JEREMIA 28 - BIVHILI KHETHWA Mafhungo Madifha

Hanania, muporofita wa khole-khole

¹ Nga ṅwaha wonoyo, Tsedekia khosi ya Juda a tshi kha ḓi bva u thoma u vhusa, nga ṅwedzi wa vhuṱanu wa ṅwaha wa vhuṋa, muporofita Hanania ṅwana wa Asuru, we a vha a tshi bva Gibioni, a nngwana ndi nḓuni ya Muṋe washu hu na vhotshifhe na vhathu vhoṱhe, a amba na nṋe a ri,

² “Muṋe washu Mulangazwoṱhe Mudzimu wa Israele u ri, ‘Ndi ḓo vunḓa dzhogo ya khosi ya Babele.

³ Hu sa athu fhela miṅwaha mivhili ndi ḓo humisa thundu dza nnḓu ya Muṋe washu nda dzi ḓisa hafhano, hedziḽa dze Nebukhadnetsara khosi ya Babele a dzi hwala hafhano a dzi isa Babele.

⁴ Na khosi ya Juda, Jehoyakhini ṅwana wa Jehoyakimu ndi ḓo mu vhuedzedza hafhano, na mathubwa oṱhe a bvaho Juda e a hwalwa a iswa Babele; ndi ḓo vunḓa dzhogo ya khosi ya Babele. Ho amba Nṋe Yahavee.’ ”

⁵ Ndi hone muporofita Jeremia a tshi fhindula muporofita Hanania a tshi pfiwa nga vhotshifhe na vhathu vhoṱhe vhe vha vha vho ima ngomu nḓuni ya Muṋe washu.

⁶ A ri, “Amen! Ngavhe Muṋe washu a tshi ita nga u ralo! Ngavhe Muṋe washu a tshi khunyeledza maipfi e na a porofita! Ngavhe a tshi dzhia thundu ya nnḓu ya Muṋe washu ngei Babele a i vhuedzedze fhano khathihi na mathubwa oṱhe.

⁷ Huno thetshelesani zwine nda ḓo amba inwi na vhathu vhoṱhe ni tshi zwi pfa, ndi ri:

⁸ Vhaporofita vhe vha ri ranga phanḓa nṋe na inwi, tsha kale-kale vho ḓi porofita a nndwa na khombo na dwadze zwe zwa pfi zwi ḓo wela mashango manzhi na mivhuso mihulu.

⁹ Hone muporofita ane a porofita uri hu ḓo vha na mulalo, u ḓo pfi nangoho o ruṅwa nga Muṋe washu arali zwe a ḓivhadza zwa itea.”

¹⁰ Ndi hone muporofita Hanania a tshi rula dzhogo i re mutsingani wa muporofita Jeremia a i vunḓekanya,

¹¹ a amba a tshi pfiwa nga vhathu vhoṱhe a ri, “Muṋe washu u ri, ‘Ndi ḓo vunḓekanya dzhogo ya Nebukhadnetsara khosi ya Babele nga u ralo, nda i rula mutsingani wa tshakha dzoṱhe hu sa athu fhela miṅwaha mivhili.’ ” Ndi hone muporofita Jeremia a tshi ḓiṱutshela.

¹² Musi muporofita Hanania a tshi kha ḓi bva u vunḓa dzhogo ye a i rula mutsingani wa muporofita Jeremia, ipfi ḽa Muṋe washu ḽa ḓa ha Jeremia ḽa ri,

¹³ “Iyo vhudza Hanania u ri, ‘Yahavee u ri: Wo vunḓa dzhogo ya thanda, vhudzuloni hayo u ḓo wana dzhogo ya tsimbi.

¹⁴ Nṋe Yahavee Mulangazwoṱhe Mudzimu wa Israele ndi ri: Tshakha dzoṱhe hedzi ndi ḓo dzi hwesa dzhogo ya tsimbi mitsingani nda dzi ita phuli dza Nebukhadnetsara khosi ya Babele, dzi ḓo mu shumela. Ndi ḓo ita uri a vhuse na dzone phukha dza ḓaka!’ ”

¹⁵ Ndi hone muporofita Jeremia a tshi ya a vhudza muporofita Hanania a ri, “Inwi Hanania thetshelesani! A no ngo rumiwa nga Muṋe washu, nangwe zwo ralo no ita uri lushaka holu lu fulufhele mazwifhi.

¹⁶ Zwenezwo, Muṋe washu u ri, ‘Ndi ḓo ṱuwa ndi tshi u sudzulusa shangoni. Ṋaṅwaha u ḓo fa, nge wa funzedza vhathu u shandukela Nṋe Yahavee.’ ”

¹⁷ Nga ṅwedzi wa vhuṱanu na vhuvhili wa ṅwaha wonoyo, muporofita Hanania a mbo ḓi fa.