HOSIA 6 - BIVHILI KHETHWA Mafhungo Madifha

Tshililo tsha Vhaisraele na phindulo ya Mudzimu

¹ Vhathu vha ri, “Iḓani ri vhuelele ha Muṋe washu, Ene o ri ṱhukhukanya, u ḓo dovha a ri fhodza. O ri huvhadza, u ḓo pomba mbonzhe dzashu.

² Hu ḓo ri u fhela maḓuvha mavhili a dovha a ri ṋea vhutshilo, nga ḓuvha ḽa vhuraru a dovha a ri vusa, uri ri dzule nae a tshi ri lisa.

³ Nga ri ḓivhe Muṋe washu, nga ri futelele u mu ḓivha. Vhukuma u ḓo bvelela unga ḓuvha ḽi tshi tsha, u ḓo ḓa ha riṋe unga mvula ya mibvumbi, u ḓo ḓa unga mvula dza tseula dzine dza ṋukadza ḽifhasi.”

⁴ Hone Muṋe washu u ri, “Iwe Efraimi, ndi ḓo tou u ita hani? Iwe Juda, ndi u ita hani? Hufha lufuno lwau lu tshi nga khuli ya nga matsheloni, lu tshi nga ṅwando une wa fhufha.

⁵ Ndi zwe nda ni vhaḓa nga vhaporofita vhanga, nda ni vhulaha nga maipfi anga, khaṱhulo dzanga dza ni vhonetshela unga lupenyo,

⁶ na konou ḓivha uri tshine nda tshi takalela a si tshiṱhavhelo, ndi lufuno lu sa shanduki, ndi funa ni tshi ḓivha Mudzimu, u fhira u ṋekedza nduvho i fhiswaho.”

Vhapfuki vha mulanga

⁷ “Hone vhone vho vhofholola mulanga unga Adamu; henefho ndo vhona vha sa fulufhedzei.

⁸ Giliadi ndi muḓi wa vhaitazwivhi, milenzhe yavho yo khakhaṱhela malofha.

⁹ Zwigwada zwa vhotshifhe zwi nga mavemu a no lalela muthu, vha vhulaha vhathu gondoni ḽa u ya Shikheme, vha luka vhunwa.

¹⁰ Ndo vhona zwi nengisaho kha vhathu vha Israele: Efraimi u ntshandukela nga vhupombwe, Israele a ḓishata tshika.

¹¹ A vha iwe Juda, ndo u vhetshela tshifhinga tshine nda ḓo u lifhedza.”