JEREMIA 38 - BIVHILI KHETHWA Mafhungo Madifha

Jeremia a tshi dovha u poswa bidzini

¹ Shefatia ṅwana wa Mathani na Gedalia ṅwana wa Phashuru na Jehukhala ṅwana wa Shelemia na Phashuru ṅwana wa Malikia vho pfa zwe Jeremia a vha a tshi khou vhudza vhathu vhoṱhe a tshi ri,

² “Muṋe washu u ri, ‘Ane a vhuya a sala muḓini houno u ḓo fa nga pfumo kana nḓala kana dwadze, huno ane a shavhela kha Vhababele ha nga fi, u ḓo ponyoka a tshila.’

³ Muṋe washu u ri, ‘Vhukumakuma muḓi houno u ḓo kumedzwa mmbi ya khosi ya Babele, vha u thuba.’ ”

⁴ Ndi hone vhaḽa vhahulwane vha tshi vhudza khosi vha ri, “Hoyu munna ngavhe a tshi vhulawa. Vhahali vho salaho fhano muḓini na vhathu vhoṱhe u khou vha kula nungo nga zwine a vha vhudza. Hoyu munna ha ṱoḓi vhathu havha zwi tshi vha nakela, u ṱoḓa vha tshi welwa nga khombo.”

⁵ Khosi Tsedekia a fhindula a ri, “U zwanḓani zwaṋu. A hu na tshine khosi ya ni dzivhisa.”

⁶ Ndi hone vha tshi dzhia Jeremia vha mu longa bidzini ḽa Malakhiya, ṅwana wa khosi, ḽe ḽa vha ḽi muṱani wa vhalindi pfamoni ya musanda. Vha tsisela Jeremia bidzini nga dzithambo; ḽo vha ḽi si na maḓi ngomu haḽo, hu tshi tou vha matope fhedzi, Jeremia a mbwandamela matopeni.

⁷ Pfamoni ya musanda ho vha hu na muṅwe munna wa Mukushu o luvhedzwaho we a vha a tshi pfi Ebede Melekhe. Ene a zwi pfa uri vho longa Jeremia bidzini. Khosi yo vha i tshee yo dzula Khoroni ya Benyamini,

⁸ Ebede Melekhe a bva pfamoni a yo amba nae a ri,

⁹ “Thovhele muṋe wanga, havha vhathu vho tshinya nga zwe vha ita muporofita Jeremia. Vho mu posa bidzini; u ḓo fa nga nḓala, a hu tshee na zwiḽiwa fhano muḓini.”

¹⁰ Ndi hone khosi i tshi vhudza Ebede Melekhe ya ri, “Dzhia vhanna vhararu u ṱuwe navho, ni yo bvisa muporofita Jeremia dindini a sa athu fa.”

¹¹ Ebede Melekhe a mbo ḓi dzhia vhaḽa vhanna a ṱuwa navho, a livha lufherani lwa mbulungelo ya pfamo. A dzhia malakanṱhana na madzanganda henefho, a zwi tsisa nga thambo zwa tsela ha Jeremia dindini.

¹² Ebede Melekhe wa Mukushu a amba na Jeremia a ri, “Kha vha dzhie malakanṱhana haya na madzanganda vha somedze magopwani avho uri thambo dzi si vha vhaise.” Jeremia a ita nga u ralo,

¹³ vha mu kokodza nga dzithambo, vha mu bvisa bidzini, Jeremia a dzula muṱani wa vhalindi pfamoni ya musanda.

Tsedekia a tshi dovha u amba na Jeremia

¹⁴ Ndi hone khosi Tsedekia a tshi vhidzisa muporofita Jeremia, a ri a ḓiswe tshifhingoni tsha vhuraru tshi yaho thembeleni ya Muṋe washu. Khosi ya amba na Jeremia ya ri, “Ndi ṱoḓa u u vhudzisa tshiṅwe tshithu. U songo nnzumbela tshithu.”

¹⁵ Jeremia a amba na Tsedekia a ri, “Arali nda vha fhindula a vha nga mmbulahi naa? Nangwe nda vha eletshedza, a vha nga nthetshelesi.”

¹⁶ Hone khosi Tsedekia a anela Jeremia tshiphirini a ri, “Ndi ana nga Muṋe washu a tshilaho we a ri ṋea mufemo, ndi ri, ndi nga si u vhulahe, ndi nga si u kumedze vhane vha khou ṱoḓa u u vhulaha.”

¹⁷ Huno Jeremia a vhudza Tsedekia a ri, “Muṋe washu Mudzimu Mulangazwoṱhe Mudzimu wa Israele u ri, ‘Arali vha luvha magota a khosi ya Babele, a vha nga fi, na muḓi houno a u nga fhiswi; vhone na muṱa wavho ni ḓo tshila.

¹⁸ Hone arali vha sa luvha magota a khosi ya Babele, muḓi houno u ḓo kumedzwa Vhababele vha u fhisa we lore; vha vha vhone vhamusanda, vha nga si ponyoke vha shavha.’ ”

¹⁹ Khosi Tsedekia a vhudza Jeremia a ri, “Ndi ofha Majuda vhe vha shavhela kha Vhababele, ngauri Vhababele vha nga ḓo nkumedza vhone vha ntambudza.”

²⁰ Jeremia a fhindula a ri, “Vha nga si vha kumedze khavho. Vhone nga vha thetshelese Muṋe washu vha ite zwine nda vha vhudza. Ndi hone zwi tshi ḓo vha nakela, vha si vhulawe.

²¹ Hone Muṋe washu o nnzumbululela a ri: Arali vha lamba u ḓikumedza,

²² vhafumakadzi vhoṱhe vho salaho pfamoni ya khosi ya Juda vha ḓo bviswa vha ṋewa magota a khosi ya Babele. Vhafumakadzi vha ḓo vha rovhedza vha ri, “ ‘Khonani dzavho dze vha vha vha tshi dzi fulufhela dzo vha xedza, dza vha kunda. Milenzhe yavho yo mbwandamela matopeni; khonani dzavho dzo vha ṱutshela.’

²³ “Vhafumakadzi vhavho vhoṱhe na vhana vhavho vha ḓo hwalwa vha iswa ha Vhababele. Vha vha vhone vha nga si ponyoke vha shavha, vha ḓo thubiwa nga khosi ya Babele; muḓi houno u ḓo fhiswa we lore.”

²⁴ Huno Tsedekia a vhudza Jeremia a ri, “U songo vhuya wa vhudza na muthu na muthihi hezwi zwe ra amba; wa amba u ḓo fa.

²⁵ Arali magota a zwi pfa zwauri ndo amba na iwe, vha ḓa ha iwe vha ri, ‘Ri vhudze zwe wa amba na vhamusanda; u songo ri dzumbela, wa ri dzumbela ri ḓo u vhulaha; vhamusanda vho u vhudzani?’

²⁶ iwe u vha vhudze u ri, ‘Ndo vha ndi tshi khou luvhelela khosi uri a si nkhumisele nḓuni ya Jonathani nda yo fela hone.’ ”

²⁷ Vhukuma magota oṱhe a ḓa ha Jeremia a mu vhudzisa, a vha vhudza zwenezwo zwe khosi ya ri a vha vhudze; vha si tsha mu vhudza tshithu, ngauri ho vha hu si na we a mu pfa a tshi amba na khosi.

²⁸ Jeremia a dzula muṱani wa vhalindi pfamoni ya musanda u swika Jerusalema u tshi thubiwa.