JEREMIA 10 - BIVHILI KHETHWA Mafhungo Madifha

Mudzimu na midzimu ya zwifanyiso

¹ Inwi Vhaisraele, ipfani zwine Muṋe washu a ni vhudza.

² U ri, “Ni songo guda maitele a dziṅwe tshakha, ni songo ofha zwiga zwi re lutomboni, unga tshakha dziṅwe dzi tshi zwi ofha.

³ Ḓivhani uri vhurereli ha dziṅwe tshakha a si tshithu; vha rema muri ḓakani, mutsila a u senda nga musendo.

⁴ Vha u ṱama nga siliva na musuku; vha u ṱanganya nga hamula na zwibigiri uri u si we.

⁵ Midzimu yavho ya zwifanyiso a i koni u amba, i nga tshishushedzazwiṋoni tsimuni ya mabvani; a i koni u tshimbila, i tou hwalwa. Inwi ni songo i ofha, a i huvhadzi, na tshivhuya na tshithihi i nga si ni itele.”

⁶ Iwe Muṋe washu, a hu na ane a nga Iwe; u muhuluhulu, dzina ḽau ḽi na maanḓa, ḽi fhira zwoṱhe.

⁷ Ndi nnyi ane a nga si u ofhe, Iwe Khosi ya dzitshakha? Hezwi ndi zwone zwo u teaho. Kha vhaṱali vha tshakha dzoṱhe, mivhusoni yavho yoṱhe, a hu na a no nga Iwe.

⁸ Vhoṱhe a vha na nzhele, vha nga phukha, vha funzwa nga midzimu ya zwifanyiso i si tshithu. Ndi thanda.

⁹ Siliva yazwo yo fulwaho i bva Tharashishi, musuku u bva Ufasi. Zwe vhatsila na vhafuli vha ita zwo ambadzwa sila ḽa denga na muridili ḽo lukwaho nga vhashumi vhomakone.

¹⁰ Huno Muṋe washu ndi Mudzimu wa ngoho; ndi Mudzimu a tshilaho, ndi Khosi ya lini na lini. A sinyuwa, ḽifhasi ḽi a dzinginyea; dzitshakha dzi nga si kone u konḓelela mbiti dzawe.

¹¹ (Vha vhudzeni uri midzimu heyo i songo sikaho lutombo na shango i ḓo lovha ya si tsha vha hone fhano shangoni na fhasi ha lutombo).

Luimbo lwa u renda Mudzimu

¹² Mudzimu Ene o vhumba ḽifhasi nga maanḓa awe; o tea shango nga vhuṱali hawe, o ṱharamudza lutombo nga ṱhalukanyo yawe.

¹³ A kaidza, maḓi a ṱaḓulu a a bvuma; u takusa makole migumoni ya ḽifhasi. U ruma lupenyo mvula ya mbo ḓi hwaa, a bvisa muya zwisikuni zwawe.

¹⁴ Vhathu vhoṱhe a vha na nzhele, vha nga phukha, a vha na nḓivho; vhafuli vha musuku vha a shona vha tshi vhona zwitungulo zwe vha fula. Midzimu yavho ya zwifanyiso ndi ya khole-khole, hufha na u fema zwi sa femi.

¹⁵ A zwi na mushumo, ndi matambavhana, hu tshi swika tshifhinga tsha khaṱhulo zwi ḓo lovha.

¹⁶ Mudzimu wa Jakopo ha ngi zwone, Ene ndi Musiki wa zwithu zwoṱhe, Israele ndi vhathu vhe a ḓiwanela. U pfi Muṋe washu Mulangazwoṱhe.

Phusuphusu dzi ḓaho

¹⁷ Inwi vhathu vha Jerusalema, no govhelwa, kuvhanganyani thundu yaṋu ni pfuluwe.

¹⁸ Muṋe washu u ri, “Zwino vhoṱhe vha no dzula shangoni ḽino ndi ḓo vha kudza kule; ndi ḓo vha ḓisela khombo uri vha thubiwe.”

¹⁹ Vhathu vha Jerusalema vha tshema vha ri, “Ndi na khombo nṋe ndo huvhalaho! Mbonzhe yanga a i lafhei! Nda ḓivhudza nda ri, ‘Uvhu ndi vhulwadze hanga, ndi fanela u vhu konḓelela.’

²⁰ Dennde yanga yo tupukanywa; thambo dzoṱhe dzo ṱhukhuwa. Vhana vhanga vho nṱutshela, a vha tsheeho; zwino a hu tshee na o salaho a no ḓo akha dennde yanga, kana a ntsongela mutumba.

²¹ Vhalisa a vha na nzhele, vha vho nga phukha, a vha humbeli Muṋe washu a vha endedza; ndi zwine zwa si vha nakele, masambi a nngu dzavho oṱhe o balangana.

²² Thetshelesani! Hu khou ḓa mafhungo! Ndi mufhirifhiri u bvaho shangoni ḽa devhula! U ḓo ita uri miḓi ya Juda i sale i si na muthu, hu ḓo sala ho dzula phunguhwe fhedzi.”

Thabelo ya Jeremia

²³ Muṋe washu, ndi a zwi ḓivha uri vhutshilo ha muthu a si hawe; a si ene a tshimbidzaho ṋayo dzawe.

²⁴ Muṋe washu, nkhakhulule nga vhulenda, hu si nga mbiti, u sa ḓo nndozwa nda si tsha vha hone.

²⁵ Shululela mbiti dzau kha tshakha dza vhannḓa dzi sa u luvhi, dzi sa u rabeli. Ndi vhone vhe vha mila Jakopo; vha mu fhedza tshoṱhe, vha phusukanya shango ḽa hawe.