JEREMIA 43 - BIVHILI KHETHWA Mafhungo Madifha

Vhathu vha tshi shavhela Egipita

¹ Musi Jeremia a tshi fhedza u vhudza vhathu maipfi oṱhe a Muṋe washu Mudzimu wavho – zwoṱhe zwe Muṋe washu a mu ruma uri a vha vhudze –

² Azaria ṅwana wa Hoshaya na Johanani ṅwana wa Karia na vhanna vhoṱhe vha u ḓihudza vha vhudza Jeremia vha ri, “U khou zwifha! Mudzimu Muṋe washu ho ngo u ruma u ḓa u amba uri ri songo ya Egipita ra yo dzula hone.

³ Ndi Barukhu ṅwana wa Neria ane a khou u luṱanya na riṋe uri u ri kumedze Vhababele vha ri vhulahe kana vha ri hwale vha ri ise vhuthubwani Babele.”

⁴ Huno Johanani ṅwana wa Karia na vhahulwane vha mmbi vhoṱhe na vhathu vhoṱhe vha nyadza zwe Muṋe washu a amba a tshi ri vha dzule shangoni ḽa Juda.

⁵ Johanani ṅwana wa Karia na vhahulwane vhoṱhe vha mmbi vha pfulusa tsalela dzoṱhe dza vhathu vha Juda vhe vha vha vho vhuelela u yo dzula shangoni ḽa Juda vha tshi bva kha tshakha dzoṱhe he vha vha vho balanganela hone –

⁶ vhanna na vhasadzi na vhana na vhananyana vha khosi vhe Nebusaradani mulangammbi a vha o vha sia na Gedalia ṅwana wa Ahikamu ṅwana wa Shafani, vha dzhia na muporofita Jeremia na Barukhu ṅwana wa Neria.

⁷ Vha swika Egipita nga u sa thetshelesa Muṋe washu vha vhuya vha swika Thaphanese.

Hu tshi pfi Nebukadanetsara u ḓo kunda Vhaegipita

⁸ Henengei Thaphanese ipfi ḽa Muṋe washu ḽa ḓa ha Jeremia ḽa ri,

⁹ “Dzhia maṅwe matombo mahulu u a fukedze vumbani luḓilanani lwo fhaṱwaho nga zwidina tshifhingoni tsha pfamo ya Farao fhano Thaphanese, u zwi ite Majuda vha tshi khou sedza.

¹⁰ Zwenezwo u vha vhudze u ri, ‘Yahavee Mulangazwoṱhe Mudzimu wa Israele u ri: Ndi ḓo vhidzisa muḓinḓa wanga Nebukhadnetsara khosi ya Babele, nda tea khuluṋoni yawe nṱha ha matombo haya e nda a bwela hafhano; u ḓo akha dennde yawe ya vhuhosi nṱha hao.

¹¹ U ḓo ḓa a dia Egipita, a vhulaha vho livhanywaho na lufu, a thuba vho livhanywaho na u thubiwa, vho livhanywaho na pfumo a vha runga nga pfumo.

¹² Ndi ḓo funga thembele dza midzimu ya Egipita nga mulilo; u ḓo fhisa thembele dza midzimu, yone a i hwala a i isa vhuthubwani. U ḓo ṱangula shango ḽa Egipita unga mulisa a tshi tanya nnda dza nguvho yawe, a ṱuwa hu si na tshi no mu thithisa.

¹³ Thembeleni ya Ḓuvha ngei Egipita u ḓo thutha phuphu dza midzimu, a fhisa thembele dza midzimu ya Egipita dze lore.’ ”