JEREMIA 35 - BIVHILI KHETHWA Mafhungo Madifha

U fulufhedzea ha Vharekhaba

¹ Ngeḽi ipfi ḽe ḽa ḓa ha Jeremia ḽi tshi bva ha Muṋe washu musi hu tshi vhusa Jehoyakimu ṅwana wa Josiasi khosi ya Juda, ḽo ri,

² “Iyo vhidza vha muṱa wa Vharekhaba vha ḓe kha luṅwe lufhera lwa nnḓu ya Yahavee u vha fhe waini vha nwe.”

³ Ndi hone nṋe ndi tshi yo dzhia Jaasania ṅwana wa Jeremia, ṅwana wa Habatsinia, na vharathu vhawe na vhana vhawe vhoṱhe vha vhatuka – muṱa woṱhe wa Vharekhaba,

⁴ nda vha ḓisa nḓuni ya Muṋe washu, nda vha dzhenisa lufherani lwa vhana vha Hanani ṅwana wa Igidalia muḓinḓa wa Mudzimu. Ho vha hu tsini na lufhera lwa vhahulwane lwe lwa vha lu nṱha ha lwa Maaseya ṅwana wa Shalumu mulindamuṋango.

⁵ Nda vhea midzio yo ḓala waini, nda vhea na zwinwelo phanḓa ha vhanna vha muṱa wa Vharekhaba, nda vha vhudza nda ri, “Inwani iyi waini.”

⁶ Vhone vha fhindula vha ri, “Riṋe a ri nwi waini; makhulukuku washu Jonadaba ṅwana wa Rekhaba o ri laya a ri, ‘Inwi na vhaḓuhulu vhaṋu, ni songo vhuya na nwa waini.

⁷ Hafhu ni songo vhuya na fhaṱa nnḓu, ni songo lima masimu kana na sima minḓirivhe; zwithu zwo raloho ni songo vhuya na vha nazwo, tshaṋu hu vhe u dzula dzidenndeni. Ndi hone ni tshi ḓo lalama shangoni ḽine na tendeleka khaḽo.’

⁸ Ro ḓi thetshelesa zwoṱhe zwe makhulukuku washu Jonadaba ṅwana wa Rekhaba a ri laya. Riṋe na vhafumakadzi vhashu na vhana vhashu vha vhatuka na vha vhasidzana a ri athu vhuya ra nwa waini,

⁹ a ri athu vhuya ra fhaṱa nnḓu dza u dzula ngomu kana ra vha na masimu a minḓirivhe kana masimu a goroi, a ri athu lima tsimu.

¹⁰ Tshashu ho ḓi vha u dzula dzidenndeni ra tevhedza zwoṱhe zwe makhulukuku washu Jonadaba a ri laya.

¹¹ Ho tou ri musi Nebukhadnetsara khosi ya Babele a tshi dia shango ḽashu ra ri, ‘Nḓarieni ri ye Jerusalema ri shavhe mmbi dza Vhakhaladia na dza Vhaaramu.’ Ndi zwine ra vho dzula Jerusalema.”

¹² Zwenezwo ipfi ḽa Muṋe washu ḽa ḓa ha Jeremia ḽa ri,

¹³ “Yahavee Mulangazwoṱhe Mudzimu wa Israele u ri: Iyo vhudza vhathu vha Juda na vha Jerusalema u ri, ‘Ndi mini ni tshi lamba u nthetshelesa, ndi tshi ni laya ni sa pfi? Nṋe Yahavee ndi khou ralo.

¹⁴ Jonadaba ṅwana wa Rekhaba o laya vhana vhawe uri vha si nwe waini, iyo ndayo vha ḓi i vhulunga. A vha nwi waini, na ṋamusi, ngauri vha thetshelesa zwe makhulukuku wavho a vha laya. Hone Nṋe ndo amba na inwi nda dovha, ni si nthetshelese.

¹⁵ Ndo ruma vhaḓinḓa vhanga vhoṱhe vhaporofita ha inwi nda dovha. Vho ni vhudza vha ri, muṅwe na muṅwe nga a laṱe vhuvhi hawe a shandukise maitele awe; ni songo tevhela midzimu miṅwe na i shumela, ndi hone ni tshi ḓo dzula shangoni ḽe nda ṋea inwi na vhokhotsi aṋu. Hone izwo a no ngo zwi londa, a no ngo nthetshelesa.

¹⁶ Vhaḓuhulu vha Jonadaba ṅwana wa Rekhaba vho tevhedzela zwe makhulukuku wavho a vha laya, hone vhathu avha vhone a vho ngo nthetshelesa.’

¹⁷ “Zwenezwo Nṋe Yahavee Mudzimu Mulangazwoṱhe Mudzimu wa Israele ndi ri: Thetshelesani! Vhathu vha Juda na vhoṱhe vha dzulaho Jerusalema ndi ḓo vha ḓisela khombo dzoṱhe dze nda ri dzi ḓo vha wela. Ndo amba navho vha si thetshelese; ndo ḓi vha vhidza vha si aravhe.”

¹⁸ Ndi hone Jeremia a tshi vhudza Vharekhaba a ri, “Muṋe washu Mulangazwoṱhe Mudzimu wa Israele u ri, ‘No thetshelesa zwe makhulukuku waṋu Jonadaba a ni laya, na tevhedza ndayo dzawe, na ita zwoṱhe zwe a ni vhudza.’

¹⁹ Zwenezwo Muṋe washu Mulangazwoṱhe Mudzimu wa Israele u ri, ‘Jonadaba ṅwana wa Rekhaba ha nga vhuyi a kundwa u vha na muḓuhulu ane a ntshumela.’ ”