JEREMIA 31 - BIVHILI KHETHWA Mafhungo Madifha

¹ Muṋe washu u ri, “Misi yeneyo ndi ḓo vha Mudzimu wa matsinde oṱhe a Israele, vhone vha vha vhathu vhanga.”

Vhaisraele na vhone vha tshi humela hayani

² “Vhathu vhane vha ponyoka pfumo vha ḓo khathutshelwa phangani; ndi ḓo ḓa nda awedza Vhaisraele.”

³ Muṋe washu o ḓisumbedza nṋe a tshi bva kule a ri, “Ndo ḓi ni funa nga lufuno lwa lini na lini, lu sa fheli, lu no dzula lu hone.

⁴ Ndi ḓo dovha nda ni fhaṱa, miḓi yau ya dovha ya fhaṱwa iwe musidzana Israele. U ḓo dovha wa dzhia murumba wau wa tshina wo takala.

⁵ Ni ḓo dovha na lima masimu a minḓirivhe mivhunduni ya Samaria; vhalimi vhe vha i lima vha ḓo ḓiphiṋa nga mitshelo yayo.

⁶ Hu ḓo vha na musi une vhalindi vha ḓo huwelelana vhe mivhunduni ya Efraimi vha ri, ‘Iḓani ri gonye Tsioni ha Mudzimu Muṋe washu.’ ”

⁷ Muṋe washu u ri, “Imbelani Jakopo nga dakalo, pembelelani lushaka lu fhiraho dzoṱhe. Thendo dzaṋu nga dzi pfale, ni ri, ‘Yahavee o tshidza vhathu vhawe, vhone Vhaisraele vho salaho.’

⁸ Vhonani, ndi ḓo vha vhuisa shangoni ḽa devhula, nda vha kuvhanganya vha tshi bva magumoni a ḽifhasi. Khavho hu ḓo vha hu na mabofu na zwihole, vhasadzi vho vhifhaho muvhilini na vhane vha ṱoḓou vhofholowa; vha ḓo vhuya vhe gogo ḽihulu.

⁹ Vha ḓo vhuya vha tshi lila; ndi ḓo vha vhuisa vha tshi vho tou nnduvhelela. Ndi ḓo vha endedza tsini ha milambwana ya maḓi, nḓilani yo linganelaho hune vha sa ḓo khukhulwa, ngauri Nṋe ndi khotsi a Israele, Efraimi ndi tanzhe ḽanga.”

¹⁰ Muṋe washu u ri, “Inwi dzitshakha nthetsheleseni, ḓivhadzani ipfi ḽanga mashangoni a seli ha lwanzhe ni ri, ‘Onoyo we a balanganya Vhaisraele u ḓo dovha a vha kuvhanganya, a vha lisa unga mulisa a tshi lisa sambi ḽa nngu.’

¹¹ Muṋe washu u ḓo vhofholola vhaḓuhulu vha Jakopo, a vha tshidza zwanḓani zwa vhane vha vha kunda nga maanḓa.

¹² Vha ḓo ḓa vha fhululedza vhe muṱumbani wa Tsioni, zwifhaṱuwo zwó tsha nga zwivhuya zwine Muṋe washu a ḓo vha itela – goroi ntswa na waini ntswa na mapfura na nngu na kholomo. Vha ḓo nga muṱanga, a vha tsha ḓo ṋoka.

¹³ Ndi hone vhasidzana vha tshi ḓo takala, vha tou tshina, vhaṱhannga na vhakalaha vha pembela. Tshililo tshavho ndi ḓo tshi shandula dakalo; ndi ḓo vha rudza mbilu vha takala, vha si tsha ṱungufhala.

¹⁴ Vhotshifhe ndi ḓo vha fusha nga mapfura, vhathu vhanga vha ḓo fura vhuthu hanga. Ho amba Nṋe Yahavee.”

Vhana vha Rahele vha ḓo vhuya

¹⁵ Muṋe washu u ri, “Rama hu pfala mukosi, ndi mukosi wa tshililo tshi ṱungufhadzaho. Ndi Rahele a no khou lilela vhana vhawe; ha tsha tenda u fhumudzwa, vhana vhawe a vha tsheeho!”

¹⁶ Muṋe washu u ri, “Fhumula, u songo tsha lila, fhuluṱa miṱodzi, u ḓo pfufhelwa mushumo we wa itela vhana vhau, vha ḓo vhuya shangoni ḽa swina.

¹⁷ Lavhelela zwivhuya zwa matshelo, vhana vhau vha ḓo vhuya hayani. Ho amba Nṋe Yahavee.”

Ṅwana o xelaho a tshi vhuya

¹⁸ “Ndo pfa tshililo tsha Efraimi a tshi ri, ‘Wo nngudisa u ḓivha dzhogo unga ṋamana i sa athu guda, na zwino ndo guda. Nthembulusele ha Iwe, ndi hone ndi tshi ḓo rembuluwa; ngauri Iwe Muṋe washu u Mudzimu wanga.

¹⁹ Ndo ri u pambuwa nḓilani, nda ḓisola; wa ri u nndaṱisa nda ṱunya mavhudzi nga u ṱungufhala. Ndo pfa ndo shona ndi tshi nyadzea, ndi tshi humbula zwe nda tshinya ndi tshee muswa.’

²⁰ “Khezwi Efraimi a tshi nga ṅwana wanga ane nda mu funa. Khezwi a tshi nga u takadza mbilu yanga! Ndi tshi mu amba a thi tsha kona u mu hangwa. Mbilu yanga yo mu ṱuvha hani; vhukuma ndi ḓo mu khathutshela.”

