JEREMIA 15 - BIVHILI KHETHWA Mafhungo Madifha

Mudzimu o haṱula bangakupalula

¹ Zwenezwo Muṋe washu a mphindula a ri, “Naho Mushe na Samuele vho vha vha tshi nga pfumelela vhathu havha, ndo vha ndi sa nga vha khathutsheli. A thi tsha funa u vha vhona! Vha thathe vha ṱuwe!

² Arali vha u vhudzisa vha ri, ‘Ri ḓo yafhi?’ vha vhudze uri, ‘Vho livhanywaho na lufu nga vha fe, vho livhanywaho na pfumo nga ḽi vha ḽe; vho livhanywaho na nḓala nga vha ṋoke; vho livhanywaho na u thubwa nga vha thubiwe.’

³ Nṋe Yahavee ndi ḓo vha ḓisela ndozwo dza tshakha nṋa: Vha ḓo fhela nga pfumo, zwitumbu zwavho zwa khwikhwidzwa nga mmbwa, zwa ḽiwa nga maanga, vha pondiwa nga zwivhanda zwa ḓaka zwa vha lozwa.

⁴ Ndi ḓo ita uri mivhuso yoṱhe ya ḽifhasi i tshenuwe i tshi vhona zwine nda vha ita ndi tshi lifhedza zwe Manase ṅwana wa Hiskia khosi ya Juda a ita e Jerusalema.”

A hu tshee na khathutshelo

⁵ Muṋe washu u ri, “Iwe Jerusalema, ane a ḓo u lilela ndi nnyi? A no ḓo u pfela vhuṱungu ndi nnyi? A no ḓo u vhudzisa mulalo ndi nnyi?

⁶ Ndi iwe wo nndaṱaho wa ḓi mpfuralela. Zwenezwo ndo u fara nda u lozwa; a tho ngo tsha kona u kandeledza mbiti dzanga.

⁷ Ndo vha fhefhera nga luselo nda vha hashekanya khoroni dza miḓi ya shango. Vhathu vhanga ndo vha fhedzela vhana nda vha lozwa, nge vha si laṱe nḓila dzavho mmbi.

⁸ Nda andisa tshilikadzi dzavho dza fhira muṱavha wa lwanzhe. Masiari ḽí nṱha ha ṱhoho nda ḓisa mulozwi a lozwa vhaṱhannga kathihi fhedzi, vhomme avho vha sala vha tshi ofha vha tou tetemela.

⁹ Mme a vhana vhaṱanu na vhavhili o ṋoka a tou fhihamelwa. Ḓuvha ḽawe ḽo mu kovhelela hu tshee masiari, a shoniswa a tou hanganea. Vha salaho u fa vho ḽiwa nga pfumo ḽa maswina avho. Ho amba Nṋe Yahavee.”

Jeremia a tshi gungulela Muṋe washu

¹⁰ Mmawee, vho mmbebelani wee! Ndo rano ndi ṱwa ndi tshi hwelela shango nda ḽi isa khoroni. A thi athu vhuya nda adzima muṅwe tshi re tshanga, kana nda ḽa tsha muthu, naho zwo ralo ndi dzulela u teketelwa.

¹¹ Muṋe washu a fhindula a ri, “Ngoho ndi tshi u luṱanya na vhathu ndi itela uri zwi bveledze zwivhuya, ngoho ndi ḓo u farela lufhanga kha maswina au musi wa khombo na musi zwo vhifha.

¹² Munna a nga kona u vunḓa tsimbi – tsimbi i bvaho devhula – kana musinaseṱha?

¹³ Israele, lupfumo lwau lwe wa khokha ndi ḓo lu ṋea vhaṅwe nga fhedzi vha lu thuba, nga mulandu wa vhutshinyi hau hoṱhe ho ḓadzaho shango ḽa haṋu.

¹⁴ Ndi ḓo u ita phuli ya maswina au shangoni ḽine wa si ḽi ḓivhe, mbiti dzanga dzi ḓo funga mulilo u sa dzimi lini na lini.”

¹⁵ Zwenezwo nṋe nda ri, “Iwe Muṋe washu u a ṱalukanya; nnyelelwe u nndondole. Nndifhedzele vha ntovholaho. U songo mphelela mbilu wa nnzhavhula nga mbiti dzau. Edzou vhona zwine nda nyadzelwa u ima na Iwe.

¹⁶ Maipfi au o ri u wanala nda a ḽa, o vha one dakalo ḽanga; ndi tshi pfi ndi muḓinḓa wau, Iwe Muṋe washu Mudzimu Mulangazwoṱhe, nda pfa zwi tshi takadza mbilu yanga.

¹⁷ A tho ngo kona u dzula na vhathu vhe kha madakalo avho nda takala navho; ndo dzula ndi ndoṱhe ngauri tshanḓa tshau tsho vha tshi kha nṋe, wa ri ndi muḓinḓa wau, wa ita uri ndi dinalee nga zwe nda vhona.

¹⁸ Ndi mini vhuṱungu hanga vhu sa fheli, na mbonzhe yanga i tshi rema i sa lafhei? Khezwi u tshi vho nga mulambwana une wa mphura, wa nga tshisima tshi no xa?”

¹⁹ Muṋe washu a fhindula a ri, “Arali wa vhuya kha Nṋe, ndi ḓo u vhuedzedza mushumoni wau wa ntshumela. Arali wa amba zwo teaho, wa si tsha amba maipfi a si na mushumo, u ḓo vha mulomo wanga. Vhathu havha nga vha tevhele iwe, iwe u songo tevhela vhone.

²⁰ Ndi ḓo u ita mutsheṱo wa vhathu havha, mutsheṱo wa musinaseṱha. Vha ḓo lwa na iwe vha si u kunde, ngauri Nṋe ndi ḓo vha na iwe, ndi ḓo u lamukisa nda u tshidza.

²¹ Ndi ḓo u lamulela zwanḓani zwa vhavhi, nda u tshidza zwanḓani zwa vha tshiṱuhu. Ho amba Nṋe Yahavee.”