JAKOPO 3 - BIVHILI KHETHWA Mafhungo Madifha

U langa lulimi

¹ Vha hashu, ni songo ḓiita vhafunzi noṱhe; a ni zwi ḓivhi uri ṱhamu ya riṋe vhafunzi i ḓo vhavha u fhira ya vhaṅwe naa?

² Roṱhe ri anzela u khakha. Arali hu na muthu a sa vhuyi a khakha nga u amba, onoyo ndi muvhuya o khunyelelaho, u kona u langa na muvhili wawe woṱhe.

³ Bere ri i ambadza ḓomu uri ri i ise hune ra funa, ra vho langa muvhili wayo woṱhe nga heyo ḓomu.

⁴ Edzonu vhona na zwikepe: na u hula hazwo zwi tshi khadiwa nga maḓumbu mahulu, zwi ḓi tshimbidzwa nga tshitshimbidzi tshiṱukuṱuku zwa ya hune mutshimbidzi a funa.

⁵ Lulimi na lwone lwo tou ralo: ndi muraḓo muṱuku, hone lu zuwa zwihulu zwine lwa ita. Edzonu vhona uri ṱhase nthihi i nga fhisa dzanda ḽingafhani ḽa khuni.

⁶ Lulimi na lwone ndi mulilo, lu imela shango ḽoṱhe ḽa vhuvhi mivhilini yashu. Lu shata muvhili woṱhe tshika; lu funga vhutshilo hashu hoṱhe nga mulilo, lwone lwó fungwa heleni.

⁷ Phukha ya lushaka luṅwe na luṅwe i a fuiwa, na zwiṋoni, na ṋowa, kana khovhe, zwoṱhe zwi nga gudiswa nga muthu.

⁸ Lulimi lwone a hu na ane a nga lu kona. Ndi tshithu tshivhi tshi sa konei, tsho ḓalaho tshiganame.

⁹ Ndi lwone lune ra renda ngalwo Muṋe wa zwoṱhe Khotsi ashu, ra dovha ra teketela ngalwo vhathu vhe Mudzimu a vha sika a tshi ḓifanyisa,

¹⁰ mulomo u wonoyo muthihi wa shudufhadza wa dovha wa teketela muthu. Hezwo a si zwone vha hashu.

¹¹ Maḓi avhuḓi na a muṋo a nga ela a tshi bva tshisimani tshithihi naa?

¹² Vha hashu, nṋa muhuyu u a aṋwa nyolivi? kana munḓirivhe wa aṋwa mahuyu? Sa zwenezwo tshisima tsha maḓi a muṋo tshi nga si bveledze maḓi-maḓi.

Vhuṱali vhu bvaho kha Mudzimu, na kha shango, na kha Saṱhane

¹³ Arali hu na muṅwe waṋu a na vhuṱali na ṱhalukanyo, onoyo kha a sumbedze mishumo yawe nga kutshilele kwawe ku tamisaho, kwa vhulenda vhu bvaho kha vhuṱali.

¹⁴ Hone arali ni na muya wa u pikisana nga vhuhali na vivho, zwi laṱeni ni si tsha hanedza ngoho nga maṱaṱa na mazwifhi aṋu.

¹⁵ Vhuṱali ho raloho a vhu bvi kha Mudzimu, ndi ha shango, ndi ha tsiko mmbi ya muthu, ndi ha diabolo.

¹⁶ Hu re na muya wa u pikisana nga vivho, zwi vusa mifhirifhiri zwa ḓisa zwo vhifhaho zwa tshakha-tshakha.

¹⁷ Hone vhuṱali vhu bvaho kha Mudzimu tsha u ranga ho kuna, nahone vhu na mulalo, vhu na vhuthu, vhu ṱanganedza mihumbulo ya muṅwe, vhu na tshilidzi tshihulu na mishumo mivhuya minzhi, a vhu na tshiṱalula, a vhu na muhoyo.

¹⁸ Mulalo ndi tshikovha tsha vhuvhuya, vhu kaṋiwa nga vhaladzashango.