GENESI 8 - BIVHILI KHETHWA Mafhungo Madifha

Mudzimu a tshi dovha u londola vho salaho u fa

¹ Huno Mudzimu a elelwa Nua na phukha dzoṱhe dza ḓaka na zwifuwo zwe zwa vha zwi nae tshikepeni, a ḓisa muya wa vhudzula ḽifhasi, maḓi a thoma u tsa,

² zwisima zwa mativha na mabuli a muḓalo wa maḓi a re lutomboni zwa hoṋiwa, mvula ya pfula.

³ Maḓi o tibaho ḽifhasi a fhungudzea nga zwiṱuku. Musi hu tshi fhela maḓuvha a 150, maḓi a vha o no fhungudzea,

⁴ nga ḓuvha ḽa 17 ḽa ṅwedzi wa vhuṱanu na vhuvhili, tshikepe tsha dzula kha thavha ya Ararathi.

⁵ Maḓi a ḓi fhungudzea a tshi ya u swika nga ṅwedzi wa fumi, huno nga ḓuvha ḽa u ranga ḽa ṅwedzi wa fumi miṱumba ya dzithavha ya thoma u vhonala.

⁶ Musi ho no fhela maḓuvha a 40, Nua a vula fasiṱere ḽa tshikepe ḽe a vha o kwea,

⁷ a ruma funguvhu, ḽa ḓi fhufha ḽi tshi ya phanḓa na murahu maḓi o tibaho ḽifhasi a vhuya a xa.

⁸ A konou ruma ḽiivha u yo sedza arali maḓi o no tsa, mavu a tshi vho vhonala.

⁹ Hone ḽiivha ḽa si wane fhethu hune ḽa nga kavha hone, ngauri shango ḽo vha ḽi tshee ḽo ḓala maḓi; ḽa humela ha Nua tshikepeni. A bvisa tshanḓa tshawe, a dzhia ḽiḽa ḽiivha a ḽi humisela hune a vha hone ngomu tshikepeni.

¹⁰ A lindela maṅwe maḓuvha maṱanu na mavhili, a dovha a ruma ḽiivha.

¹¹ Huno musi ḽiivha ḽi tshi humela khae nga madekwana, ḽa ḓa ḽo khuba ṱari ḽiṋu ḽa muolivi. Ndi hone Nua a tshi vho ḓivha uri maḓi a re shangoni o tsa.

¹² A lindela ha fhela maṅwe maḓuvha maṱanu na mavhili, a dovha hafhu a ruma ḽiivha, ḽone ḽa si tsha vhuya.

U thoma vhutshilo nga huswa

¹³ Huno nga ḓuvha ḽa u ranga ḽa ṅwedzi wa u ranga, Nua ó no vha na miṅwaha ya 601, maḓi a vha o no xa shangoni. Ndi hone Nua a tshi rula ṱhanga ya tshikepe, a vhona uri mavu a nṱha o oma.

¹⁴ Nga ḓuvha ḽa 27 ḽa ṅwedzi wa vhuvhili ḽifhasi ḽa vha ḽo no oma tshoṱhe.

¹⁵ Ndi hone Mudzimu a tshi amba na Nua a ri,

¹⁶ “Ibva tshikepeni, iwe na musadzi wau na vhana vhau na vhasadzi vhavho.

¹⁷ Vulela tshakha dzoṱhe dza zwivhumbwa dzi re na iwe – zwiṋoni na zwifuwo na zwivhumbwa zwoṱhe zwine zwa kokovha mavuni, uri zwi ḓadze ḽifhasi, zwi bebe, zwi ande khaḽo.”

¹⁸ Huno Nua a bvela nnḓa, khathihi na vhana vhawe vha vhatuka, na musadzi wawe, na vhasadzi vha vhana vhawe.

¹⁹ Phukha dzoṱhe na zwivhumbwa zwoṱhe zwi kokovhaho mavuni, na zwiṋoni zwoṱhe – zwoṱhe zwi tshilaho shangoni, zwa bva tshikepeni zwi tshi tevhekana nga dzitshakha.

²⁰ Huno Nua a fhaṱela Muṋe washu aḽiṱari, a dzhia zwiṅwe zwa zwifuwo zwoṱhe zwi ḽiwaho na zwiṋoni zwi ḽiwaho, a ṋekedza Muṋe washu zwiṱhavhelo khayo.

²¹ Muṋe washu a pfa zwi tshi nukhelela, a amba nga mbilu a ri, “A thi tsha ḓo dovha nda teketela mavu nga mulandu wa muthu, hufha nzulele yawe yo tshingamela vhuvhini u bva hanani hawe. A thi tsha ḓo dovha nda lozwa zwivhumbwa zwoṱhe zwi tshilaho sa zwe nda ita.

²² “Musi shango ḽi tshee hone, zwifhinga zwa u zwala na u kaṋa, u rothola na u fhisa, tshilimo na vhuriha, vhusiku na masiari, zwi ḓo ḓi vha hone.”