phangani.

⁷ Vhunga ni tshi fulufhela lupfumo lwaṋu na mitsheṱo ye na fhaṱa, na inwi ni ḓo thubiwa. Khemosho mudzimu waṋu u ḓo hwalwa wa iswa vhuthubwani khathihi na vhotshifhe vhawo na vhahulwane vhawo.

⁸ Miḓi yoṱhe i ḓo welwa nga mulozwi, a hu na na muḓi u no ḓo ponyoka. Govha ḽi ḓo phusukanywa, mudavhi u ḓo ṱangulwa. Ho amba Nṋe Yahavee.

⁹ Hashani muṋo masimuni a Muaba, uri a si tsha liṅwa; hu si kale ḽi ḓo vha soga; miḓi yaḽo i ḓo ṱutshelwa, ya si tsha dzula muthu.

¹⁰ “A sa iti mushumo wa Yahavee nga mbilu nthihi nga a teketelwe! Nga hu teketelwe a sa shululi malofha nga pfumo ḽawe!”

Muaba a ḽi tsha ḓo dzika

¹¹ “Muaba a ḽi athu vhuya ḽa iswa vhuthubwani; ḽo vha ḽo ḓi dzika u bva hanani haḽo, ḽi tshi nga waini yo dzikaho i songo shululwaho i tshi bva kha ino mvuvhelo ya shelwa kha iḽa; muḓifho waḽo u kha ḓi vha wonouḽa wa kale, u nukhelela haḽo a ho ngo shanduka.”

¹² Hone Muṋe washu u ri, “Hu khou ḓa misi ine nda ḓo ruma vhathu vha no shulula dzimvuvhelo, vha ḓo ḽi shulula vha pwasha madzhomela aḽo.

¹³ Zwenezwo Muaba ḽi ḓo shona nga Khemosho, unga nnḓu ya Israele yo shona zwiḽa vha tshi fulufhela Bethele.

¹⁴ “Ndi mini ni tshi ri, ‘Ri vhahali nndwani, govholanoni ri na tshivhindi, a ri ofhi tshithu’?

¹⁵ Muaba ḽi ḓo phusukanywa, vhaphusukanyi vhaḽo vha nḓilani; vhaṱhanngana vhavho vhone-vhone vha ḓo shidzhwa,” i ralo Khosi ine ya pfi Yahavee Mulangazwoṱhe.

¹⁶ “Muaba ḽi ḓo ṱuwa ḽi tshi fhalala; khombo yaḽo a i nga lengi u ḓa.

¹⁷ Inwi noṱhe no ḽi tangaho, noṱhe ni no ḓivha bvumo ḽaḽo, ḽi lileleni ni ri, ‘Yawee, luḓo lwa maanḓa lwo vunḓea, muvhuso wa vhugala wo phusukanywa!’ ”

Ndaela ya vho ponyokaho

¹⁸ “Inwi vhathu vha Diboni, itsani kha vhugala haṋu, dzulani fhasi mavuni o omaho; mulozwi wa Muaba u ḓo ni ḓela, a phusukanya miḓi yau ya vhushavhelo.

¹⁹ Inwi ni no dzula Aruere, imani gondoni ni sedze. Vhudzisani vhanna vha no khou shavha na vhasadzi vha ponyokaho ni ri, ‘Ho iteani?’

²⁰ Vha ḓo fhindula vha ri, ‘Muaba ḽo phusukanywa ḽa shona.’ Honḓani ni tou ṱavha mukosi! Ḓivhadzani mulamboni wa Arinoni uri Muaba ḽo phusukanywa.

²¹ “Khaṱhulo yo ḓa miḓini ya zwivhangani: Holoni na Jahasa na Mifaathi,

²² Diboni na Nebo na Bethe Dibulathaimi,

²³ Kiriathaimi na Bethe Gamulu na Bethe Mioni,

²⁴ Keriotho na Botsora. Khaṱhulo yo ḓela miḓi yoṱhe ya Muaba, ya kule na ya tsini.

²⁵ “Nungo dza Muaba dzo kulea, tshanḓa tshaḽo tsho vunḓea,” u ralo Muṋe washu.

Muaba ḽi ḓo goḓiwa

²⁶ “Ḽi kambiseni, ḽo nyadza Yahavee. Muaba nga ḽi vhumbuluwe maṱanzani aḽo; vhathu nga vha ḽi shonedze.

²⁷ Israele wo vha u sa khou ḽi shonedza naa? Kani ḽo vha ḽo farwa na mafobvu, hezwi u tshi ḽi nyadza wa ita na u dzungudza ṱhoho misi yoṱhe u tshi ḽi amba?

²⁸ Inwi ni dzulaho Muaba, ṱutshelani miḓi yaṋu ni yo dzula dzinngwani. Ni nge ḽiivha ḽi no fhaṱa tshiṱaha tshaḽo mulomoni wa bako.”

