GENESI 7 - BIVHILI KHETHWA Mafhungo Madifha

¹ Ndi hone Muṋe washu a tshi amba na Nua a ri, “Dzhena tshikepeni, iwe na muṱa wau woṱhe; ndo vhona e iwe fhedzi a re muvhuya kha vha murafho houno.

² Phukha dzoṱhe dzi ḽiwaho u longe zwiduna zwiṱanu na zwivhili na zwisadzi zwiṱanu na zwivhili zwa lushaka luṅwe na luṅwe, dzi sa ḽiwi u longe mbili, tshiduna na tshisadzi.

³ U longe na zwiṋoni zwa lushaka luṅwe na luṅwe, zwiduna zwiṱanu na zwivhili na zwisadzi zwiṱanu na zwivhili, uri tshakha dzazwo dzo fhambanaho dzi si lovhe fhano shangoni.

⁴ Hu ḓo ri ho no fhela maḓuvha maṱanu na mavhili u bva zwino, ḽifhasi nda ḽi nisela mvula ha vhuya ha fhela maḓuvha a 40 na vhusiku hao, nda lozwa zwoṱhe zwi tshilaho zwe nda zwi vhumba, zwa si tsha vha hone fhano fhasi.”

⁵ Nua a ita zwoṱhe zwe Muṋe washu a mu laya.

⁶ Ḽifhasi ḽi tshi ḓelwa nga muḓalo wa maḓi, Nua o vha o no vha na miṅwaha ya 600.

Maḓi mahulu

⁷ Nua na vhana vhawe vha vhatuka na musadzi wawe na vhasadzi vha vhana vhawe vha dzhena tshikepeni uri vha tinye muḓalo wa maḓi.

⁸ Ha ḓa zwivhili-zwivhili zwa phukha dzi ḽiwaho na dzi sa ḽiwi, na zwa zwiṋoni, na zwa zwivhumbwa zwoṱhe zwi kokovhaho mavuni,

⁹ tshiduna na tshisadzi, zwa dzhena tshikepeni, nga he Mudzimu a laya Nua.

¹⁰ Musi ho no fhela ayo maḓuvha maṱanu na mavhili, ḽifhasi ḽa ḓelwa nga muḓalo wa maḓi.

¹¹ Nua o ri o no vha na miṅwaha ya 600, nga ḓuvha ḽa 17 ḽa ṅwedzi wa vhuvhili – ḓuvha ḽeneḽo ha phulea zwisima zwoṱhe zwa mativha mahulu, mabuli oṱhe a muḓalo wa maḓi a ngei ṱaḓulu a vulea,

¹² mvula ya nela ḽifhasi ya fhedza maḓuvha a 40 na vhusiku hao.

¹³ Nga ḓuvha ḽeneḽo Nua na vhana vhawe vha vhatuka, Semu na Hamu na Jafethe, vha dzhena tshikepeni khathihi na musadzi wawe na vhasadzi vha vhana vhawe vhararu,

¹⁴ vha dzhena na phukha dzoṱhe dza ḓaka dzi tshi ya nga tshakha dzadzo, na zwifuwo zwoṱhe zwi tshi ya nga tshakha dzazwo, na zwivhumbwa zwoṱhe zwi kokovhaho mavuni zwi tshi ya nga tshakha dzazwo, na zwiṋoni zwoṱhe zwi tshi ya nga tshakha dzazwo, na zwoṱhe zwi re na phapha.

¹⁵ Ho ḓa zwivhili-zwivhili zwa zwivhumbwa zwi femaho, zwa ḓa ha Nua zwa dzhena tshikepeni.

¹⁶ Phukha dzo dzhenaho dzo vha dzi tshiduna na tshisadzi tsha zwoṱhe zwi tshilaho, nga he Mudzimu a laya Nua. Ndi hone Muṋe washu a tshi mu hoṋela ngomu.

¹⁷ Ha fhela maḓuvha a 40 ḽifhasi ḽi tshi khou ḓi hulelwa nga muḓalo wa maḓi. Musi maḓi a tshi ḓi anda, a takula tshikepe tsha papamala tsha si tsha kwama fhasi.

¹⁸ Maḓi a takuwa a anda zwihulu a ḓadza ḽifhasi, tshikepe tsha papamala nṱha ha maḓi.

¹⁹ A takuwa zwihulu a ḓadza ḽifhasi, thavha dzoṱhe dza miṱumba dzi re fhasi ha lutombo dza tibedzwa,

²⁰ maḓi a takuwa a tibedza dzithavha, a fhira miṱumba ya dzithavha nga mithara ṱhanu na mbili,

²¹ zwoṱhe zwi tshilaho kha ḽifhasi zwa lovha – zwiṋoni na zwifuwo na phukha dza ḓaka na mutshatshame woṱhe wa zwivhumbwa fhano fhasi, na vhathu vhoṱhe;

²² zwoṱhe zwi femaho zwa shangoni ḽo omaho zwa fa.

²³ Muṋe washu o lozwa zwoṱhe zwi tshilaho, zwa si tsha vha hone fhano fhasi – vhathu na dziphukha na zwivhumbwa zwi kokovhaho mavuni na zwiṋoni, zwa tou swielwa fhano fhasi, ha sala Nua fhedzi na vhe vha vha vhe nae tshikepeni.

²⁴ Maḓi a ḓadza ḽifhasi ha vhuya ha fhela maḓuvha a 150.