JEREMIA 18 - BIVHILI KHETHWA Mafhungo Madifha

Jeremia nḓuni ya muvhumbi wa dzikhali

¹ Muṋe washu o vhudza nṋe Jeremia a ri,

² “Tsela nḓuni ya muvhumbi wa khali, ú henengei ndi ḓo u vhudza mafhungo anga.”

³ Ndi hone ndi tshi tsela nḓuni ya muvhumbi wa khali, nda wana a tshi khou vhumba.

⁴ Hone khali ye a vha a tshi khou vhumba nga vumba ya wanala yo vhifha, ene a ḓi ḽi dzhia a vhumba iṅwe khali, a i vhumba uri a vhone yo mu nakela.

⁵ Ndi hone Muṋe washu a tshi mmbudza a ri,

⁶ “Inwi vhathu vha Israele, Nṋe ndi nga si ni ite unga uyo muvhumbi naa? Na inwi ní zwanḓani zwanga ni nga vumba ḽi zwanḓani zwa muvhumbi.

⁷ Tshiṅwe tshifhinga ndi a ḓivhadza uri lushaka kana muvhuso u ḓo tupulwa wa tekuwa wa lozwiwa,

⁸ hone arali lushaka lwonolwo lwe nda lu kaidza lwa laṱa vhuvhi halwo, zwenezwo ndi ḓo lu khathutshela nda si tsha lu ḓisela khombo ye nda vha ndo i humbula.

⁹ Tshiṅwe tshifhinga nda ḓivhadza uri muvhuso kana lushaka lu ḓo fhaṱiwa, lwa simiwa,

¹⁰ hone arali nda vhona lu tshi tshinya, lu sa nthetshelesi, zwenezwo ndi nga si tsha lu itela zwivhuya zwe nda vha ndi tshi ri ndi ḓo lu itela.

¹¹ Zwino-ha vhudza vhathu vha Juda na vha dzulaho Jerusalema u ri, ‘Yahavee u ri: Vhonani! Ndi khou ni kela ṱhamu, ndi khou ni dzudzanyela ndozwo. Zwenezwo laṱani maitele aṋu mavhi, nga muthihi nga muthihi, kutshilele kwaṋu na zwiito zwaṋu zwi vhe zwivhuya.’

¹² Hone vhone vha ḓo fhindula vha ri, ‘Zwi farisa mini? Riṋe ri ḓo ḓi isa phanḓa zwe ra ḓidzudzanyela, roṱhe ri ḓo ita zwe ra funzedzwa nga mbilu dzashu mmbi dza tshipimbi.’ ”

Vhathu vha tshi landula Yahavee

¹³ Muṋe washu u ri, “Vhudzisani dzitshakha arali vho no vhuya vha pfa zwi no nga sa hezwi. Israele o vha a tshi nga musidzana a sa ḓivhi munna, hone zwino o ita zwi nengisaho.

¹⁴ Miṱumba ya Libanoni ya matombo yo no vhuya ya dzula i si na gabugu naa? Maḓi ayo a rotholelaho a no bva zwisimani zwa kule o no vhuya a xa naa?

¹⁵ Naho zwo ralo vhathu vhanga vho nkhangwa, vha vho dubisela midzimu i sa tshidzi zwioro, yeneyo midzimu ye ya vha khukhula nḓilani dzavho dze vha tshimbila ngadzo kale. Yo ita uri vha tshimbile nḓilani dza nga matungo na magondoni a songo khurwaho.

¹⁶ Shango ḽavho ḽi ḓo sala ḽi soga, ḽa vha tshinyadziwa tsha lini na lini; vhoṱhe vhafhiri vha nḓila zwi ḓo vha tshenusa vha dzinginyisa dziṱhoho.

¹⁷ Ndi ḓo vha balanganya phanḓa ha maswina avho vha nga buse ḽi tshi vhudzulwa nga muya wa vhubvaḓuvha; ndi ḓo vha furalela vha si vhone tshifhaṱuwo tshanga musi vho welwa nga khombo.”

Jeremia a tshi langanwa

¹⁸ Ndi hone vhathu vha tshi ri, “Nga ri langane Jeremia! Hu ḓo ḓi dzula hu na vhotshifhe vhane vha ri laya, vhaṱali vha ḓo ḓi ri eletshedza, vhaporofita vha ḓo ri vhudza ipfi ḽa Midzimu. Nga ri mu fashe nga maipfi awe, nahone zwine a amba ri songo tsha zwi londa.”

¹⁹ Muṋe washu, nthetshelese, ipfa zwine vhapomoki vhanga vha amba!

²⁰ Zwivhuya zwo fanela u lifhedzwa nga zwivhi naa? Hone vho mmveela khunḓa uri ndi fashwe. Elelwa zwe nda ima phanḓa hau ndi tshi vha imelela uri mbiti dzau dzi si vha wele.

²¹ Zwenezwo vhana vhavho nga vha fe nga nḓala, vha kudze u vha kumedze pfumo. Vhasadzi vhavho nga vha sale vha si na vhana, vhe dzitshilikadzi, vhanna vhavho nga vha vhulawe, vhaṱhanngana vhavho vha ḽiwe nga pfumo nndwani.

²² Nḓuni dzavho nga hu pfala tshililo, musi u tshi ruma vhaṱanguli, vha sokou tshenuwa vho tshoṱhelwa, nge vha mmveela khunḓa uri vha mpfashe, vha ita na u nthetshela zwikwekwe.

²³ Huno Iwe Muṋe washu u a ḓivha zwoṱhe zwe vha nndangana uri vha mmbulahe. U songo vha hangwela milandu yavho, u songo thutha vhutshinyi havho wa si tsha vhu vhona. Nga vha tekulwe u tshi zwi vhona, tshine wa vha ita vha ite wo sinyuwa.