Hu tshi lilelwa Muaba

²⁹ “Ro zwi pfa uri Muaba ḽi a ḓihudza! Ḽi ḓihudza lwa u kalula, ḽi a ḓipfa, ḽi a ḓigagamisa, ḽi a ḓiḓivha, ḽi na mbilu ya u ṱonga.

³⁰ Ndi ḓivha swili yaḽo, hone i ḓo pfuvha, mazuwo aḽo ndi mahandana,” u ralo Muṋe washu.

³¹ “Ndi zwine Muaba nda ḽi lilela, ndi tou honḓa ndi tshi honḓela Muaba ḽoṱhe, vhathu vha Kiri Herese ndi vha pfela vhuṱungu.

³² Inwi minḓirivhe ya Sibima, ndi ni lilela unga Jazere u tshi lila. Matavhi aṋu o adza a swika lwanzheni; a guma nga Lwanzhe lwa Muṋo henengei Jazere. Mitshelo yaṋu na nḓirivhe dzo vhibvaho zwo welwa nga mulozwi.

³³ Mirini ya mitshelo na masimuni a Muaba a hu tshee na dakalo na mifhululu. Ndo kaṱudza waini i no ela i tshi bva bonḓeloni; a hu na ane a dzi suka o takala a tshi fhululedza.

³⁴ “Mukosi wa tshililo tshavho u a hulela, u ṱavhiwa Hesheboni wa pfala Eliali na Jahatsi, wa ṱavhiwa Tsuara wa pfala Horonaimi na Eligathi Shelishiya. Na maḓini a Nimirimu muḓi wo phusukanywa.

³⁵ Kha ḽa Muaba ndi ḓo fhelisa vha no gonya zwivhanga vha yo ṋekedza zwiṱhavhelo, vha dubisela midzimu yavho zwioro,” u ralo Muṋe washu.

³⁶ “Mbilu yanga i lilela Muaba unga tshiṱiringo; i lila unga tshiṱiringo i tshi lilela vhathu vha Kiri Herese. Lupfumo lwe vha lu kuvhanganya lwo ṱuwa.

³⁷ Ṱhoho dzoṱhe dzo palulwa, ndebvu dzoṱhe dzo vheulwa, zwanḓa zwoṱhe zwo tshetshekanywa, khundu dzoṱhe dzo pilwa nga saga, u sumbedza u ṱungufhala.

³⁸ Zwiludzani zwa dzinnḓu kha ḽa Muaba na mikotoni yaho ndi zwililo fhedzi, Muaba ndo ḽi vunḓa unga dzhomela ḽi sa ṱoḓwi nga muthu,” u ralo Muṋe washu.

³⁹ “Ḽo pwashea ḽa balangana! Vha honḓa hani! Muaba ḽo furalela ḽó furalela ḽó shona! Muaba ḽi a shonedzwa, vhoṱhe vho ṋekanaho masakha naḽo vha a ḽi nyala.”

Muaba a ḽi na vhushavhelo

⁴⁰ Muṋe washu u ri, “Vhonani! Hu khou kavha goni, ḽi ṱharamudza phapha ḽa godimela Muaba.

⁴¹ Miḓi i ḓo thubiwa, ni ḓo dzhielwa vhushavhelo. Musi wonoyo mbilu dza vhahali vha Muaba, dzi ḓo nga mbilu ya musadzi a tshi ṱoḓou vhofholowa.

⁴² Muaba ḽi ḓo phusukanywa, vhathu vhaḽo a vha tsha ḓo vha lushaka, nge vha nyadza Nṋe Yahavee.

⁴³ No lindelwa nga zwi ofhisaho na dindi na mulavhu inwi vhathu vha Muaba,” u ralo Muṋe washu.

⁴⁴ “Ane a vhuya a shavha izwo zwi ofhisaho u ḓo wela dindini, ane a gonya a bva dindini u ḓo fashwa nga mulavhu; Muaba ndi ḓo ḽi ḓisela ṅwaha wa ṱhamu yaḽo,” u ralo Muṋe washu.

⁴⁵ “Tshavhi dzi ima murunzini wa Hesheboni dzó kulea nungo. Hesheboni ho bva mulilo, tshivhindini tsha Sihoni ho bva khavhu ya mulilo; i fhisa mivhombo ya Muaba, i fhisa madethele a vhadziamazuwo.

⁴⁶ Iwe Muaba u ḓo zwi vhona! Vhathu vha Khemosho vho lozwiwa; vhaṱhannga vhau vho hwaliwa vha iswa vhuthubwani, vhananyana vhau vho thubiwa.

⁴⁷ Naho zwo ralo misi i ḓaho ndi ḓo dovha nda ladza ḽa Muaba,” u ralo Muṋe washu. Khaṱhulo ya Muaba i guma henefha.