JEREMIA 21 - BIVHILI KHETHWA Mafhungo Madifha

Khombo i ḓo wela Tsedekia khathihi na Jerusalema

¹ Khosi Tsedekia o vhuya a ruma Phashuru ṅwana wa Malikhiya na tshifhe Tsefania ṅwana wa Maaseya ha Jeremia, vha ri,

² “Kha vha dzou ri vhudzisela ha Muṋe washu; Nebukhadnetsara Khosi ya Babele u khou ri dia. Khamusi Muṋe washu u ḓo ri itela maḓembe unga zwiḽa kale, Nebukhadnetsara a ri humela.”

³ Ndi hone Jeremia a tshi vha fhindula a ri, “Vhudzani Tsedekia ni ri,

⁴ ‘Muṋe washu Mudzimu wa Israele u ri: Zwihali zwa nndwa zwe na fara, zwine na khou lwa ngazwo na khosi ya Babele na Vhakhaladia vhane vha ḓo ni govhela nnḓa ha mutsheṱo, ndi ḓo ṱuwa ndi tshi zwi rembulusa zwa ḽa inwi. Ndi ḓo kuvhanganya maswina ngomu ha muḓi houno,

⁵ Nṋe muṋe nda angaladza tshanḓa nda lwa na inwi nga maanḓa anga, ndó sinyuwa, ndó dinalea, ndí mbitini khulu.

⁶ Ndi ḓo vhulaha vha no dzula muḓini uno, vhathu na phukha; vha ḓo fa nga dwadze ḽi ofhisaho.

⁷ Hu ḓo ri ho no fhira izwo, nda dzhia Tsedekia khosi ya Juda na vhahulwane vhawe na vhathu vha muḓi houno vhe vha sala u fa hu tshi ḓa dwadze na pfumo na nḓala, nda vha kumedza Nebukhadnetsara khosi ya Babele na maswina avho ane a ṱoḓa u vha vhulaha. U ḓo vha vhulaha nga pfumo; ha nga vha khathutsheli, ha nga iti nga tshilidzi, ha nga vha pfeli vhuṱungu. Ho amba Nṋe Yahavee!’

⁸ “Dovha u vhudze vhathu u ri, ‘Yahavee u ri: Vhonani, ndi khou ni vhetshela nḓila i isaho vhutshiloni na i yaho lufuni.

⁹ Ane a sala o dzula muḓini houno u ḓo fa nga pfumo na nḓala na dwadze. Hone ane a bvela nnḓa a yo ḓikumedza Vhakhaladia vho ni govhelaho, onoyo u ḓo tshila; tshine a ḓo shavha natsho ndi vhutshilo hawe.

¹⁰ Ndo vhofha ḽa u huvhadza muḓi hoyu, a thi nga u tondi. U ḓo kumedzwa zwanḓani zwa khosi ya Babele, a u fhisa nga mulilo. Ho amba Nṋe Yahavee.’

Khaṱhulo ya mahosi mavhi a Juda

¹¹ “Hafhu u vhudze nnḓu ya vhuhosi ya Juda u ri, ‘Ipfani ipfi ḽa Yahavee:

¹² Inwi vha nnḓu ya Dafita, Yahavee u ri: Misi yoṱhe ḽi tshi tsha nga hu haṱulwe nga khaṱhulo mbuya, we a ṱangulwa nga a lamulelwe zwanḓani zwa mutambudzi wawe; na sa ralo mbiti dzanga dzi ḓo pwashea dza fhisa unga mulilo nga vhuvhi he na ita, dza fhisa ha si vhe na a dzi dzimaho.

¹³ Iwe Jerusalema u no dzula nṱha ha muvhundu wa makwara wo ingamela govha, wa ri: Ndi nnyi ane a nga kona u lwa na Nṋe? Ndi nnyi ane a nga kona u dzhena vhushavheloni hashu? Nṋe muṋe ndi lwa na iwe. Ho amba Nṋe Yahavee.

¹⁴ Ndi ḓo u lifhedza ndi tshi tevhedza zwiito zwau. Ndi ḓo vhasa mulilo maṱakani au wa fhisa zwoṱhe zwo u tangaho zwe lore.’ ”