JEREMIA 4 - BIVHILI KHETHWA Mafhungo Madifha

¹ Muṋe washu u ri, “Arali u tshi funa u vhuya iwe Israele, ndi zwone, vhuelela kha Nṋe. Arali wa laṱa midzimu yau i nengisaho, u songo tsha pambuwa nḓilani.

² Arali wa ana wa ri, ‘Nga Yahavee a tshilaho’, u ane u ngohoni, u ite zwi re zwone, u haṱule nga khaṱhulo mbuya; ndi hone tshakha dzi tshi ḓo shudufhadzana nga Nṋe dza zuwa Nṋe.”

³ Muṋe washu u amba na vhathu vha Juda na vha Jerusalema, u ri, “Limani mavuvhu aṋu, mbeu yaṋu ni songo zwala mipfani.

⁴ Ḓifumbiseleni Nṋe Yahavee, ni tou fumba mbilu, inwi vhanna vha Juda na vhathu vha Jerusalema, mbiti dzanga dzi sa ḓo pwashea dza duga unga mulilo nga mulandu wa vhuvhi he na ita, dza ri u duga ha si vhe na a dzi dzimaho.”

“Maswina o swika!”

⁵ Zwi ḓivhadzeni Juda, ni zwi ṱavhele mukosi Jerusalema! Lidzani phalaphala shangoni ḽoṱhe! Ṱavhani mukosi zwi pfale ni ri, “Kuvhanganani! Kha ri shavhele miḓini hu re na vhudzumbamo!”

⁶ Imisani tshiga tshi sumbaho nḓila i yaho Tsioni! Shavhani ni yo dzumbama, ni songo lenga! Ndi khou ḓisa khombo i bvaho devhula, hu ḓo ḓa ndozwo khulu.

⁷ Ndau yo no takuwa vhulaloni hayo ya bvela nnḓa, mulozwi wa dzitshakha u nḓilani. O no takuwa, shango ḽaṋu u khou ḓa u ḽi shandula soga; miḓi yaṋu i ḓo sala i matumba i si na muthu.

⁸ Huno-ha ambarani madzanganda a tshililo, ni lile ni tou ṱavha mukosi; mbiti dza Muṋe washu a dzo ngo ri humela.

⁹ Muṋe washu u ri, “Musi hoyo mahosi na vhahulwane vha ḓo kulea nungo, vhotshifhe vha ḓo akhamala, vhaporofita zwa vha somela.”

¹⁰ “Zwenezwo vha ḓo ri, ‘Yawee Muṋe wa zwoṱhe Muṋe washu, wo fhura vhathu vha Jerusalema tshoṱhe u tshi ri ḽi ḓo lala, mathina banga ḽi mikuloni yashu.’ ”

Ḓumbu ḽi fhisaho ḽa khaṱhulo

¹¹ Musi wonoyo vhathu vha Jerusalema vha ḓo vhudzwa upfi, “Hu khou vhudzula muya u fhisaho u tshi bva miṱumbani ya zwikwara zwa phangani u tshi ḓa kha vhathu vhanga. A si wa u hwala maṱunga na mungu vhathu vha tshi ludza lini,

¹² ndi wa u kumba zwoṱhe. Ndi Nṋe ane nda ḓo amba ha ḓa wonoyo muya wa khaṱhulo.”

Vha Juda vha nga kha ḓi tshidzwa naa?

¹³ Vhonani maswina a khou swika nga luvhilo unga gole, gariki dzao dzi khou ḓa unga tshiḓumbumukwe, bere dzao dzi na luvhilo lu no fhira lwa goni. Ro welwa nga khombo! Ndi hone ro lovha!

¹⁴ “Iwe Jerusalema, laṱa vhuvhi vhu re mbiluni yau u tshidzwe. U ḓo dzula na vhunwa mbiluni u swika lini?

