JAKOPO 2 - BIVHILI KHETHWA Mafhungo Madifha

Tshiṱalula

¹ Vha hashu, vhunga ni vhatendi vha Muṋe washu Yesu Khristo, Ene vhugala ha Mudzimu, ni songo vha na tshiṱalula.

² Kha ri dzou ri ni thabeloni, ha dzhena muthu o ambara dza maṱeleṱele, o ita na u ambara rinngi dza musuku, ha dzhena na mushai o ambara madzanganda,

³ na londola uyo o ambaraho zwavhuḓi na amba nae na ri, “Muṋe wanga, kha vha thukhe kha maalo ayo”, na amba na uḽa wa mushai na ri, “Ni nga ḓi ima zwaṋu, kana na dzula hafha fhasi tsini na milenzhe yanga” –

⁴ a si hone u ṱalulana na u elana nga mielo i si yone naa?

⁵ Edzonu pfa vha hashu, vhafunwa: Kani Mudzimu ho ngo nanga vhane shango ḽa vhona vhe vhashai, a vha pfumisa lutendo, uri vha vhe maḽaifa a muvhuso we a fulufhedzisa vhane vha mu funa naa?

⁶ Zwino inwi no nyadza vhashai. Vhapfumi a si vhone vhane vha ni kandeledza naa? A si vhone vhane vha ni khwikhwidzela tsengoni naa?

⁷ A si vhone vhane vha nyefula dzina ḽi huliseaho ḽa Khristo ḽine na vhidzwa ngaḽo naa?

⁸ Hone arali no khunyeledza mulayo muhulwane ni tshi tevhedza he ha ṅwaliwa ha pfi, “Funa muṅwe unga iwe muṋe”, ni ḓo vha no ita zwone.

⁹ Hone arali ni na tshiṱalula ni khou tshinya, ni khou pfuka Mulayo, ni ḓo haṱulwa ngawo.

¹⁰ Hafhu naho muthu a tshi nga tevhedza Mulayo woṱhe, hone a pfuka kuga kuthihi zwakwo, o no ḓiovhela mulandu wa u pfuka milayo yoṱhe.

¹¹ Onoyo Mudzimu we a laya a ri, “U songo ita vhupombwe”, u tshee onoyo we a dovha a amba a ri, “U songo vhulaha muthu”. Zwino naho u sa iti vhupombwe, arali wa vhulaha muthu wo no ḓi pfuka Mulayo.

¹² Ndi zwone, zwine na amba na zwine na ita, ni ite sa vhane vha ḓo sengiswa nga Mulayo une wa ri vhofholola.

¹³ A si na tshilidzi, na ene ha nga lilelwi musi wa khaṱhulo, hone wa mbilutshilidzi u ḓo pembela.

Lutendo na mishumo mivhuya

¹⁴ Vha hashu, zwi farisani arali muthu a tshi ri u na lutendo, ngeno a si na mishumo mivhuya? Lutendo lwo raloho lu nga mu tshidza naa?

¹⁵ Kha ri dzou ri hu na murathu kana khaladzi ane a dzula e na tsiku na nḓala,

¹⁶ muṅwe waṋu a mu vhudza a ri, “Kha vha tshimbile zwavho vho rudza mbilu, vha pfe vhududo vha ḽe vha fure”, hone a si mu ṋee zwiḽiwa kana zwiambaro, zwenezwo zwi farisani?

¹⁷ Na lutendo lwo ralo; arali lu sa vhonali nga mishumo lwo fa.

¹⁸ Muṅwe a nga u kaidza a ri, “Iwe u na lutendo, nṋe ngeno ndi na mishumo. Ntsumbedze-ha lutendo ulwo lwau lu si na mishumo, nṋe lwanga ndi ḓo u sumbedza nga mishumo yanga.”

¹⁹ A thi ri u ri u a tenda uri Mudzimu ndi muthihi? Ndi zwone: na madimoni a ḓi zwi tenda, hone a tshi tetemela nga nyofho.

²⁰ U tsilu ḽingafhani, a u vhoni uri lutendo lu si na mishumo ndi mahandana fhedzi naa?

²¹ Makhulukuku washu Abrahamu a tshi pfi muthu muvhuya ho ngo pfalwo nga mishumo yawe zwiḽa a tshi ṋekedza Mudzimu ṅwana wawe Isaka kha aḽiṱari naa?

²² A u vhoni: lutendo lwawe lwo shumisana na mishumo yawe, lutendo lwa khunyelela nga yone mishumo.

²³ Ndi hone hu tshi khunyelela aḽa e a ṅwalwa ha pfi, “Abrahamu o fulufhela Mudzimu, ndi zwe a pfi muvhuya ngazwo.” A dovha a pfi khonani ya Mudzimu.

²⁴ Afha ni khou zwi vhona uri muthu u pfi muvhuya nge a vha na mishumo mivhuya, hu si nga lutendo lu lwoṱhe.

²⁵ Hezwi zwi fana na zwa uḽa Rahaba wa phombwe. Hufha na ene o ḓo pfi muvhuya nga mishumo yawe, zwiḽa a tshi swielela dziḽa ṱholi nḓuni yawe a dovha a dzi nengisa nga iṅwe nḓila.

²⁶ Ngauralo, unga muvhili u si na muya wo fa, na lutendo lu si na mishumo lwo fa.