JEREMIA 3 - BIVHILI KHETHWA Mafhungo Madifha

Vhuhulu ha vhuvhi ha Israele

¹ Muṋe washu u ri, “Arali munna a ṱala musadzi wawe, musadzi a mu ṱutshela a vhingwa nga muṅwe munna, nṋa uyo munna mulayo u nga tenda a tshi dovha a vhinga uyo musadzi naa? Zwo vha zwi sa ḓo shata shango tshika tshoṱhe naa? Hone iwe wo vha na vhafarakano vhanzhi – zwino u vho ṱoḓa u vhuya kha Nṋe naa?

² Sedza miṱumbani ya zwikwara u vhone. Hu hone he wa si ite vhupombwe naa? Wo dzula tsini ha nḓila u tshi lindela vhafunwa vhau, unga Vhaarabia vho lalela vhaendi phangani. Shango wo ḽi ḓodza mashika nga vhupombwe na vhuvhi hau.

³ Ndi zwe mvula ya si tsha na, na vhusuṱo ha tshifhefho ha si tsha vha hone. Wo ita unga phombwe, na u shona u sa shoni.

⁴ “Zwino u vho amba na Nṋe wa ri, ‘Khotsi anga! Khonani yanga u bva hanani hanga!

⁵ U ḓo sokou dzula wo sinyuwa naa? Mbiti dzau a dzi nga gumi naa?’ U tshi amba u ralo, hone wa ḓi ita vhuvhi nga u kona.”

Hu mukomana, hu murathu, ndi phombwe dzoṱhe

⁶ Musi hu tshi vhusa khosi Josiasi, Muṋe washu a amba na nṋe a ri, “Wo zwi vhona zwe Israele musadzi a sa fulufhedzei a ita? O namela tshikwara tshiṅwe na tshiṅwe tshi re na muṱumba, a ya na fhasi ha miri yoṱhe yo adzaho a ita vhupombwe henefho.

⁷ Ndo vha ndi tshi vhona unga u ḓo ri u ita zwoṱhe hezwo a vhuya kha Nṋe, hone a si vhuye; na Juda murathu wawe a sa fulufhedzei o zwi vhona.

⁸ Israele musadzi a sa fulufhedzei ndo mu fha luṅwalo lwa vhuṱanzi ha uri ro ṱalana, nda mu thatha nga mulandu wa vhupombwe hawe. Juda, murathu wawe a sa fulufhedzei, a zwi vhona, hone a si ofhe. Na ene a ita vhupombwe,

⁹ a si vhuye a shona na luthihi. O shata shango tshika, a ita vhupombwe nga u luvha matombo na miri.

¹⁰ Naho zwo ralo, Juda murathu wawe a sa fulufhedzei ho ngo vhuya kha Nṋe nga mbilu yawe yoṱhe, wo vha u tshi tou vha muhoyo. Ho amba Nṋe Yahavee.”

Mathubwa a Israele kha a vhuye!

¹¹ Muṋe washu o mmbudza uri naho Vhaisraele vho mu shandukela, vha tshee khwiṋe kha vha Juda vha sa fulufhedzei.

¹² O mmbudza uri ndi ye devhula ndi vhudze Israele ndi ri, “Iwe Israele we wa ntshandukela, vhuya kha Nṋe! Nṋe thi shanduki, a thi tsha ḓo u sinyutshela; a thi nga u sinyutsheli tshoṱhe.

¹³ Iwe tenda mulandu, u tende uri wo shandukela Yahavee Mudzimu wau wa ḓiṋekedza midzimu isili fhasi ha miri yoṱhe yo adzaho, Nṋe wa si tsha nthetshelesa. Ho amba Nṋe Yahavee.”

“Zwivhuya zwi tshee phanḓa arali no laṱa vhuvhi haṋu!”

¹⁴ Muṋe washu u ri, “Inwi vhana vha sa fulufhedzei, vhuyani kha Nṋe, ni ḓo dovha na vha vhanga. Ndi ḓo ni nanga muthihi-muthihi muḓini na vhavhili-vhavhili kha mutupo nda ni ḓisa Tsioni.

¹⁵ Ndi hone ndi tshi ḓo ni ṋea vhalisa vha ntakadzaho, vha ni endedza nga nḓivho na ṱhalukanyo.

¹⁶ “Misi yeneyo musi no no anda shangoni, vhathu a vha tsha ḓo ri, ‘Ri na mbulungelo ya mulanga wa Yahavee!’ A vha tsha ḓo vhuya vha i humbula kana vha i elekanya; vha ḓo vha vha si tsha i ṱoḓa, na u ita iṅwe a vha nga iti.

¹⁷ Misi yeneyo vha ḓo ri Jerusalema ndi khuluṋoni ya Yahavee, na tshakha dzoṱhe dzi ḓo kuvhangana Jerusalema dza hulisa dzina ḽa Yahavee. A vha tsha ḓo ita zwine vha vhudzwa nga mbilu dzavho dza tshipimbi.

¹⁸ Misi yeneyo nnḓu ya Juda na ya Israele dzi ḓo ṱangana dza vha tshithu tshithihi, vha bva shangoni ḽa devhula vha ḓa shangoni ḽe nda ṋea vhomakhulukuku wavho uri ḽi vhe ḽavho.”

Vhupombwe ha vhathu vha Mudzimu

¹⁹ Muṋe washu u ri, “Israele, ndo vha ndi tshi ṱoḓa u u ṱanganedza uri u vhe ṅwananga, ndi u fhe shango ḽi takadzaho, wone mukovhe wo nakaho u fhira ya tshakha dzoṱhe. Ndo vha ndi tshi vhona unga u tshi nnyamba u do ri ‘Baba’, wa si tsha mpfuralela.

²⁰ Hone no ntshandukela, inwi vhathu vha Israele, na nga musadzi a no shandukela munna wawe.”

Mukosi wa Juda

²¹ “Hu khou pfala mukosi miṱumbani ya zwikwara: Ndi vhathu vha Israele vha no khou lila vha tshi luvhelela, nge vha pambuwa nḓilani vha hangwa Yahavee Mudzimu wavho.

²² Vhuyani, inwi vhana vha sa fulufhedzei, ndi ḓo ni ilafha na vho fulufhedzea. “Ni ri, ‘Ee, ri ḓa ha Iwe, u Yahavee Mudzimu washu.

²³ Zwe ra luvha midzimu ya vhannḓa miṱumbani ya dzithavha a zwo ngo vhuya zwa ri farisa tshithu. Ngoho u tshidzwa ha Israele hu bva ha Yahavee Mudzimu washu.

²⁴ U tou bva hanani hashu ro vhona midzimu i shonisaho i tshi ḽa mitshelo ya zwe vhokhotsi ashu vha shuma – masambi avho a dzinngu na a kholomo, vhana vhavho vha vhatuka na vha vhasidzana.

²⁵ Kha ri shone ri tou lala fhasi, ri tou niwa nga ṱhoni. Ro khakhela Yahavee Mudzimu washu, roṱhe riṋe na vhokhotsi ashu; u bva hanani hashu, na ṋamusi a ro ngo thetshelesa Yahavee Mudzimu washu.’ ”