JEREMIA 11 - BIVHILI KHETHWA Mafhungo Madifha

Vhaisraele vho vhofholola mulanga

¹ Ngeḽi ipfi ḽo ḓaho ha Jeremia ḽi tshi bva ha Muṋe washu; ḽo ri

² a ambe na vhathu vha Juda na vha dzulaho Jerusalema, a ri, “Thetshelesani zwitiwa zwa mulanga we nda vhofha na inwi.”

³ Ḽa ri a vha vhudze uri Muṋe washu Mudzimu wa Israele u ri, “Ane a si thetshelese zwitiwa zwa mulanga o teketelwa.

⁴ Ndi mulanga we nda vhofha na vhomakhulukuku waṋu zwiḽa ndi tshi vha pfulusa Egipita, ndi tshi vha ṋula ṋanḓoni i ṋokisaho tsimbi, nda ri vha nthetshelese vha ite zwoṱhe zwine nda vha vhudza, ndi hone vha tshi ḓo vha vhathu vhanga, Nṋe nda vha Mudzimu wavho.

⁵ Na ralo ndi hone ndi tshi ḓo khunyeledza zwe nda anela vhomakhulukuku waṋu, nda ri ndi ḓo vha fha shango ḽi no ela mukhaha na ṋotshi, shango ḽine ṋamusi ḽa vha ḽaṋu.” Nṋe nda fhindula nda ri, “Amen! Ndi zwone Muṋe washu.”

⁶ Muṋe washu a mmbudza a ri ndi ḓivhadze maipfi haya oṱhe miḓini ya Juda na mikotoni ya Jerusalema, ndi ri, “Thetshelesani zwitiwa zwa mulanga ni zwi tevhedze.

⁷ Tshee nda pfulusa vhomakhulukuku waṋu Egipita u swika ṋamusi ndo ḓi vha kaidza ndo khwaṱhisa nda ri, ‘Nthetsheleseni!’

⁸ Hone vhone a vho ngo thetshelesa kana vha zwi dzhiela nzhele; tshavho ho vha u ita zwe vha funzedzwa nga mbilu dzavho mmbi dza tshipimbi. Ndi zwone, vhunga vha songo tevhedza ndaela dza mulanga wanga, ndi ḓo vha ita zwoṱhe zwi ofhisaho zwe nda fulufhedzisa u ita a no vhofholola mulanga.”

⁹ Ndi hone Muṋe washu a tshi mmbudza a ri, “Vhathu vha Juda na vha no dzula Jerusalema vho nnyitela tshimbevha.

¹⁰ Vho vhuelela zwivhini zwa vhomakhulukuku wavho vhe vha lamba u thetshelesa maipfi anga. Vho luvha miṅwe midzimu vha i shumela. Nnḓu dzoṱhe vhuvhili hadzo, ya Israele na ya Juda, vho vhofholola mulanga we nda vhofha na vhomakhulukuku wavho.

¹¹ Zwenezwo Nṋe Yahavee ndi ri, ‘Ndi ḓo vha ḓisela khombo ine vha nga si i ponyoke. Nangwe vha nṱavhela mukosi a thi nga vha thetshelesi.

¹² Vhathu vha miḓi ya Juda na vha Jerusalema vha ḓo yo huwelela midzimu ye vha i dubisela zwioro, hone musi khombo i tshi vha wela a i nga vhuyi ya vha farisa tshithu.

¹³ Iwe Juda, a hu na na muḓi wa Juda u si na mudzimu wawo usili, a hu na na mukoto fhano Jerusalema u si na aḽiṱari ye wa i fhaṱela u fhisa zwioro u tshi dubisela uḽa mudzimu u shonisaho u no pfi Baali.’

¹⁴ Jeremia, vhathu havha u songo vha rabelela, u songo vha luvhelelela kana wa vha humbelela; a thi nga thetshelesi musi vha tshi mmbidzelela zwo vhifha.”

Israele, muolivi wa Mudzimu

¹⁵ Muṋe washu a tshi amba lushaka lwawe u ri, “Mufunwa wanga u khou itani thembeleni yanga, hezwi a tshi khou luka vhunwa na vhanzhi? U vhona unga ṋama ya zwiṱhavhelo i nga mu tinyisa ṱhamu, a mbo ḓi dovha a pembela?”

¹⁶ Muṋe washu o vhuya a ri ni muolivi u titimaho, wa mitshelo ya tshivhumbeo tsho nakaho. Huno u ḓo ruma ḓumbu ḽa maanḓa ḽi titaho, matavhi awo a a fhisa nga nḓadzi a tou vunḓekana.

¹⁷ Muṋe washu Mulangazwoṱhe we a u ṱavha, u ri u ḓo welwa nga khombo, nge vha nnḓu ya Israele na vha nnḓu ya Juda vha ita vhuvhi vha mu ṱunga nga u dubisela Baali zwioro.

Jeremia a tshi langanwa

¹⁸ Muṋe washu o nnzumbululela zwe vha nndangana, nda zwi ḓivha, nga tshifhinga tshenetsho o ntsumbedza zwe vha vha vha tshi khou zwi ita.

¹⁹ Ndo vha ndi tshi nga ngwana ya vhulenda i tshi yo ṱhavhiwa; ndo vha ndi sa ḓivhi uri vho nndangana, vha tshi ri, “Nga ri tupule muri wo takala, nga ri mu tumule shangoni ḽa vha tshilaho, uri dzina ḽawe ḽi si tsha vhuya ḽa humbulwa.”

²⁰ Huno Iwe Muṋe washu Mulangazwoṱhe, u tshi haṱula a u ṱaluli, u ṱola mbilu na muhumbulo, kha ndi vhone u tshi vha lifhedza, hufha ndo ḓikumedza Iwe.

²¹ Zwenezwo Muṋe washu a tshi amba vhanna vha Anathotho vhane vha ṱoḓa u nndya ṱhoho vha tshi ri, “U songo porofita nga dzina ḽa Yahavee; wa vhuya wa porofita, ri a u vhulaha!”

²² Muṋe washu Mulangazwoṱhe u ri, “Ndi ḓo vha laṱisa. Vhaṱhannga vhavho vha ḓo fa nga pfumo, vhana vhavho vha vhatuka na vha vhasidzana vha ḓo ṋoka nga nḓala.

²³ A hu nga vhi na a no sala, vhanna vha Anathotho vha ḓo welwa nga khombo musi ndi tshi vha lifhedza.”