JEREMIA 37 - BIVHILI KHETHWA Mafhungo Madifha

“Vhaegipita vha nga si lamulele Jerusalema”

¹ Tsedekia ṅwana wa Josiasi o vhumbwa khosi ya Juda nga Nebukhadnetsara khosi ya Babele; o vhusa vhudzuloni ha Jehoyakhini ṅwana wa Jehoyakimu.

² Ene na magota awe na vhathu vha shango a vho ngo vhuya vha londa maipfi e Muṋe washu a amba nga muporofita Jeremia.

³ Naho zwo ralo, khosi Tsedekia a ruma Jehukhala ṅwana wa Shelemia e na tshifhe Tsefania ṅwana wa Maaseya ha muporofita Jeremia na fhungo ḽi no ri, “Ri humbela uri u ri rabelele ha Mudzimu Muṋe washu.”

⁴ Nga hetsho tshifhinga Jeremia o vha o vhofholowa a tshi kha ḓi kona u ya hune a funa; o vha a sa athu hoṋelwa dzhele.

⁵ Mmbi ya Babele yo vha i tshi khou govhela muḓi wa Jerusalema, hone vho ri u pfa uri mmbi ya Farao yo pfuka mukano wa Egipita, vha ṱuwa Jerusalema vha yo lwa na Vhaegipita.

⁶ Zwenezwo ipfi ḽa Muṋe washu ḽa ḓa ha muporofita Jeremia ḽa ri,

⁷ “Yahavee Mudzimu wa Israele u ri: Vhudza khosi ya Juda we a u ruma uri u ḓe u mmbudzise, u ri, ‘Mmbi ya Farao, ye ya bva i tshi ḓa u ni lamulela, i ḓo humela shangoni ḽa hayo ḽa Egipita.

⁸ Zwenezwo Vhababele vha ḓo vhuya, vha ḓa u dia uno muḓi; vha ḓo u thuba vha u fhisa we lore.’

⁹ Yahavee u ri: Ni songo ḓifhura na humbula na ri, ‘Vhukumakuma Vhababele vha ḓo ri ṱutshela.’ A vha nga ni ṱutsheleli!

¹⁰ Nangwe no vha ni tshi nga kunda mmbi ya Babele yoṱhe ine ya khou ni dia, ha tou sala dzikhuvhabvu fhedzi dzidenndeni, vho vha vha tshi ḓo ḓi bva vha ḓa u fhisa muḓi houno we lore.”

Jeremia a tshi hoṋelwa dzhele

¹¹ Musi mmbi ya Babele yo no huma i tshi bva Jerusalema i tshi yo lwa na mmbi ya Farao,

¹² Jeremia a ṱuwa afho muḓini a ya shangoni ḽa Benyamini u yo wana mukovhe wawe wa thundu kha vhathu vha henengei.

¹³ Hone musi a tshi swika Khoroni ya Benyamini, muhulwane wa vhalindi, we a vha a tshi pfi Iriya ṅwana wa Shelemia, ṅwana wa Hanania, a mu fara a ri, “Iwe u khou shavhela kha Vhababele!”

¹⁴ Jeremia a ri, “A si zwone! A thi khou shavhela ha Vhababele.” Hone Iriya a si mu thetshelese; a fara Jeremia a mu isa ha vhahulwane.

¹⁵ Vha sinyutshela Jeremia vha ita uri a rwiwe, a hoṋelwe nḓuni ya muṅwaleli Jonathani, ngauri vho vha vho i ita dzhele.

¹⁶ Jeremia a longwa dzhele ya fhasi ha mavu, a dzula hone tshifhinga tshilapfu.

Tsedekia a tshi khathutshela Jeremia

¹⁷ Ndi hone khosi Tsedekia a tshi mu vhidzisa, a ita uri a ḓiswe pfamoni, a mu vhudzisa nga tshiphiri a ri, “Hu na tshe Muṋe washu a vhuya a amba?” Jeremia a fhindula a ri, “Tshi hone: vhone vha ḓo kumedzwa khosi ya Babele.”

¹⁸ Ndi hone Jeremia a tshi vhudzisa khosi Tsedekia a ri, “Vhone kana magota avho kana vhathu avho ndo vha tshinyani, zwe nda vhuya nda hoṋelwa dzhele?

¹⁹ Vha ngafhi vhaḽa vhaporofita vhavho vhe vha vha porofitela vha ri, ‘Khosi ya Babele i nga si vha die, na shango heḽi i nga si ḽi die’?

²⁰ Huno zwino, vhone muṋe wanga vhamusanda nga vha thetshelese. Nga vha litshe ndi swikise khumbelo yanga khavho: Vha songo nkhumisela nḓuni ya muṅwaleli Jonathani; vha nkhumisela hone vhukuma ndi ḓo fa.”

²¹ Zwenezwo khosi Tsedekia a ri Jeremia a vhewe muṱani wa vhalindi pfamoni ya vhamusanda, a ṋewe mukonde wa vhurotho ḓuvha ḽiṅwe na liṅwe u tshi bva tshiṱaraṱani tsha vhabiki vha vhurotho, vhurotho hoṱhe afho muḓini vhu vhuye vhu fhele. Jeremia a ḓi dzula muṱani wa vhalindi, pfamoni ya musanda.