JEREMIA 14 - BIVHILI KHETHWA Mafhungo Madifha

Gomelelo ḽi ofhisaho (Jer. 14:1 – 15:4)

¹ Ngeḽi ipfi ḽa Muṋe washu a tshi vhudza Jeremia nga gomelelo, o ri,

² “Juda ḽi khou vusa tshililo, miḓi yaḽo yo ṋoka; vha lilela shango, Jerusalema hu pfala zwililo.

³ Vhahulwane vha ruma vhashumi vhavho u yo vha kela maḓi; vha tshi swika zwisimani vha wana hu si na maḓi. Vha huma na mvuvhelo dzavho dzi si na tshithu, vha hanganea, vha khurumela nga ṱhoni.

⁴ A hu na mvula, mavu o balea, vhalimi vho kulea nungo, vho shona.

⁵ Na phala ngei ḓakani ya dzwala i ṅala ṋamana yayo nga u shaya pfulo.

⁶ Mbiḓi dzi ima miṱumbani ya mivhundu yo omelelaho, dza femeleka unga phunguhwe; dzo kovhedza maṱo nga u shaya hatsi.”

Thabelo ya Jeremia misi ya gomelelo

⁷ “Muṋe washu, nangwe milandu yashu i tshi ri hwelela, ri farise u tshi itela dzina ḽau. U u shandukela hashu ndi huhulu; ro khakhela Iwe.

⁸ Fulufhelo ḽa Israele ndi Iwe; ndi Iwe Mutshidzi wavho musi wa khombo. Khezwi u tshi nga mutsinda shangoni ḽau, u tshi nga mufhiri a no tou lala lwa khofhe?

⁹ Khezwi u tshi tou nga munna o ḓaḓaho, u tshi nga muhali a si na maanḓa a u tshidza muthu? Iwe Muṋe washu u dzula na riṋe, ri vhidzwa nga dzina ḽau, u songo ri furalela!”

Jeremia a tshi dzivhiswa u rabelela vhathu

¹⁰ Muṋe washu a tshi amba vhathu avha u ri, “Vha funesa u bva nḓilani, a vha humisi milenzhe yavho. Ndi zwine nda si vha takalele, zwino ndi ḓo elelwa milandu yavho, nda vha lifhedza vhutshinyi havho.”

¹¹ Ndi hone Muṋe washu a tshi mmbudza a ri, “U songo tsha rabela uri havha vhathu zwi vha nakele.

¹² Naho vha ḓidzima a thi nga thetshelesi tshililo tshavho; nangwe vha nṋekedza zwiṱhavhelo zwi fhiswaho na dzinduvho, a thi nga zwi ṱanganedzi. Tshine nda ḓo ita ndi u vha lozwa nga pfumo na nḓala na dwadze.”

¹³ Zwenezwo nṋe nda ri, “Muṋe wa zwoṱhe Muṋe washu, vhaporofita ndi vhone vhane vha ḓi endela u vha vhudza vha tshi ri, ‘A ni nga ḽiwi nga pfumo kana na fa nga nḓala. Vhukuma ndi ḓo ni ṋea mulalo muhulu hafhano fhethu.’ ”

¹⁴ Muṋe washu a fhindula a ri, “Vhaporofita vha khou porofita mazwifhi nga dzina ḽanga. A tho ngo vha ruma, a tho ngo vha laedza, a tho ngo vhuya nda amba navho. Vha khou ni porofitela mabono a si a ngoho, vha ni bvumbela zwi sa tshidzi, ndi miloro ya u ḓihumbulela.

¹⁵ Huno Nṋe Yahavee ndi tshi amba havho vhaporofita vha no khou porofita nga dzina ḽanga ndí songo vha ruma, naho vha tshi ri, ‘A hu na pfumo ḽi no ḓo ḽa vhathu, shangoni a hu nga wi nḓala,’ ndi ri vhenevho vhaporofita vha ḓo ḽiwa nga pfumo, vha fa nga nḓala.

¹⁶ Na vhathu vhane vha khou pfa vhuporofita havho vha ḓo poswa mikotoni ya Jerusalema vhó fa nga nḓala na pfumo. A hu nga vhi na a no ḓo vha swiṱa, hu vhasadzi vhavho, hu vhana vhavho vha vhatuka, hu vha vhasidzana a vha nga swiṱwi. Ndi ḓo vha shululela khombo dzo vha teaho.”

Jeremia a tshi bula milandu ya lushaka lwa Israele

¹⁷ Muṋe washu o nndaya uri ndi vhudze vhathu nga maṱungu anga ndi ri, “Maṱo anga nga a bve miṱodzi i sa imi vhusiku na masiari, ngauri lushaka lwa hashu lwe lwa vha lu tshi nga musidzana a sa ḓivhi munna lwo pfulwa mbonzhe khulu, lwo huvhala zwi si na vhukono.

¹⁸ Arali nda bva muḓini ndi vhona vhe vha ḽiwa nga pfumo; arali nda dzhena muḓini ndi vhona vhathu vha no khou ṋoka nga nḓala. Hu vhaporofita, hu vhotshifhe, vhoṱhe vho hanganea, vha khou tendeleka na shango unga vhashavhi.”

¹⁹ Muṋe washu, wo laṱa Juda tshoṱhe naa? Nṋa u vho nengwa Tsioni? Khezwi wo ri huvhadza lu sa lafhei? Ro vha ro lavhelela mulalo, hone a hu na na tshivhuya tsho ḓaho, ra lavhelela u laxwa ha ḓa zwi ofhisaho fhedzi.

²⁰ Muṋe washu, vhuvhi hashu ri a vhu vhona, milandu ya vhokhotsi ashu ri a i ḓivha, ngoho ro u khakhela.

²¹ U songo ri nyadza, ri hangwele u tshi itela dzina ḽau; u songo litsha u hulisa khuluṋoni yau ya vhugala. Elelwa mulanga we wa vhofha na riṋe, u songo u vhofholola.

²² Nṋa midzimu ya dzitshakha i si tshithu i a kona u nisa mvula? Lutombo lu a suṱisa vhusuṱo nga lwoṱhe naa? A si Iwe Muṋe washu, Mudzimu washu, a no shuma hezwo naa? Ndi zwine ra lavhelela Iwe, ngauri ndi Iwe a no ita zwoṱhe hezwo.