JEREMIA 1 - BIVHILI KHETHWA Mafhungo Madifha

Bugu ya Jeremia

¹ Haya ndi mafhungo a Jeremia, ṅwana wa Hilikia, muṅwe wa vhotshifhe vha Anathotho shangoni ḽa Benyamini.

² Ipfi ḽa Muṋe washu ḽo ḓa khae nga ṅwaha wa 13 wa muvhuso wa Josiasi ṅwana wa Amoni khosi ya Juda,

³ na musi hu tshi vhusa Jehoyakimu ṅwana wa Josiasi khosi ya Juda, u swika nga ṅwedzi wa vhuṱanu wa ṅwaha wa 11 wa muvhuso wa Tsedekia ṅwana wa Josiasi khosi ya Juda, musi vhathu vha Jerusalema vha tshi iswa vhuthubwani.

U vhidzwa ha Jeremia

⁴ Ipfi ḽa Muṋe washu ḽo ḓa ha nṋe ḽa ri,

⁵ “Ndi sa athu u vhumba muvhilini wa mme au ndo vha ndo dzula ndo u nanga; ndo u nangela mushumo wanga u sa athu bebwa; ndo u khetha uri u yo ḓivhadza dzitshakha zwine nda zwi funa.”

⁶ Nṋe nda ri, “Yawee, Muṋe wa zwoṱhe Muṋe washu, a thi koni u amba, hufha ndi tshee muṱuku.”

⁷ Huno Muṋe washu a mmbudza a ri, “U songo ri u kha ḓi vha muṱuku. Wo fanela u ya kha muṅwe na muṅwe ane nda u ruma khae, wa amba zwoṱhe zwe nda u vhudza.

⁸ U songo vhuya wa vha ofha, Nṋe ndi na iwe, ndi ḓo u lamukisa. Ho amba Nṋe Yahavee!”

⁹ Ndi hone Muṋe washu a tshi onyolosa tshanḓa tshawe, a kwama mulomo wanga, a ri, “Zwino ndo longa maipfi anga mulomoni wau.

¹⁰ Vhona, ṋamusi ndo u vhea uri u lange dzitshakha na mivhuso; u ḓo tupula, wa pwashekanya, wa lozwa, wa thutha; u ḓo fhaṱa, wa ṱavha.”

Mabono mavhili

¹¹ Ipfi ḽa Muṋe washu ḽo ḓa ha nṋe ḽa ri, “Jeremia, u khou vhona mini?” Nṋe nda fhindula nda ri, “Ndi khou vhona davhi ḽa muri u no pfi Mulindi.”

¹² Muṋe washu a mmbudza a ri, “Wo zwi vhona zwavhuḓi. Ndo lindela u khunyeledza zwe nda amba.”

¹³ Ipfi ḽa Muṋe washu ḽa dovha ḽa ḓa kha nṋe ḽa ri, “U khou vhona mini?” Nṋe nda fhindula nda ri, “Ndi khou vhona khali i vhilaho i tshi bva devhula yo tshingamela ngeno.”

¹⁴ Muṋe washu a mmbudza a ri, “Hu ḓo ḓa khombo i tshi bva devhula ya shululelwa kha vhoṱhe vha tshilaho fhano shangoni.

¹⁵ Ndi ḓo ṱuwa ndi tshi vhidza tshakha dzoṱhe dza mivhuso ya devhula. Mahosi adzo a ḓo ḓa a imisa khuluṋoni dzao mafhoroni a khoro dza Jerusalema, na u mona na mitsheṱo yawo, na miḓini yoṱhe ya Juda.

¹⁶ Ndi ḓo haṱula vhathu vhanga nge vha tshinya nga u mpfuralela, nge vha fhisela miṅwe midzimu zwioro, vha luvha zwifanyiso zwe vha vhumba nga zwanḓa zwavho.

¹⁷ Iwe ḓilugise! Takuwa u yo vha vhudza zwoṱhe zwine nda u vhudza. U songo vha ofha; arali wa vha ofha, Nṋe ndi ḓo u dzhenisa nyofho vha tshi zwi vhona.

¹⁸ Ṋamusi ndo u ita muḓi wo tangwaho nga mitsheṱo, ndo u ita phuphu ya tsimbi, ndo u ita luvhondo lwa musinaseṱha lune lwa ḓo kunda shango ḽoṱhe – mahosi a Juda na vhahulwane vhalwo na vhotshifhe vhalwo na vhathu vha shango.

¹⁹ Vha ḓo lwa na iwe vha si u kunde, ngauri Nṋe ndi na iwe, ndi ḓo u lamulela. Ho amba Nṋe Yahavee.”