HABAKUKU 2 - BIVHILI KHETHWA Mafhungo Madifha

Muṋe washu a tshi fhindula Habakuku

¹ Ndi ḓo ima kha tshiingamo tshanga, ndi ḓo lindela kha ḓingo, uri ndi pfe zwine a ḓo mmbudza, na zwine a ḓo fhindula kha mbilaelo yanga.

² Muṋe washu o mphindula a ri, “Ṅwala nzumbululo iyi kha mabaphathi i vhonale zwavhuḓi, i kone u vhalea nga u ṱavhanya.

³ Ndi uri nzumbululo iyi ndi vhuṱanzi ha tshifhinga tsho vhewaho. I amba zwa vhufhelo, zwine ya amba zwi ḓo wanala zwi ngoho. Naho ya lenga, u i lindele; vhukuma i ḓo ḓa, a i nga lengi.

⁴ Ṅwala enea u ri: ‘Wa u ḓihudza, vhukuma vhutshilo hawe vhu ḓo fheṱwa, hone a fulufhedzeaho u ḓo tshila nga u dzula a tshi fulufhela Mudzimu.’

⁵ “Vhukuma muthu wa u ḓihudza a sa pfeleli u ḓo fhurwa nga lupfumo. U na tseḓa i no nga ya tshalo, u nga lufu, ha fushei u ḓikuvhanganyela tshakha dzoṱhe, vhathu vhoṱhe u vha ita mathubwa.

⁶ Zwenezwo vha ḓo mu goḓa vhoṱhe, vha mu kolela vha mu holedza vha ri, ‘U ḓo zwi vhona hoyu ane a khokha thundu ye a tswa, a pfuma nga u lifhisa vhathu milandu! Zwi ḓo guma zwenezwino!’

⁷ Vho ḽaho milandu yau vha ḓo u vutshela kathihi fhedzi. Vha ḓo u vutshela ha vho tetemela iwe nga nyofho, vha mbo ḓi u ṱangula na zwenezwo.

⁸ Ndi uri wo ṱangula tshakha nnzhi, ndi zwone, vhathu vho salaho vha ḓo ṱangula iwe; ngauri wo shulula malofha a vhathu, wa phusukanya mashango na miḓi wa lozwa vhoṱhe vha dzulaho hone.

⁹ “Khombo i ḓo u wela, ngauri wo ḓipfumisa nga thundu ye wa i wana nga vhuvemu, wa fhaṱa tshiṱaha tshau nṱha uri u tinye tshanḓa tshi ḓisaho khombo! Thundu yeneyo i ḓo ḓisela muṱa wau khombo.

¹⁰ Vhunwa he wa vhu luka ho ḓisa ṱhoni muṱani wau; wo huvhadza tshakha nnzhi, u ralo ha vha u ḓilozwa.

¹¹ Matombo a mitsheṱo na one a ḓo ṱavha mukosi, matanda a humisa uyo mukosi.

¹² “Khombo i ḓo u wela ngauri wo fhaṱa muḓi nga u shulula malofha, wa tea ḓorobo nga vhugevhenga!

¹³ Kani-ha zwe vhathu vha shuma zwi tshi fhedza nga u swa nga mulilo, zwe tshakha dza ḓinetisela, zwa sala zwi si tshithu, a si Muṋe washu Mulangazwoṱhe we a ri kha zwi ralo naa?

¹⁴ Shango ḽi ḓo ḓala nḓivho ya vhugala ha Muṋe washu zwa nga lwanzhe lwo ḓala maḓi.

¹⁵ “Khombo i ḓo u wela ngauri wo nwisa dziṅwe tshakha khavho yo ḓalaho vhuhali vhu kambaho, uri u kone u vha vhonela.

¹⁶ A u tsha ḓo vha na vhugala, tshau dzi ḓo vha ṱhoni. Zwino ndi tshifhinga tshau! Inwa u pepeleke! Tshinwelo tshi no bva tshanḓani tsha maanḓa tsha Yahavee tshi ḓo mona tsha vhuya tsha swika ha iwe, vhugala hau vhu vho ḓo tibwa nga ṱhoni.

¹⁷ Wo rema miri ya Libanoni, zwino hu ḓo reṅwa iwe, wo vhulaha dziphukha, zwino dzi vho ḓo u pandamedza. Wo shulula malofha a vhathu, wo phusukanya mashango na miḓi, wa lozwa vhoṱhe vha dzulaho henefho.

¹⁸ “Mudzimu wa tshitungulo u na mushumo-ḓe? Hufha wo vhaḓwa nga muthu! Ndi tshifanyiso, tshi gudisa vhathu vhufhura fhedzi. Muthu zwi mu farisani a tshi fulufhela tshithu tshe a vhaḓa nga zwanḓa zwawe? Hufha o ita mudzimu u sa tshidzi, na u amba u sa ambi?

¹⁹ Khombo i ḓo wela muthu ane a vhudza tshitanda a ri, ‘Vuwa!’ Kana a vhudza tombo ḽi sa ambi a ri, ‘Takuwa!’ Ḽi nga u dzumbululela mini? Naho ḽo fhomiwa nga musuku na siliva, a ḽi nga vhuyi ḽa fema.

²⁰ Hone Muṋe washu u thembeleni yawe khethwa, ḽifhasi ḽoṱhe ḽi tou tshete phanḓa hawe.”