HOSIA 11 - BIVHILI KHETHWA Mafhungo Madifha

Mudzimu u funa vhathu vhawe vha mashandukwa nga lufuno lu sa shanduki

¹ “Zwiḽa Israele a tshee ṅwana ndo mu funa, nda vhidza ṅwananga e Egipita.

² Huno naho vhaporofita vha tshi ḓi vha vhidza, vhone vha ṱutshela kule hanga, vhathu vhanga vha ṋekedza Baali zwiṱhavhelo, vha dubisela midzimu ya zwifanyiso zwioro.

³ Ndi Nṋe we nda dededza Efraimi, nda mu takula nga zwanḓa zwanga; hone ho ngo zwi ṱalukanya uri ndi Nṋe we nda mu fhodza.

⁴ Ndo vha endedza nga vhuthu ndo vhofhekana navho nga lufuno. Vho vhona ndo vha rula dzhogo nda kotama nda vha nusa.

⁵ Izwi vha tshi ḓo humela Egipita, vha tshi ḓo vhuswa nga khosi ya Ashuru, a si nge vha hana u vhuelela ha Nṋe naa?

⁶ Mafumo a ḓo ḽa miḓi yavho, tswinga dza khoro dza muḓi wavho dzi ḓo vunḓekanywa, vhutande he vha vhu tanda ha vha ḽa ṱhoho.

⁷ Vhathu vhanga vha ḓi fungelela u mpfuralela. Ndi zwone, vha ḓo ṱavha mukosi nga u pfa vhuṱungu ha dzhogo ye vha i hwala hone a hu na ane a ḓo vha rula yone.

⁸ Efraimi, ndi nga u laṱa hani? Israele, ndi nga u ṱutshela hani? Ndi nga ni ita hani zwe nda ita Adama kana nda ni ita zwe nda ita Tseboimi? Mbilu yanga a i tendi ndi tshi ita nga u ralo. Ndi a ni pfela vhuṱungu.

⁹ A thi nga iti zwe nda vha ndi tshi ḓo zwi ita nga mbiti, a thi tsha ḓo dovha nda lozwa Efraimi. Hufha ndi Mudzimu ndi si muthu, ndi Mukhethwa a re vhukati haṋu. A thi nga ni ḓeli ndo sinyuwa.

¹⁰ “Vha ḓo tevhela Yahavee, Ene u ḓo vhomba unga ndau, musi a tshi vhomba vhana vhawe vha ḓo ḓa vha tshi tetemela vha tshi bva vhukovhela.

¹¹ Vha ḓo ḓa vha tshi tetemela vha ḓa nga luvhilo sa zwiṋoni vha tshi bva Egipita, vha bva Ashuru vha tshi nga maivha, Nṋe ndi ḓo vha vhea zwiṱahani zwavho,” hu amba Muṋe washu.

Vhaisraele vho dzhia khotsi avho Jakopo

¹² Vhathu vha Efraimi vho ntanda nga mazwifhi, vhathu vha Israele vho ntanga nga vhufhura. Vhathu vha Juda vho shandukela Mudzimu, vho shandukela Mudzimu, vho shandukela Mukhethwa a fulufhedzeaho.