JEREMIA 34 - BIVHILI KHETHWA Mafhungo Madifha

Ndaedzo i yaho ha Tsedekia: Ṱhamu yó ṱangana na khathutshelo

¹ Musi Nebukhadnetsara khosi ya Babele na mmbi yawe yoṱhe na mivhuso yoṱhe na tshakha dzoṱhe dza ḽifhasi dze a vha a tshi dzi vhusa vha tshi khou lwa na Jerusalema na miḓi i re tsini hawo, ha ḓa ipfi heḽi kha Jeremia ḽi tshi bva ha Muṋe washu ḽa ri,

² “Nṋe Yahavee Mudzimu wa Israele ndi ri: Iyo vhudza Tsedekia khosi ya Juda u ri, ‘Yahavee u ri: Muḓi hoyu ndi ḓo ṱuwa ndi tshi u kumedza khosi ya Babele a u fhisa we lore.

³ Na iwe a u nga vhuyi wa mu ponyoka, vhukumakuma u ḓo thubiwa wa kumedzwa ene. U ḓo vhona khosi ya Babele nga au maṱo, ú ḓo amba na iwe no livhana zwifhaṱuwo. U ḓo iswa Babele.

⁴ “ ‘Nangwe zwo ralo iwe Tsedekia khosi ya Juda, thetshelesa zwine Yahavee a u fulufhedzisa. Yahavee a tshi amba iwe u ri: A u nga fi nga pfumo;

⁵ u ḓo fa nga mulalo. U tshi zwiṱwa vhathu vha ḓo vhasa mililo ya u u hulisa, sa zwe vha ita vha tshi hulisa vhokhotsi au na vhe vha vha mahosi iwe u sa athu, vha ḓo u lilela vha ri: Yawee, khosi yashu yo dzama! Nṋe nga dzanga ndi khou ana, ndi ralo. Ho amba Nṋe Yahavee.’ ”

⁶ Ndi hone muporofita Jeremia a tshi vhudza Tsedekia khosi ya Juda zwoṱhe hezwo, vhe Jerusalema,

⁷ musi mmbi ya khosi ya Babele i tshi khou dia muḓi wa Jerusalema na miṅwe miḓi ya Juda ye ya vha i tshi kha ḓi lwa, ndi Lakhishi na Azeka. Heyo miḓi mivhili ndi yone fhedzi yo tangedzwaho nga mitsheṱo ye ya vha yo sala kha ḽa Juda.

U bva kha mulanga wa u vhofholola dziphuli

⁸ Ho ḓa ipfi ha Jeremia ḽi tshi bva ha Muṋe washu musi khosi Tsedekia o no ita mulanga na vhathu vhoṱhe vha Jerusalema uri hu ḓivhadzwe uri phuli dzi vhofhololwe.

⁹ Muṅwe na muṅwe o ita mulanga wa u vhofholola phuli dzawe dza Vhaheberu, dza vhanna na dza vhasadzi, ha pfi hu songo tsha wanala muthu a no ita Mujuda ngae phuli.

¹⁰ Zwenezwo vhahulwane vhoṱhe na vhathu vhe vha dzhena kha uyo mulanga vha pfana uri vha ḓo vhofholola phuli dza vhanna na dza vhasadzi vha si tsha vha fareledza vhupulini; vha pfana, nangoho vha vha vhofholola.

¹¹ Hone ngavhuya vha shanduka, vha dzhiulula dziḽa phuli dze vha vha vho dzi vhofholola, vha dovha vha dzi dzhenisa vhupulini.

¹² Ndi hone ipfi ḽa Muṋe washu ḽi tshi ḓa ha Jeremia ḽa ri,

¹³ “Yahavee Mudzimu wa Israele u ri: Ndo vhofha mulanga na vhomakhulukukuku waṋu musi ndi tshi vha pfulusa Egipita shangoni ḽe vha vha vhe dziphuli. Ndo ri,

¹⁴ ‘Ṅwaha muṅwe na muṅwe wa vhuṱanu na vhuvhili muṅwe na muṅwe waṋu o fanela u vhofholola Muheberu wa hawe ufhio na ufhio we a ḓirengisa khae. Arali o no u shumela miṅwaha miṱanu na muthihi, u mu litshe a ḓiṱutshele.’ Huno vhokhotsi aṋu a vho ngo nthetshelesa, a vho ngo zwi londa.

¹⁵ Ni kha ḓi bva u ḓisola na ita zwe nda vhona zwi zwone: Muṅwe na muṅwe waṋu o ḓivhadza uri u ḓo vhofholola wa hawe, na vhuya na vhofha mulanga ndi tshi zwi vhona, nḓuni ine ya pfi ndi yanga.

¹⁶ Hone zwino no no shanduka na nyadzisa dzina ḽanga; muṅwe na muṅwe waṋu o dzhiulula phuli dza vhanna na dza vhasadzi dze a vha o dzi vhofholola uri dzi ye hune dza funa. No vha kombetshedza uri vha dovhe vha vhe phuli dzaṋu.

¹⁷ “Huno-ha, Nṋe Yahavee ndi ri: A no ngo nthetshelesa; a no ngo ḓivhadza uri ni ḓo vhofholola vha haṋu. Zwino-ha Nṋe ndi ni ḓivhadza mbofholowo, Nṋe Yahavee ndi khou ralo – ndi mbofholowo ya u yo fa nga pfumo na dwadze na nḓala. Ndi ḓo ita uri mivhuso yoṱhe ya ḽifhasi i ofhe i tshi vhona zwe nda ni ita.

¹⁸ Vhanna vho vhofhololaho mulanga, vha si khunyeledze zwine wa amba, uyo mulanga we vha u vhofha ndi tshi zwi vhona, ndi ḓo vha ita unga ṋamana ye vha i fhandula nga vhukati vha fhira vhukati ha lurumbu na lurumbu.

¹⁹ Vharangaphanḓa vha Juda na Jerusalema, vhahulwane vha pfamo ya musanda, vhotshifhe na vhathu vhoṱhe vha shango vhe vha fhira vhukati ha zwipiḓa zwa ṋamana,

²⁰ ndi ḓo vha kumedza maswina ane a ṱoḓa u vha vhulaha. Zwitumbu zwavho zwi ḓo ḽiwa nga zwiṋoni na zwivhanda zwa ḓaka.

²¹ Tsedekia khosi ya Juda na vhahulwane vhawe ndi ḓo vha kumedza maswina ane a ṱoḓa u vha vhulaha, ndi ḓo vha kumedza mmbi ya khosi ya Babele. Vha tshee vho ni ṱutshela,

²² hone ndi ḓo vha vhidza, Nṋe Yahavee ndi khou ralo, ndi ḓo vha vhuisa hafhano muḓini houno. Vha ḓo lwa nawo, vha u kunda vha u fhisa we lore. Miḓi ya Juda ndi ḓo i phusukanya ha si tsha dzula muthu.”