¹⁵ Vhaḓinḓa vha bvaho muḓini wa Dani na vha bvaho mivhunduni ya Efraimi vha ḓivhadza mavhi,

¹⁶ vho ḓa u sevha dzitshakha na u vhudza Jerusalema uri maswina a khou ḓa a tshi bva shangoni ḽa kule. Vha ḓo ṱavhela Juda mukosi wa nndwa.

¹⁷ Maswina a u tanga unga vhathu vho lindaho tsimu nge wa shandukela Nṋe. Ho amba Nṋe Yahavee.

¹⁸ Hezwo wo tou ḓiokela nga kutshilele kwau na zwiito zwau. Heyo ndi ṱhamu yau. I vhavha hani! I phuletshedza u swika mbiluni!”

Jeremia a tshi ṱavhela vhathu vha hawe mukosi

¹⁹ Yawee, ndi khou pfa vhuṱungu, zwi tou vhavha! Mbilu yanga i tou sinḓa ngomu hanga, a thi koni u fhumula. Ndo pfa phalaphala i tshi lila, ndo pfa mukosi wa nndwa.

²⁰ Khombo dzi khou tevhekana; shango ḽoṱhe ndi mutumbu; vhudzulo hanga ho phusukanywa kathihi fhedzi, iṱo ḽi tshi poi nda sala ndi si tshee na vhudzulo.

²¹ Ndi ḓo ṱalela nndwa i tshi lwiwa nda pfa phalaphala i tshi lila u swika lini?

²² Muṋe washu u ri, “Vhathu vhanga ndi matsilu, Nṋe a vha nnḓivhi; ndi vhana vha sa pfesesi, a vha na ṱhalukanyo; vha konela u ita vhuvhi, u ita zwivhuya zwi a vha kunda.”

Phusuphusu dzi ḓaho

²³ Ndo sedza ḽifhasi nda vhona ḽo vilingana, ḽi si na tshithu, nda sedza ḽiṱaḓulu nda vhona tshedza tshaḽo tshi si tsheeho.

²⁴ Ndo sedza dzithavha nda vhona dzi tshi dzinginyea; nda sedza zwikwara nda vhona zwi tshi thenge-thenge;

²⁵ nda sedza nda vhona hu si na vhathu; zwiṋoni zwoṱhe zwo vha zwo fhufha.

²⁶ Nda sedza nda vhona shango ḽo vhibvelaho ḽo no sala ḽi soga, miḓi yaḽo yo sala i matumba, ngauri Muṋe washu o ḽi sinyutshela.

²⁷ (Muṋe washu o amba uri ḽifhasi ḽoṱhe ḽi ḓo sala ḽi soga, naho a sa nga ḽi lozwi tshoṱhe.)

²⁸ Ḽifhasi ḽi ḓo lila, lutombo lwa swifhala. Ho amba Muṋe washu, zwe a vhofha o vhofha. Ha nga ḓisoli, ha nga humeli murahu.

²⁹ Muḓi woṱhe u ḓo shavha vha tshi pfa mukosi wa vhanameli vha dzibere na vhaposi vha misevhe. Vhaṅwe vha shavhela maṱakani, vhaṅwe vha gonya nngwa; miḓi yoṱhe yo ṱangulwa, a hu na a dzulaho khayo.

³⁰ Iwe Jerusalema wo phusukanywaho, u ḓo itani? Ndi mini u tshi ambara dza muridili na nungu dza musuku? Ndi mini u tshi fhoma maṱo au nga phomo unga phombwe? U ḓiṱama hau ndi mahandana fhedzi, vhafunwa vhau vha vho u nyadza, vha ṱoḓa u u vhulaha.

³¹ Ndi khou pfa mukosi u no nga wa musadzi ane a ṱoḓou vhofholowa; ndi tshigomelo tsha a no nga u khou beba ṅwana wa tanzhe; ndi mukosi wa u fhihamelwa ha Tsioni a tshi onyolosa zwanḓa a tshi ri, “Yawee, ndi khou dzidzivhala, ndo kumedzwa dziphondi!”