JEREMIA 40 - BIVHILI KHETHWA Mafhungo Madifha

Jeremia a tshi dzula Judia na Gedalia

¹ Ho ḓa ipfi ha Jeremia ḽi tshi bva ha Muṋe washu musi Nebusaradani mulangammbi o no mu vhofholola vhe Rama. O wana Jeremia o vhoxwa nga dzigeḓane e na mathubwa oṱhe a no bva Jerusalema na Juda vhe vha vha vha tshi khou hwalwa vha tshi iswa vhuthubwani Babele.

² Musi mulangammbi a tshi wana Jeremia a mu vhudza a ri, “Yahavee Mudzimu wau o amba uri fhano fhethu hu ḓo bvelela khombo hei.

³ Zwino-ha Yahavee o ita uri i bvelele; o ita zwenezwiḽa zwe a ri u ḓo zwi ita. Zwoṱhe hezwi zwo bvelela nge inwi Majuda na khakhela Yahavee na si mu thetshelese.

⁴ Huno ṋamusi ndi a u vhofholola geḓane dzo u vhofhaho zwanḓa. Arali u tshi zwi takalela u nga ṱuwa na nṋe ra ya Babele, nṋe ndi ḓo u londola; hone arali u sa funi u nga sala zwau. Vhona, shango ngeli, u nga ḓi ya hune wa funa.”

⁵ Huno Jeremia a tshi kha ḓi timatima, Nebusaradani a dovha a ri, “Huma zwau u ye ha Gedalia ṅwana wa Ahikamu ṅwana wa Shafani, we khosi ya Babele ya mu vhea uri a vhuse miḓi ya Juda, u dzule nae na vhathu, kana u ye hune wa funa.” Ndi hone mulangammbi a tshi mu ṋea na mbuvha na tshifhiwa a mu litsha a ḓiṱutshela.

⁶ Huno Jeremia a ya ha Gedalia ṅwana wa Ahikamu e Mitsipha a dzula nae na vhathu vhe vha siwa henefho shangoni.

Gedalia a tshi vhusa ḽa Juda

⁷ Musi vhahulwane vhoṱhe vha mmbi na vhahali vhavho vhe vha vha vha tshee shangoni vha tshi zwi pfa uri khosi ya Babele yo vhea Gedalia ṅwana wa Ahikamu uri a vhuse shango iḽo na uri a lange vhanna na vhasadzi na vhana – vhoṱhe vhe vha vha vhe vhashai vha vhashai shangoni, vhe vha vha vha songo hwaliwa vha iswa vhuthubwani Babele,

⁸ vha ḓa ha Gedalia henefho Mitsipha – ndi Ishmaele ṅwana wa Nethania, na Johanani na Jonathani vhana vha Karia, na Seraya ṅwana wa Thanumethe na vhana vha Efai wa Netofa na Jesania a no bva Maakha na vhahali vhavho.

⁹ Gedalia ṅwana wa Ahikamu, ṅwana wa Shafani, a vha fulufhedzisa nga muano a ri, “Ni songo ofha u shumela Vhababele. Dzulani shangoni heḽi ni shumele khosi ya Babele, ndi hone zwi tshi ḓo ni nakela.

¹⁰ A vha nṋe ndi ḓo dzula Mitsipha nda ni imelela kha Vhakhaladia vhane vha ḓa ha riṋe, fhedzi inwi no fanela u fula nḓirivhe na mitshelo ya tshilimo na nyolivi, ni dzi hamule, mapfura ni shele nkhoni dzaṋu dza u vhulungela, na ḓidzulela miḓini ine na funa u dzula khayo.”

¹¹ Musi Majuda vha re Muaba na Amoni na Edomo na mashangoni maṅwe oṱhe vha tshi pfa uri khosi ya Babele yo sia tsalela kha ḽa Juda, a vhea Gedalia ṅwana wa Ahikamu ṅwana wa Shafani uri a vha vhuse,

¹² vhoṱhe vha humela shangoni ḽa Juda, ha Gedalia e Mitsipha, vha tshi bva mashangoni e vha vha vho balangana nao. Vha fula nḓirivhe nnzhi na mitshelo ya tshilimo.

Ishmaele a tshi vhulaha Gedalia

¹³ Johanani ṅwana wa Karia na vhahulwane vha mmbi vhoṱhe vhe vha vha vha tshi kha ḓi vha shangoni vha ḓa ha Gedalia e Mitsipha,

¹⁴ vha mu vhudzisa vha ri, “A vha zwi ḓivhi uri Baalisi khosi ya Vhaamoni o ruma Ishmaele ṅwana wa Nethania uri a vha vhulahe?” Hone Gedalia ṅwana wa Ahikamu a si tende zwe vha amba.

¹⁵ Ndi hone Johanani ṅwana wa Karia a tshi amba na Gedalia nga tshiphiri vhe Mitsipha a ri, “Nga vha litshe ndi yo vhulaha Ishmaele ṅwana wa Nethania, a hu nga vhi na a no ḓo zwi ḓivha. U ṱoḓa u vha vhulahelani, Majuda vhoṱhe vhane vha dzula navho vha tshi ḓo balangana, tsalela dza Juda dza lovha?”

¹⁶ Hone Gedalia ṅwana wa Ahikamu a fhindula Jonathani ṅwana wa Karia a ri, “U songo ita zwo raloho! U khou zwifhelela Ishmaele.”