JAKOPO 4 - BIVHILI KHETHWA Mafhungo Madifha

U funa zwa shango na u ḓihudza

¹ Nndwa idzo dzaṋu na khani dzi vhangwa ngani? Izwi a si nyemulo idzo dzi kuḓanaho ngomu haṋu naa?

² Ni tama zwithu ni si zwi wane, zwino ni vho vhivhana na u vhulahana na ḓi kundwa u zwi wana, na fhedza nga u luṱana ya vho vha nndwa. Ni sa wani tshithu ndi ngauri a ni humbeli Mudzimu;

³ zwi ḓi nga naho na humbela a ni wani tshithu, ngauri thabelo yaṋu ndi mmbi, ni ṱoḓa u zwi tambisela nyemulo dzaṋu.

⁴ Mashandukwa ndinwi! A ni zwi ḓivhi uri u funa zwa shango ndi u vhenga Mudzimu naa? Ngauralo ane a ḓiimisela u pfana na zwa shango u vha swina ḽa Mudzimu.

⁵ Kani ni vhona unga ndi u sokou amba fhaḽa hune ha pfi, “Muya we Mudzimu a u sima kha riṋe u funa u tshi vha wawe fhedzi”?

⁶ Hone vhuthu vhune a ri itela vhu fhira zwoṱhe. Ndi zwine ha pfi, “Mudzimu u lwa na vhane vha ḓihudza, vha ḓiṱukufhadzaho a vha itela vhuthu.”

⁷ Zwo ralo ḓiṱukufhadzeni phanḓa ha Mudzimu, ni landule diabolo, ndi hone a tshi ḓo ni shavha.

⁸ Sendelani tsini ha Mudzimu, ndi hone na Ene a tshi ḓo sendela tsini haṋu. Hee inwi vhatshinyi, zwanḓa zwaṋu nga zwi kune; mbilu dzi ṱambe inwi vha mbilu mbili.

⁹ Ipfani vhuṱungu ni lile ni tou ṱavha mukosi. Maseo aṋu nga a shanduke zwililo, dakalo ḽi shanduke vhuṱungu.

¹⁰ Ḓiṱukufhadzeni phanḓa ha Muṋe washu, ndi hone a tshi ḓo ni hudza.

U solana

¹¹ Vha hashu, ni songo solana. Ane a sola wa hawe kana a mu haṱula, u sola na Mulayo a u nyadza. Huno arali u tshi nyadza Mulayo a u tshee mutevhedzi wawo, wo no vha munyadzi wawo.

¹² Muvhei wa mulayo na muhaṱuli ndi onoyo muthihi, ndi Mudzimu. Ndi Ene fhedzi ane a kona u tshidza muthu na u mu lozwa; huno iwe u tshi haṱula muṅwe u ḓiita nnyi?

U fulufhela Mudzimu fhedzi

¹³ Hee inwi vhane na ri, “Ṋamusi kana matshelo ri ḓo ṱuwa ra ya muḓini wa uri, ra fhedza ṅwaha henengei ri tshi vhambadza ra wana tshelede nnzhi”,

¹⁴ hufha ni sa zwi ḓivhi na uri ḽa matshelo ḽo ni farela zwifhio, na uri vhutshilo haṋu vhu ḓo vha hani. A ni zwi ḓivhi uri ni nga khuli ine ya ri u vhonali ya mbo ḓi vha yo balangana naa?

¹⁵ Inwi itani u ri, “Arali Muṋe washu a tshi zwi funa, ra tshila, ri ḓo ita itshi na tshiḽa”?

¹⁶ Hone ni endela u zuwa na ita na u ṱonga. U ṱonga honoho a si havhuḓi.

¹⁷ Hafhu u sa ita zwi re zwone hone u tshi zwi ḓivha, ndi u tshinya.