Mathubwa a ḓo vhuya!

²¹ “Vhea zwiga zwa gondo, ṱoka thanda dza tsumbavhuyo. Sedza gondo ḽine wa fanela u ḽi fara. Dovha u wane nḓila ye wa ṱuwa ngayo. Vhuya Israele, musidzana wanga, humela miḓini yau.

²² Iwe ṅwana a sa fulufhedzei, u ḓo tendeleka u swika lini? Yahavee u ḓo sika tshithu tshiswa fhano fhasi, musadzi u vho ḓo tsireledza munna.”

Vhathu vha Juda na vhone vha ḓo nakelwa nga zwa matshelo

²³ Muṋe washu Mulangazwoṱhe Mudzimu wa Israele u ri, “Musi ndi tshi vha vhuisa vhuthubwani, vhathu vha re shangoni ḽa Juda na miḓini yaḽo vha ḓo dovha vha ri, ‘Iwe vhudzulo ha vhuvhuya, iwe thavha khethwa, ngavhe Muṋe washu a tshi u shudufhadza.’

²⁴ Vhathu vha ḓo dzula vhoṱhe kha ḽa Juda na miḓini yaḽo yoṱhe – vhalimi na vhane vha enda vha tshi fulisa maṱambi avho a dzinngu.

²⁵ Ndi ḓo netulusa vho netaho, vho ṋokaho nga nḓala nda vha fusha.

²⁶ Ndi hone vhathu vha tshi ḓo ri, ‘Kha ndi fhaṱuwe ndi zwi vhone, naho khofhe dzo nnḓifhela.’ ”

U vuswa ha Israele na Juda

²⁷ Muṋe washu u ri, “Hu khou ḓa maḓuvha ane nda ḓo ḓadza shango ḽa Israele na ḽa Juda nga vhathu na zwifuwo, vha nga vho tou zwaliwa.

²⁸ Vhunga ndo vha ndo tou fungelela u vha tupula na u vha pwashekanya na u vha thutha na u vha lozwa na u vha ḓisela khombo, zwino ndi vho ḓo fungelela u vha fhaṱa na u vha ṱavha.

²⁹ “Misi yeneyo vhathu a vha tsha ḓo ri, ‘Vhokhotsi vho ḽa nḓirivhe dza magaga, hadzila ya fara vhana.’

³⁰ “Muṅwe na muṅwe u vho ḓo tou fela vhuvhi hawe; ane a vhuya a ḽa nḓirivhe dza magaga, hadzila ḽi ḓo fara maṋo awe.”

Mulanga muswa

³¹ Muṋe washu u ri, “Hu khou ḓa musi une nda ḓo vhofha mulanga muswa na vhathu vha nnḓu ya Israele na vha nnḓu ya Juda.

³² A u nga ḓo vha mulanga u no nga uḽa we nda vhofha na vhomakhulukuku wavho zwiḽa ndi tshi vha fara nga tshanḓa nda vha pfulusa Egipita; vho tshinya mulanga wanga uḽa naho ndo vha ndo khwaṱhisa unga munna o vhinga musadzi.

³³ Mulanga une nda ḓo vhofha na nnḓu ya Israele hó no fhela tshifhinga hetsho, ndi hoyu: “Ndi ḓo vhea milayo yanga mihumbuloni yavho nda tou i ṅwala mbiluni dzavho. Nṋe ndi ḓo vha Mudzimu wavho, vhone vha vha vhathu vhanga.

³⁴ A hu tsha ḓo vha na a no ḓo funza muṅwe kana murathu wawe a ri, ‘Ḓivha Muṋe washu!’; vhoṱhe vha vho ḓo nnḓivha, u thoma nga muṱuku u swika nga muhulwane. Ndi uri ndi ḓo vha hangwela vhutshinyi havho nda si tsha vhu elelwa. Ho amba Nṋe Yahavee.”

³⁵ Muṋe washu o vhea ḓuvha uri ḽi vhonetshele masiari, o vhudza ṅwedzi na ṋaledzi uri zwi penye vhusiku; u ritha lwanzhe uri magabelo alwo a unge – u pfi Muṋe washu Mulangazwoṱhe, u ri,

³⁶ “Arali milayo heyo ya ḓuvha na ṋaledzi i tshi ḓo thuthwa nda si tsha zwi vhona, ndi hone ndi sa tsha ḓo vhona vhaḓuhulu vha Israele vhe lushaka.

³⁷ Arali lutombo hangei nṱha lwa kona u eliwa, muteo wa ḽifhasi ngei fhasi wa tandulwa, ndi hone na Nṋe ndi tshi nga landula vhaḓuhulu vha Israele nga mulandu wa zwoṱhe zwe vha ita.” Ho amba Muṋe washu.

U vuswa ha Jerusalema

³⁸ Muṋe washu u ri, “Hu khou ḓa maḓuvha ane nda ḓo ḓivusela muḓi hoyu wa Jerusalema, u bva Thawarani ya Hananele u swika Khoroni ya Khuḓani.

³⁹ Mukano u ḓo thoma henefho wa swika tshivhangani tsha Garebe wa livha Gua.

⁴⁰ Govha ḽoṱhe hune ha laṱwa vhafu na milora, na zwalo zwoṱhe u swika Govha ḽa Kidroni nga vhubvaḓuvha u swika nga khuḓa ya Khoro ya Bere, hu ḓo vha hukhethwa ha Yahavee. Muḓi a u tsha ḓo phusulwa, a u tsha ḓo lozwiwa.”