HOSIA 7 - BIVHILI KHETHWA Mafhungo Madifha

¹ “Musi ndi tshi ri zwi dovhe zwi nakele vhathu vhanga, ndi tshi lafha Israele, hu ḓo vhonala vhuvhi ha Efraimi, ha dzumbululwa vhutshinyi ha Samaria. Vha luka vhunwa, mafobvu a pwasha a dzhena dzinḓuni, mavemu a ṱangula vhathu mikotoni.

² Hone a zwi vhuyi zwa vha dzhena mbiluni uri ndi elelwa zwiito zwavho zwoṱhe zwivhi. Ndi zwone, vhuvhi havho ho vha tanga, a vhu ṱuwi maṱoni anga.

Vhunwa ha u vhulaha mahosi

³ “Vha itela khosi vhuṱambo uri vha mu takadze, hone vha na vhukwila; vha ramba na vhavhusi uri vha vha itele tshimbevha.

⁴ Vhoṱhe a vha fulufhedzei, vha fhisa unga ṋanḓo ine mubiki a litsha u i vhasedza a tshi khou suka bwindi ḽa vhurotho u swika ḽi tshi kukumuwa.

⁵ Musi wa vhuṱambo ha khosi yashu vha kambisa magota nga waini, khosi ya khaḓana na vhavhulahi vhayo.

⁶ Mbilu dzavho dzi nga ṋanḓo, vha ya khae vho mu lukela vhunwa. Mbiti dzavho dzi lala dzi tshi nyenga vhusiku hoṱhe, nga matsheloni dza duga unga khavhu ya mulilo.

⁷ Vhoṱhe vha fhisa unga ṋanḓo, vha vhulaha vhavhusi vhavho. Mahosi avho oṱhe o vhulawa, hone a hu na ane a nthabela uri ndi vha farise.

Vhaisraele vha tshi ḓitika nga tshakha dza vhannḓa

⁸ “Efraimi u vangana na dziṅwe tshakha, Efraimi u nga khekhe yo swaho nga u sa shandulwa.

⁹ Vhatsinda vha fhedza nungo dzawe, hone izwo ha ṱalukanyi uri zwi itwa ngani. U khou tshena mmvi a si na nzhele nazwo.

¹⁰ U ḓihudza ha Israele hu mu vhea mulandu, naho zwo ralo ha humeli ha Yahavee Mudzimu wawe kana a mu ṱoḓa.

¹¹ Efraimi ndi Maṱamela fhondo ḽa nzhivha, ḽi no aṱamela na vhaloi, u ranga u vhidzelela Egipita uri vha mu lamukise, hu si kale a gidimela ha Vhaashuru.

¹² Hoṱhe hune vha tshimbila hone ndi ḓo vha fasha nga mambule anga; ndi ḓo vha wisela fhasi vhunga zwiṋoni zwi fhufhaho. Musi ndi tshi pfa vha tshi kuvhangana, ndi ḓo vha fasha nda vha laṱisa.

¹³ Vha ḓo zwi vhona, vho pambuwa nḓilani yanga! Vha ḓo lozwiwa nge vha ntshandukela! Ndo ḓi vha lamukisa, vhone vha nnzwifhela.

¹⁴ A vha nthabeli zwi tshi bva mbiluni dzavho, vha sokou ongolela vhe vhulaloni havho vha tshi ḓitshetshekanya vha tshi ri midzimu i ḓo vha fha mavhele na waini ya tuvhu, Nṋe vha a mpfuralela,

¹⁵ naho ndo vha laya. Ndo vha khwaṱhisa, vhone vha nndukela vhunwa.

¹⁶ A vha rembulutsheli ha Waṱaḓuluṱaḓulu, vha nga vhura ho kombamaho vhu sa posi musevhe. Vharangaphanḓa vhavho vha ḓo vhulawa nga pfumo nga mulandu wa maipfi avho a u ḓihudza, vha ḓo sewa hani shangoni ḽa Egipita!”