HOSIA 14 - BIVHILI KHETHWA Mafhungo Madifha

Vhaisraele kha vha laṱe vhuvhi havho vha pfumelelwe

¹ Israele, vhuelela ha Muṋe washu Mudzimu waṋu. No khukhulwa nga vhuvhi haṋu na wa!

² Ṱuwani na maipfi ni humele ha Muṋe washu. Ni mu vhudze ni ri, “Ri hangwele vhuvhi hashu u ri ṱanganedze nga vhuthu uri ri ṋekedze maipfi ashu a thendo.

³ Vhaashuru vha nga si ri tshidze, a ri tsha ḓo namela bere dza nndwa. A ri tsha ḓo dovha ra amba na zwithu zwe ra vhumba nga zwanḓa zwashu ra ri, ‘Midzimu yashu’, ngauri ndi Iwe une wa khathutshela tsiwana.”

Muṋe washu a tshi fulufhedzisa Vhaisraele vhutshilo vhuswa

⁴ Muṋe washu u ri, “Ndi ḓo fhodza vhushandukwa ha vhathu vhanga, nda vha funa nga mbilu yanga yoṱhe, ngauri ndo kanda mbiti dzanga.

⁵ Ndi ḓo ṋukadza Israele unga ṅwando, vha ḓo fhufhuma unga phendephende. Vha ḓo ṱoka midzi unga miri ya Libanoni.

⁶ Maḓadzwane avho a ḓo adza a swika kule, vhugala havho vhu ḓo nga ha miolivi, vha nukhelela unga miri ya Libanoni.

⁷ Vhe vha vha vha tshi dzula mabamani a Libanoni vha ḓo vhuelela. Vha ḓo lima mavhele a anda. Vha ḓo fhufhuma unga minḓirivhe, bvumo ḽavho ḽa nga ḽa waini ya Libanoni.

⁸ Efraimi, u kha ḓi vha na mushumo-ḓe na midzimu? Ndi ḓo u fhindula nda u londola. Ndi nga muṱaululo u no dzula u mudala; mashudu au a bva kha Nṋe.”

Maipfi a u onesana

⁹ A re muṱali nga a ṱalukanye maipfi haya. Ngavhe a na ṱhalukanyo a tshi a dzhenisa mbiluni. Nḓila dza Muṋe washu dzo tou tswititi, vha fulufhedzeaho vha tshimbila ngadzo, hone mashandukwa a a khukhulwa.