JAKOPO 5 - BIVHILI KHETHWA Mafhungo Madifha

Vhapfumi vhavhi

¹ Hee inwi vhapfumi, lilani ni tou ṱavha mukosi nga u vhona u tambula hune ha khou ḓa.

² Lupfumo lwaṋu lwo sina; zwiambaro zwo ḽiwa nga tsole;

³ musuku waṋu na siliva zwo bva vhulali; honoho vhulali ndi vhuṱanzi vhune ha ni hwelela; vhu ḓo ḽa ṋama yaṋu ya nga yo swa nga mulilo, ngauri naho o no vha maḓuvha a vhufhelo, inwi ni kha ḓi khokha lupfumo.

⁴ Malamba e na dzima vhakaṋi vha masimu aṋu a khou ni ṱavhela mukosi; mukosi wa vhakaṋi wo no tou swika na nḓevheni dza Muṋe washu Mulangazwoṱhe.

⁵ No vha ni tshi ḽa zwiṋu fhano fhasi na ḓiphiṋa, na nonisa mbilu dzaṋu, zwino ḓuvha ḽa u ṱhavhiwa ḽo no swika.

⁶ No haṱula a si na mulandu na mu vhulaha a si vhuye a ḓilwela.

U sa fhela mbilu

⁷ Ndi zwone vha hashu, inwi ni songo fhela mbilu u swika Muṋe washu a tshi vhuya. Edzonu vhona uri mulimi u lindela hani a sa fheli mbilu mvula ya tseula na ya tshifhefho ya vhuya ya na, mavhele e a a zwala a vhuya a pakata khula dzine dza vha tshililelwa.

⁸ Na inwi zwi songo vhuya zwa ni dina, khwaṱhisani mbilu dzaṋu; hufha tshifhinga tsha u vhuya ha Muṋe washu tsho no vha tsini.

⁹ Vha hashu, ni songo gungulelana, ni sa ḓo haṱulwa. Muhaṱuli iṱali o no ḓi ima muṋangoni.

¹⁰ Edzisani vhaporofita vhe vha vha vhe dzomo ḽa Muṋe washu: vha tshi khakhelwa vho konḓelela vha si fhele mbilu.

¹¹ Vhe vha konḓelela zwingafhangafha ri ri vha na mashudu. Na inwi no no ḓi pfa zwa u konḓelela ha Jobo, na dovha na vhona zwivhuya zwe Mudzimu a fhedza nga u mu itela. Khezwo-ha: Muṋe washu u na khathutshelo na mbilutshilidzi.

Ri songo ana

¹² Zwihuluhulu vha hashu, ni songo ana. Ni songo ana nga ḽiṱaḓulu, kana nga ḽifhasi, naho tshi tshiṅwe-vho, uri ni sa ḓo ḓiovhela mulandu. Musi ni tshi tenda itani u ri, “Ee”, zwi vhe zwo fhela; ni tshi hanedza ni ri, “Aiwa”, zwi fhele.

Maanḓa a thabelo ya mutendi

¹³ Arali muṅwe waṋu e kha zwi konḓaho nga a rabele. Arali hu na o takalaho nga a imbe dza u renda Mudzimu.

¹⁴ Arali hu na a lwalaho nga a vhidze vhalisa vha tshivhidzo, vha mu ḓodze nga mapfura a muolivi, vha mu rabelele nga dzina ḽa Muṋe washu.

¹⁵ Thabelo iyo arali vha tshi fulufhela i ḓo tshidza mulwadze, Muṋe washu a mu vusa thovhoni. Naho a nga vha o tshinya u ḓo hangwelwa.

¹⁶ Zwenezwo arali no khakhelana ni humbelane khangwelo ni konou rabelelana uri ni fhole. Thabelo ya muvhuya i na maanḓa mahulu, i a shuma.

¹⁷ Elia o vha e muthu wa ṋama unga riṋe, hone o ri u rabela nga mbilu yoṱhe uri mvula i songo na, ya fhedza miṅwaha miraru na hafu i sa vhuyi ye tho.

¹⁸ Ndi hone a tshi dovha a rabela, mvula ya tou shuluwa, shango ḽa dovha ḽa bveledza khaṋo.

¹⁹ Vha hashu, arali muṅwe waṋu a pambuwa nḓilani ya ngoho, muṅwe a dovha a mu vhuedzedza khayo

²⁰ ḓivhani uri ane a laṱisa mutshinyi nḓila dza magombikwa a mu vhuedzedza kha ya ngoho, u ḓo vha o mu tshidza lufuni, ha thuthwa vhutshinyi vhunzhi-vhunzhi.