JEREMIA 47 - BIVHILI KHETHWA Mafhungo Madifha

Mafhungo a no amba Vhafilista

¹ Ngeḽi ipfi ḽa Muṋe washu ḽe ḽa ḓa ha muporofita Jeremia ḽi tshi amba Vhafilista zwiḽa Farao a sa athu dia Gaza, ḽi ri:

² Muṋe washu u ri, “Maḓi ngeaḽaa a khou fhufhuma a tshi bva devhula; a ḓo ḓadza milambo ya fhalala ya kumba zwoṱhe. A ḓo tiba shango na zwoṱhe zwi re khaḽo, miḓi na vha no dzula khayo. Vhathu vha ḓo ṱavha mukosi; vhoṱhe vha no dzula shangoni vha ḓo ongolela

³ vha tshi pfa mutsindo wa bere dzi tshi gada, vha tshi pfa phosho ya gariki dza maswina na u kunguluwa ha malinga. Vhokhotsi a vha nga rembuluwi vha farisa vhana vhavho; zwanḓa zwavho zwi ḓo kulea nungo zwa nembelela.

⁴ Ḓuvha ḽa u lozwa Vhafilista ḽo swika, ḽa u vhulaha tsalela dzoṱhe dza vhathu vhane vha nga farisa Tiro na Sidoni. Yahavee u ḓo ṱuwa a tshi lozwa Vhafilista, dzone tsalela dza vhathu vha no bva khunzikhunzini dza Khrita.

⁵ Muḓi wa Gaza u ḓo ṱungufhala wa palula ṱhoho; Ashkeloni a hu tsha ḓo pfala ipfi. Inwi tsalela dza vhathu vha mudavhini ni ḓo lila na tou ḓitshetshekanya u swika lini?

⁶ Ni a lila na ri, ‘Yawee, pfumo ḽa Yahavee! U ḓo litsha lini u runga? Humela kha mukutu wau u awele u tshetee!’

⁷ Huno ḽi nga awela hani ḽó ruṅwa nga Yahavee, Ene ó ḽi vhudza uri ḽi die Ashkeloni na khunzikhunzi?”